Lah ngoai tâm ăp n’gor rdâng ma nau khuch khat jâk jêh mih dak lip rlau aơ, xã Tuy An Nam, n’gor Dak Lak dôl ƀư ndrel bar nau kan têh: Rklaih nau khuch bah trôk nar lơh, đă mpăn nau rêh ƀon lan ndrel nchrăp ân rơh săch kan êp tât. Wa Nguyễn Văn Hoàng, Kruanh UBND xã mbơh, bol ma âk nau jêr, yơn nau săch kan lah nau kan chính trị khlay ngăn. Tâm rnôk aơ, xã mhe rgum ƀư nau kan tuch tăm, đăp mpăn nau rêh ƀon lan, nkre nchrăp ueh ăp nau dơi gay ƀon lan hăn săch kan tŏng, ăp, đăp mpăn tâm di luật ntrŭnh:

‘Phung hên kŏ ndâk ăp rmôt, rnâng kan rđau kan, rnâng kan săch kan, Phung hên hŏ ƀư jêh hôm. Ăp nau nchrăp ƀư kan ri kŏ jêh đŏng, hôm nau kan phung hên ƀư rnôk aơ lah nkoch trêng. Ri hên mra nkoch mbơh ma pano, áp phích kŏ kơt lah nkoch mbơh tâm radio bah xã”.

Mô êng n’gâng kan ăp gưl lăp kan, nŭih ƀon lan Dak Lak kŏ ntoh kloh nuih n’hâm kan bah công dân ma nau kan chính trị têh khlay bah neh dak. Wa La Văn Thanh, gŭ tâm thôn Hiệp Đạt, xã Ea Mdroh mbơh: păng mro uănh nau, joi uănh kloh mpeh nau săch kan gay tât nar ri ƀư ân tŏng nau dơi bah nơm, wa Thanh ntoh nau ŭch:

‘Lah du công dân, gâp kŏ uănh khlay đŏng tât nau kan mpeh săch kan. Kŏ ndăn mông nar gay ma joi uănh tâm ăp ntŭk nmoch mbơh nau. Gâp ŭch ngăn rơh săch kan aơ mra geh dơi ăp nŭih rdau kan geh nau blau ndrel ŭch rŏng ma ƀon lan gay mhâm ƀư ân kônh wa ƀon lan dơi geh nar lơn ma hun hao đŏng”.

Lah rjăp, nau săch kan ntoh măt Quốc hội gưl XIV ndrel ntoh măt HĐND ăp gưl lah nau kan chính trị khlay, lah rnôk gay cử tri ndrel ƀon lan ƀư nau dơi ƀư tơm bah n’ha phiếu, săch ăp ntoh măt blau, tâm di ma nau ŭch, nau mpŏng bah ƀon lan, wa Cao Thị Hoà An, Groi Bí thư Rnâng kan n’gor uỷ, Kruanh HĐND n’gor, Kruanh Uỷ ban săch kan n’gor Dak Lak, mbơh:

‘Nau kan nchrăch săch kan lah nau ƀư kan tơm bah neh dak ndrel bah n’gor, ƀon lan ân ƀư tơm, tâm ban, tâm di pháp luật, đăp mpăn, têm nkrem ndrel ngăn ngên lah nar rgum bah lam ƀon lan. Ŭch nơm ân geh nsôih ndrel nsôih âk lơn tay, Nơm ân geh rnơm lah mra ƀư ân jêh ueh ăp nau kan nchrăp luh”.

Lah rjăp nau kan bar ntil, rklaih khuch bah trôk nar lơh, nkre ntrŭnh ƀư nau kan chính trị, wa Lương Nguyễn Minh Triết, Bí thư n’gor uỷ Dak Lak đă ăp gưl, ăp ntŭk kan ân n’hao lơn tay nuih n’hâm kan, ƀư ndal, khoa học, “pa kan rlau bar, rlau pe”. Ngăn lah, tâm nau ƀư nau kan n’gâng kan bar gưl, wa Lương Nguyễn Minh Triết đă cán bộ mĭn rjăp săm ƀŭt kan, n’hao nau tâm rgop ƀư, đăp mpăn nau ngăch ndrel nau tam bah ăp nhoat nơm nchrăp ân rơh săch kan:

‘N’hao nau dơi săk tam bah nau kan tâm rgop nsum đah ăp gưl, ăp ntŭk kan, ăp nkuăl, nkre ndâk ntrong kan ân geh ntrơn rgâl mrô, dŏng ăp nau kan mbơh nau nkoch nau mhe gay ƀư ân săk tam tâm nau săch kan. Ăp nau ƀư kan tâm rnôk ntơm nchră ƀư ri ân geh nau tâm rgop rjăp, săk tam đah ăp gưl ăp ntŭk kan, ăp xã tĭng nau ntĭm mbơh kơp kloh, der tâm ntrŭp mô lah nchlơi nau kan. Ăp nkô̆ nau kan nsum lah nau ƀư ân dơi bah du rơh săch nŭih ntoh măt Quốc hội gưl XVI ndrel ntoh măt HĐND ăp gưl tâm lam n’gor”.

Ntơm bah nkuăl têh tât ƀon lan, ntơm bah nkuăl nơih ân tât ăp nkuăl hôm mâp âk nau jêr jêh mih dak lip, nau săch kan ân rnôk săch nŭih pah kan tâm Dak Lak dôl geh ntrŭnh ƀư đah nuih n’hâm nchrăp, nau kan rjăp ndrel nau nsôih prêh. Đah nau lăp kan tâm ban bah lam ntrong kan chính trị, nau tâm ban nuih n’hâm, kơt tĭng rjăp bah ƀon lan, n’gor Dak Lak dôl choat tât nkô̆ nau geh nau dơi ngăn ân rơh săch kan ntoh măt Quốc hội gưl XVI ndrel ntoh măt HĐND ăp gưl năm kan 2026-2031, ngăn ngên jêng nar rgum lam ƀon lan, rgop nau ndâk njêng Ngih dak pháp quyên xã hội chủ nghĩa bah ƀon lan, yor ƀon lan./.