Ta nar pah kan đah N’gâng kan tuch tăm mât rong n’hanh Ntŭk ntô gŭ âm, wa Lương Nguyễn Minh Triết, Bí thư N’gor ủy Dak Lak ntĭm rđău n’hao mât uănh rjăp nău ƀư mât rong tui ka nkĭ nkân, ngăn lah ta ăp n’glău têh n’hanh nkual mper dak lêng, gay đăp mpăn hun hao wăng sa hăn ndrel đah mât njrăng ntŭk ntô gŭ âm nâp nâl.

Lam n’gor Dak Lak aƀaơ geh rlău 9.500 ha mât tui ka, rnoh geh rlău 33.000 tấn du năm. Âk nkual mper dak lêng, mpong dih dak me, n’glău têh geh âk mât ka nkĭ nkân, ƀư n’hôl bô tĭng ntŭk, khuch tât uĕh kloh tu dak n’hanh đăp mpăn ntŭk ntô dak nor. Rnoh nkĭ nkân mât tui ka geh trong hao, yơn trong kan dăp rgum, uănh nđôi ntŭk ntô gŭ âm nkual mât rong hôm e jêr. ta nar pah kan, Bí thư N’gor ủy Dak Lak đă ăp ntŭk ndăn hăn uănh, dăp rgum tay lĕ rngôch nkual mât rong tui ka. Wa lah rjăp, gay nău kan mât tui ka geh nâp nâl, an ntrŭt nsôr kơt dŏng công nghệ mât kloh uĕh, tâm pleh dak, joi tu tơm.