Mih têh, dak bŭk têh tâm ăp khay kêng dŭt năm hŏ lơh khuch khat jru đah ntung trong bah n’gor Lâm Đồng. Nô nău pĭch rlâm, ndâp băm dak bŭk ta âk njăr trong me bah n’gor ƀư nău rsong hăn tay bah nuĭh ƀon lan mâp âk jêr jŏt n’hanh klach rvê. Gay đăp mpăn hăn ntung trong ta ăp njăr trong ndâp băm, pĭch rlâm, n’gâng kan ta ntŭk n’hanh mpôl kan dơi kan n’gor Lâm Đồng hŏ mbrôn suan ndăng mât nar mât an njăr trong me đăp mpăn, mbluh soih.  

Khay 12 ma ta nkual mpeh nhâp nar n’gor Lâm Đồng nha geh mih. Ta ăp njăr trong me bah n’gor, kơt: trong Quốc lộ 20, 27, 27C, 28, 28B… dơh saơ ăp ntŭk pĭch rlâm mpeh brŏng dak bah lơ brŏng dak bah dâng kơi nkra bah. Ndrel đah nê lah ăp khuch khat têh mpeh dak bŭk lơh ta ăp sop kue, ntơm bah sop Frenn, Mimosa, D’ran tât Đại Ninh, Sông pha, Gia Bắc… Tă bah dak bŭk lơh, ntơm bah âk khay aơ ăp mpôl kan dơi kan bah n’gor Lâm Đồng mbrôn suan gŭ kâp ndăng măng nar ta tĭng ntŭk dak bŭk, pĭch rlâm klach rvê n’hanh way tâm nuih n’hâm njrăng lor plơ̆ njêng tay dĭl ăp ntŭk gŭ kâp njrăng đăp mpăn ntung trong hăn an nuĭh ƀon lan. Nô Nguyễn Duy Hưng, dân quân xã Hiệp Thạnh, n’gor Lâm Đồng way râng gŭ kâp ndăng ta ntŭk dak băm trong Quốc lộ 20 ta n’glah pe K’ Rèn, an gĭt:

“Mpôl hên gŭ kâp njrăng đăp mpăn ntung trong an kônh wa, tâm pă mbor trong ndeh hăn gay der bah ntŭk dak băm. Oh nô tâm pă ƀư 2 rmôt gŭ kâp njrăng ta bôk trong bah aơ n’hanh bôk trong bah kăl ti ntŭk dak băm. Gâp gŭ kâp njrăng ta aơ gay đăp mpăn an kônh wa ƀon lan rsong hăn an đăp mpăn”.

Tâm du bông khay mih, mpôl cảnh sát ntung trong Công an n’gor Lâm Đồng pah kan mô geh nar rlu, mô kă rnam nar măng way geh măt ta njăr trong hăn gay ntĭm nti ăp ndeh hăn đăp mpăn. Thiếu tá Nguyễn Duy Hùng, Công an xã Đơn Dương, an gĭt, ăp nar mih dak bŭk, cán bộ, tahen đơn vị dơi rgum kan lĕ:

“Công an xã Đơn Dương tâm pă mpôl kan tơm n’hanh mpôl mât rnă njrăng tâm dâng gŭ kâp njrăng ndăng măng nar. Đah ăp nuĭh ƀon lan mâp jêr jŏt kơl nchuăn rdeng ndơ ntrơn du luh bah nkual dak bŭk klach rvê. Ta ăp njăr trong hăn mpôl cảnh sát ntung trong kan nsum đah mpôl Công an xã tâm pă mbor ndeh rsong hăn ta ăp ntŭk geh ma nău ndâp băm dak bŭk”.

