Kêng măng 29/3, ta Jay Quốc hội, Kruanh Quốc hội Vương Đình Huệ ƀư  tơm rơh  pah kan đah Đảng đoàn Quốc hội đah Ban thường vụ n’gor Nghệ An mpeh rdâk njêng trong nchrăp Nghị quyết bah Quốc hội rlong rdâk njêng du đêt trong tĭng, trong  kơl mha êng hun hao n’gor Nghệ An. 

Ta rơh pah kan, kruanh rđău kan n’gor Nghệ An hŏ dăn đă ăp rmôt nkô̆ nău geh tât trong kan mpeh mât dŏng prăk kaih – ngân sách ngih dak; trong kơl mpeh mât dŏng đô thị, ndơ mpêt khlay, bri dak neh ntu ntŭk gŭ rêh; trong kơl mpeh mât dŏng ntuh kơl; hun hao wăng sa dak lêng; dăp rgum nuĭh kan, biên chế…Lah ta rơh rđău đă pah kan, Kruanh Quốc hội Vương Đình Huệ lah rjăp, Nghị quyết 39 bah Bộ Chính trị hŏ  jao an Đảng đoàn Quốc hội ôp uănh tay ăp tŏng lam lĕ rngôch, n’gluh an dŏng du đêt trong kơl mha êng gay rdâk njêng n’gor Nghệ An hun hao lam lĕ rngôch, geh rgum  tơm, tâm di đah trong nchrăp hun hao jŏ jong wăng sa-  rêh jêng kon nuĭh bah lam dak, dăp rgum gưl neh dak n’hanh dăp rgum nkual Bắc Trung Bộ n’hanh duyên hải Trung Bộ; nkre geh trong kơl  đăt ndal gay hun hao nkual ƀon têh Vinh jêng ntŭk rgum  tơm  wăng sa- văn hóa  bah lĕ  ma nkual Bắc Trung Bộ. Kruanh Quốc hội đă, n’gor Nghệ An ôp uănh tay ăp tŏng lam lĕ rngôch ăp  trong kơl ma ăp luật mhe dơi Quốc hội n’gluh an dŏng mbra geh nău tam, gay der bah tâm trŭp tâm Nghị quyết; ăp trong kơl rnôk ƀư lôch  jêh ân dơh dŏng ngăn, geh nău dơi. Lôch rơh hop dja, Ủy ban Tài chính Ngân sách bah Quốc hội râng ndrel Bộ Kế hoạch đầu tư đah nuih n’hâm dơn kan âk gay ƀư lôch jêh, ơm hao rblang dăn đah Ủy ban Thường vụ Quốc hội n’hanh Quốc hội.