Ndrel nar (30/12), Thủ tướng Phạm Minh Chính ƀư tơm rƀŭn nchră mât uănh jăp mbơh ƀư ăp Nghị quyết bah Quốc hội mpeh rơih jăng wăk kol đah ăp nău nchrăp ƀư n’hanh bôk nău kan rƀŏng tĭng lam dak ndâk njêng thôn ƀon mhe, n’hŭch ach o nâp nâl n’hanh hun hao wăng sa rêh jêng nkual ƀon lan rnoi mpôl đêt n’hanh nkual yôk. Mbơh ƀư Nghị uyết bah Quốc hội, tât aƀaơ lam dak lĕ rơih jăng n’hanh geh trong nchrŏng rơih jăng an 5.200 nău nchrăp ƀư, neh ntu đah 70 rbăn ha lĕ dơi ndơ̆ an dŏng...

Ta rƀŭn nchră, Thủ tướng Phạm Minh Chính an lah, aƀaơ lam dak hôm e bơi 3000 nău nchrăp ƀư jêr jŏt, wăk kol. Ăp n’gâng kan, nău kan, ƀon lan ndăn dăn đă trong nchrŏng, trong rơih jăng, mbơh kloh mpeh nău dơi mkra. Geh tât nău mbơh ƀư bôk nău kan rƀŏng tĭng lam dak, Thủ tướng đă N’gâng kan tuch tăm mât rong n’hanh ntŭk ntô gŭ âm ndăn ndâk ƀư samƀŭt mbơh mĭn njêng di, an nău ntrŭnh ntuh kơl Bôk nău kan rƀŏng tĭng lam dak lvang 2026-2030, tâm khay 1/2026, tĭng nkô̆ nău tâm pă gưl, pă nău dơi têh ngăn an ăp ntŭk. Rgum ndâk njêng bôk nău kan, trong nchrăp ƀư tĭng geh khlay, tâm di đah nău geh ngăn bah tĭng nkual, tĭng ntŭk; dêr âk hvi, ƀư dơm, kơl lor ntŭk dŭt jêr jŏt; rgum ndâk ƀư ăp ntrong kan nâp nâl, hao jêng kloh uĕh n’hanh tâm rgop trong khlay; Rgum rgâl nău mĭn, n’hao nău wât, ntrŭt đă, ntrôl an nuĭh ƀon lan janh rklaih ach o, tâm rlong ƀư ndrŏng.