 Tâm rơh mih dak bŭk ntơm bah nar 16/11 tât nar 5/12 ta ăp njăr trong hăn bah n’gor Lâm Đồng hŏ geh rlău 350 ntŭk pĭch rlâm neh. Geh rnôk nklang Đà Lạt dâk bah năp geh ma nău khan yơt êng tă bah sop D’ran, Mimosa, Frenn du rơh kol khan lĕ rngôch tă bah pĭch rlâm tâm rnôk bar trong sop êng, lah: Sacom Tuyền Lâm, Tà Nung gŭ kâp njrăng pĭch rlâm, kol khan đŏng. Gay nkra uĕh tay, mât dơi trong me kruanh rđău kan n’gor Lâm Đồng ndrel ăp n’gâng kan dơi kan bol tâm rnôk mih dak bŭk, pĭch rlâm neh nha hôm geh măt ta ăp njăr trong đŏng, rgum lĕ rngôch mpôl kan, ndeh rklư gŭ krêp nkre ta ăp njăr trong, ăp sop nkue mhe nkra lôch, nkre rdâk njêng trong nchrăp ƀư an nâp uĕh jŏ jong tĭng ntŭk pĭch rlâm. Wa Nguyễn Hồng Hải, Groi kruanh UBND n’gor Lâm Đồng rnôk gŭ ta ntŭk pĭch rlâm tâm ban kơt ăp rơh hop ndăn tâm măng nchŏng luh na nê̆ tĭng nău nchiăng khan mpăng đêt, nkô̆ jêng tât pĭch rlâm neh n’hanh trong nkra bah đŏng:

“Sop Frenn ƀư lôch jêh hôm ma aƀaơ an rsong hăn hôm ma ntoh luh tay dŭt âk nkô̆ nău đŏng. Mô geh mpir nking jêng soih rhung jŭr trong. N’hong dak sor njok ƀư n’hong jĭr âk gâl dak mô dơi hoch lăp tâm n’hong dak sor lah dak hoch ler brŏng dak bah dâng. Ntơm bah ăp nău geh kơt nê ntrŏng năl trong nkra ƀư an tâm di. Lor nchrăp tâm pă nău dơn kan mât uănh ăp nkual, mât uănh ăp ntŭk geh ma nău pĭch rlâm gay lor nchrăp tâm rnôk nkra ƀư, uănh năl lor, tâm, bah kơi rơh dak bŭk”.

Tâm rnôk mih dak bŭk, pĭch rlâm neh rgum âk ndal, lam ăp ntŭk, nsrôih bah n’gâng kan ta ntŭk n’hanh n’gâng kan dơi kan n’gor Lâm Đồng tâm nău mât đăp mpăn hăn ntung trong dơi nuĭh ƀon lan rnê dŭt âk. Nô Trần Văn Hoàng, phố Nhà Chung, phường Xuân Hương- Đà Lạt, an gĭt:

“Gâp saơ cảnh sát giao thông dja, tât tahen, mpôl dân quân tự vệ ntop kơl an nuĭh ƀon lan dŭt uĕh ngăn. Mpôl kan dơi kan mơ̆ mih sial pah kan dŭt geh nău tam ngăn, dŭt jăp uĕh”.

Wa Hồ Văn Mười, Kruanh UBND n’gor Lâm Đồng, lah rjăp:

“Tâm rơh mih dak bŭk mhe aơ ta n’gor geh ăp nău tât mbro lơn lah ta ăp njăr trong geh pĭch rlâm mbro. Lam trong kan chính trị lăp kan dŭt jăp n’hanh lơn lah bar mpôl tahen n’hanh công an. Ăp njăr trong he ân mbluh soih dŭt ơm mô an geh kol khan hăn sĭt Đà Lạt lơn lah sop Mimosa n’hanh Frenn. Kruanh rđău kan, n’gâng kan Trung ương rnê âk. Sop Mimosa ƀư dŭt jăch ndăn mô hŏ tă geh tâm 8 nar he ƀư lôch an mbluh ndeh trong dja. Bộ Xây dựng hŏ kơp dơn nâp uĕh n’hanh uănh năl kỹ thuật dŭt uĕh lôch rnôk mbluh hăn ndeh”.

Tâm ăp nar mih dak bŭk mhe aơ, nău lăp kan lĕ n’hâm suan bah n’gâng kan n’gor Lâm Đồng ndrel nuih n’hâm dơn kan, mô kă rnam măng nar bah mpôl kan dơi kan, công an, tahen hŏ rgop mât nâp an trong me bah n’gor dơi mbluh soih. Năl trôk nar lơh nar lơn ma krit nji, jêr nchroh gĭt lor, ndrel đah ndăn nkra bah khuch khat gay đăp mpăn ntung trong rsong hăn mbluh soih, n’gor Lâm Đồng dôl ngăch geh ăp trong nkra na nê̆ gay rdâk njêng ăp njăr trong dja nar lơn ma nâp uĕh, đăp mpăn lơn.