VOV4.M’nông: Mhe aơ, Rmôt kan mêt uănh bah n’gor Dak Nông hŏ nchră tât ăp nau tih tâm nau kan pă neh tâm ăp nkuăl bah n’gor. Tâm nê, nau ngăn lah kan pă tih nau ntrŭnh mrô 65 săm ƀŭt kơp dơn nau dơi dŏng neh âk ăp rnăk tâm xã Dak Som, nkuăl Dak Glong, ân geh sŏk lơi. Yơn lah, nŭih ƀon lan hŏ rêh ndrel tuch tăm đăp mpănl Săm ƀŭt kơp dơn dŏng neh kŏ geh âk rnăk manh prăk tâm ngân hàng. Nau sŏk lơi săm ƀŭt dôl mâp nau jêr.

            Nô Lê Minh Cà Na, mbơh, rnăk păng geh bar blah neh, hvi bơi tât 8,5 ha tâm thôn 4, xã Dak Som, nkuăl Dak Glong hŏ geh pă nau dơi kơp dơn dŏng neh tâm năm 2017. Rnăk nchăm manh ngân hàng bơi tât 4,5 rmen, ri ma nau sŏk lơi neh lah nau jêr:

            ‘Ngih gâp ta aơ rvăt neh ntơm năm 1998 ndrel ntơm tuch tăm. Bôk năp ri tăm cà phê, jêh nê ntrơn jêng tăm tơm sa play. Tât năm 2015 ri rgum tăm tay tơm gle sŏk ƀăng. Rnoh prăk ntuh kơl ndrel prăk dŏng kan ân mir tăm aơ ri rlau 10 rmen. Mhe aơ, rnăk hên geh ndơn tay nau mbơh bah xã, nkuăl lah sŏk lơi săm ƀŭt dŏng neh, drăp ndơ klơ neh, lah păng sŏk nsĭt ngăn ti mhâm dơi, dôl geh nchăm manh prăk ngân hàng hôm”.

            Tâm kơt ma nê, rnăk wa K’Hai geh bơi tât 2,2 ha neh mir tăm cà phê nsum ma tiêu ta thôn 4, xã Dak Som, nkuăl Dak Glong, kŏ geh pă săm ƀŭt kơp dơn dơi dŏng neh ntơm năm 2017, ndrel dôl nchăm tâm ngân hàng. Rnôk aơ ndơn geh nau mbơh lah sŏk lơi săm ƀŭt kơp dơn dŏng neh, wa K’Hai rvê ngăn, yơn kŏ mô gĭt mhâm blau ma ƀư:

            ‘Bôk năp cán bộ neh ntu jă tât ƀư săm ƀŭt gay ma pă săm ƀŭt kơp dơn dŏng neh. Bu rgum ăp rnăk tâm ngih rƀŭn bah Uỷ ban xã Dak Som gay ma kơp uănh nau pă săm ƀŭt kơp dơn. Bu ôp ăp rnăk lô 1, neh hên ri mbu đah neh tâm dăch, ntă rnăk mô geh nau tâm pit ri mơ pă săm ƀŭt. Rnôk geh săm ƀŭt ri ngih hên nchăm ngân hàng manh 300 rkeh hôm, rnôk aơ Ngih dak lah sŏk lơi ri mhâm blau geh prăk ma nsĭt lơi săm ƀŭt kơp dơn neh”.

            Tĭng nau nchră mrô 140 bah ntŭk kan mêt uănh bah n’gor Dak Nông, tâm xã Dak Som, nkuăl Dak Glong geh 65 săm ƀŭt kơp dơn ân nsĭt lơi. Nkô̆ lah, neh aơ geh UBND n’gor Dak Lak (ơm) jao ân Viện Khoa học Lâm nghiệp Nam Trung Bộ ndrel Tây Nguyên ntơm năm 2003, tâm nau rgum 3 ntil bri. Rnôk aơ UBND nkuăl Dak Glong ndrel xã Dak Som hŏ mbơh tât ăp rnăk ƀon lan đă ân ndŏ lơi săm ƀŭt kơp dơn dŏng neh, lah mô ndŏ, nkuăl ƀư jut jăng nau khlay bah săp săm ƀŭt aơ. Yơn lah, tâm 65 săm ƀŭt kơp dơn dŏng neh hŏ pă tih, âk ngăn bu nchăm manh prăk ngân hàng. Ndri ma, wa Nguyễn Hồ Hữu-Groi Giám đốc Ngân hàng Ngih dak ntŭk kan tâm n’gor Dak Nông ân lah: ăp ntŭk kan bah n’gor Dak Nông ri ân ƀư kloh nŭih ndơn ăp nau pă tih:

            ‘Rnôk ma năch trok prăk lĕ tŏng ăp rnoh prăk manh tơm ndrel prăk kon ri mơ ngân hàng bu mplŏ lơi săm ƀŭt tă geh nchăm ân nơm. Nau kan aơ ân geh tĭng tâm di nau ntrŭnh mrô 39. Ăp ngân hàng bu ân manh hŏ ƀư tâm di, mô geh nau tih nau ntrŭnh. Hôm nau ma pă săm ƀŭt kơp dơn tih jêh ri manh nchăm ngân hàng ri N’gâng kan tâm nkuăl bu ân mhal lơi nŭih ƀư tih, rklaih lơi ăp nau nkol mhâm ƀư jêh aơ ăp ntŭk kan n’gâng kan ân geh tâm nchră ƀư tĭng ăp nau ntrŭnh bah Luật neh ntu kŏ kơt lah nau ntrŭnh đă bah ngân hàng”.

            Nau ngăn bah nau ntrŭnh uănh bah rmôt kan n’gor Dak Nông, UBND nkuăl Dak Glong hŏ ntrŭnh nau mbơh kloh nau kan sŏk kân bah 65 săm ƀŭt kơp dơn nau dơi dŏng neh pă tih tâm xã Dak Som. Yơn lah, tât rnôk aơ, nau sŏk lơi dôl ma mâp âk nau jêr, yor âk ngăn săm ƀŭt kơp dơn nau dŏng neh geh nchăm manh prăk tâm âk ngân hàng. Wa Lê Văn Đại, Kruanh UBND xã mbơh:

            ‘Phung hên hŏ nkoch mbơh jêh ri lir moh săk tâm ntŭk kan bah UBND xã, ăp nkuăl geh âk nŭih hôm gay ma bonh đă ân ƀon lan gĭt kloh nau kan bah Ngih dak pă tih ri ân geh sŏk lơi. Yơn nau jêr ta aơ lah âk ngăn ăp rnăk ƀon lan hŏ leo săm ƀŭt nê hăn nchăm manh prăk ngân hàng”.

            Wa Trần Nam Thuần-Kruanh UBND nkuăl Dak Glong mbơh, tâm 65 săm ƀŭt geh kơp dơn dŏng neh pă tih nau ntrŭnh ri săk păng nơm pă 45 săm ƀŭt ân ƀon lan. Yơn lah, nau sŏk nsĭt ri dôl mâp nau jêr:

‘Gâp kŏ jao ân xã gay ma bu mbơh nau ndrel jur pah kan đah ăp rnăk, jêh ri nkoch mbơh bonh đă kônh wa ndŏ lơi săm ƀŭt kơp dơn nau dơi dŏng neh pă tih. Tăng noh nô mbơh lah kŏ ntơm ƀư nau sŏk lơi geh 60 tâm rnoh 64 hôm. Yơn lah, ân gâp ôp n’hêl gay ma uănh tay jêh ri mra mbơh ân năn. Lah nsum nau sŏk nsĭt nê mâp nau jêr ngăn. Rnôk aơ knŭng n’hao nau nkoch trêng, bonh đă ƀon lan mplŏ lơi dơm, yơn mô blau ma ƀư nau êng ôh”.

            Geh tât nau pă tih 65 săm ƀŭt kơp dơn nau dơi dŏng neh tâm xã Dak Som ndrel âk nau tih tâm nau kan neh ntu tâm nkuăl Dak Glong, wa Ngô Thanh Danh, Bí thư n’gor uỷ Dak Nông mbơh, tâm rơh tât ri mra rklaih ân rjăp ăp nŭih dôl ma ƀư nau tih aơ./.

  Tuấn Long/vov Tây Nguyên

                        Nŭih rblang: H’Thi