VOV4.M’nông: Ôi 29/9, ta nkuăl ƀon têh Buôn Ma Thuột, UBND n’gor Dak Lak ƀư rƀŭn tâm mâp ăp nŭih ntuh kơl tă bah dak ba dih tâm Dak Lak năm 2022. Rơh rƀŭn geh nau tât râng ngăn bah 8 ntŭk kan tâm n’gor ndrel nthoi đah 16 ntŭk, rmôt kan ntoh măt tâm dak ba dih ta Việt Nam. Tĭng Sở Ngoại vụ n’gor Dak Lak, tâm 2 năm rlau aơ, n’gor hŏ bonh đă nau rgop kơl an geh rlau 6,5 rkeh đôla tĭng bôk nau kan n’hao nau tâm boh ndêl ƀư nau kan bonh đă nau rgop kơl an bah Chính phủ.

Tâm nê, kơp tât khay 8 năm aơ, UBND n’gor ân ƀư nau ndơn 51 ntŭk kơl an đah rnoh geh kuăl jă rgop kơl an geh bơi tât 3,7 rkeh đôla. Nau kan tơm prăk geh kơl an ngăn lah dak si, ntĭm nti, ntŭk ntu gŭ âm, hun hao văng sa, rêh jêng ndrel rklaih ăp nau kan mpeh nau rêh. Mpeh nkuăl, wa Võ Ngọc Cảnh, Groi Kruanh UBND n’gor Dak Lak lah rjăp, Dak Lak mro pơk trong nơih gay ma kơl an ueh ngăn gay ma ăp ntŭk kan, nŭih ntuh kơl tă bah dak ba dih tâm boh, kơl an n’gor tâm rơh tât./.

VOV Tây Nguyên

Nŭih rblang: H’Thi