Tâm nĕ, nău kan gưl 3 bâh nău nchrăp kan ntuh kơl ƀư rdâk njêng trong têh Khánh Hoà- Buôn Ma Thuột lvang rơh 1 geh lĕ nău jong klâp ma 48km, bâh Km69+500 xã Ea Kar tât Km 117+593 xã Ea Knuêc, hăn let 7 xã geh Ea Ô, Vụ Bổn, Tân Tiến, Krông Păc, Ea Knuêc, Ea Ning n’hanh Ea Ktur.

Nău kan geh njêng ntŭk rkăng trong tơm tâm rgop Tây Nguyên đah duyên hải Nam Trung Bộ, mbluh đah ăp jrŏng njŏk, n’hao geh săk rnglăy ăp nău kan ndơ dŏng ntung trong lĕ n’hanh dôl geh ntuh kơl, bâh nĕ pơk hvi nău kan hun hao, n’hao nău dơi tâm rlong, mât đăp mpăn rnă njrăng ngih dak - rnă njrăng rêh jêng n’hanh ntrôl an hun hao đăp mpăn nău rêh jêng. Ndrel đah nĕ, Nău kan ntuh kơl rdâk njêng trong Hồ Chí Minh ta ntŭk trong der mpeh luh nar Buôn Ma Thuột geh nău jong 39,6km, ntŭk bôk năp ta xã Cuôr Đăng n’hanh ta dŭt lah xã Hoà Phú, hăn let 5 xã, phường geh Cuôr Đăng, Ea Kao, Hòa Phú, Ea Knuếc, Ea Ktur.

Nău kan aơ ntop bah ir nău jêr an nkual ƀon têh ta nklang tơm, n’hao an geh săk rnglăy sŏk dŏng trong Hồ Chí Minh, n’hao nău tâm rgop đah ăp n’gor Tây Nguyên, kơl an hun hao wăng sa- rêh jêng n’hanh ndâk nsơm nău dơi mât rnă njrăng ngih dak- mât đăp mpăn ta nkual. Tâm nar aơ đŏng, ta nkual mpeh luh nar bâh n’gor Đăk Lăk ( n’gor  Phú Yên ơm), du đê̆ nău kan tơm khlăy êng lĕ geh tâm ndrĭh ƀư kan n’hanh ntơm kan, geh nău kan ta nkual pâl nđaih rlu rlău gưl têh Cù Lao Mái Nhà ta xã Ô Loan n’hanh 2 nău kan ƀư ngih gŭ an ntŭk rêh jêng ta phường Bình Kiến n’hanh ta nkual mpeh ba lơ trong Trần Phú, phường Tuy Hoà, ntop an ƀư lôch ndơ dŏng nkuăl ƀon têh n’hanh an tâm di đah nău ŭch ta ntŭk rêh jêng bâh nuĭh ƀon lan.