Bâh bôk năm tât aƀaơ, lam n’gor Dak Nông geh 11 rơh ŭnh sa bri, lĕ rnoh neh khuch khat bơi tât 9ha. Tĭng nău mbơh bâh ntŭk kan tuch tăm mât rong n’hanh hun hao ƀon lan n’gor Dak Nông, tâm rnoh 250 rbăn ha bri bâh n’gor, aƀaơ geh klâp ma 43 rbăn ha, dŭt âk lah bri tăm ta nkual tơm khlăy mbra geh ŭnh sa âk, rgum ta ăp nkuăl Dak Glong, Cư Jut, Dak Mil, Tuy Đức n’hanh Krông Nô.

Ta năp nău mbra geh ŭnh sa bri, UBND n’gor Dak Nông lĕ ntĭm đă ăp ntŭk kan, n’gâng kan, UBND ăp nkuăl, nkuăl ƀon têh Gia Nghĩa, tơm bri n’hanh ăp ntŭk kan geh tât, mbơh tơih răng dăng ăp trong kan mât uănh bri an ueh. Nkre lah, ntrôl dăng nău kan mbơh tơih, rgŏ jă nuĭh ƀon lan tât râng mât bri n’hanh njrăng rdâng ŭnh sa bri.