Uănh khlay pah kan nkoch trêng nkre đah nău hăn rsong hăn nkra rmal ăp nuĭh tih, nê lah ăp trong nkra ma công an n’gor Dak Nông dôl ntrôl  dăng an ƀư  gay tĭng ƀư geh nău tam nău  ntrŭnh mbrô 31 nar 21/12/2023 bah Thủ tướng Chính phủ mpeh n’hao dăng pah kan mât đăp mpăn hăn ntung trong an kon se nti tâm nô nău mhe.

Ta nâm n’hâm tơm si bah meng trong Quốc lộ 14, bah năp nhih nti Trung học phổ thông Quang Trung, xã Đắk R’la, nkuâl Dak Mil, n’gor Dak Nông, ăp tahen công an dôl rsong hăn uănh nău tĭng jăp đăp mpăn hăn ntung trong đah ăp kon se nti ƀĭt ndeh honda.  Ta aơ, ndrel đah nău ôp uănh, công an ntĭm nti, nkah ăp kon se tĭng jăp luật hăn ntung trong đŏng. Oh Nguyễn Anh Trung, kon se nti jrô 12A6 nkoch:

“Ăp kônh công an way hăn ôp uănh gay der ăp nău tih ri dŭt uĕh di ngăn. Ăp kônh sek uănh ndeh, ban saơ n’hanh rmal năn ngăch ăp nău tih”.

Bah năp rơh hăn ôp uănh,  mpôl công an hŏ tât nhih nti THPT Quang Trung ƀư nkoch trêng, phăt lha siƀŭt mbơh gĭt lam quy định bah pháp luật mpeh đăp mpăn hăn ntung trong đŏng. Công an kan nsum đah nhih nti ra uănh tay, ôp uănh ngăn geh ta jay an ndeh bah nhih nti n’hanh ăp ntŭk an  ndeh wăr, nhih nti, nkoch trêng, nkah kon se nti mô dŏng ndeh honda geh dung tích xi-lanh rlău 50 cm3 rnôk mô hŏ tŏng năm deh tĭng quy định. Lôch rnôk ton tĭng jăp Luật hăn ntung trong, oh Trần Thị Thu Thanh, jrô 12A1, an gĭt:

“Gâp saơ dŭt ngăn ngăn n’hanh nkô̆ khlay rnôk kơl mpôl hên  kơi ntop tay geh âk nău gĭt mpeh quy định đăp mpăn hăn ntung trong; n’hanh bah nê ri  njrăng der dơi ăp nău tih dơh geh rnôk hăn ntung trong.”

Nai ntĭm Nguyễn Văn Ngọc, Hiệu trưởng Nhih nti Trung học phổ thông Quang Trung an gĭt, nhih nti gŭ ta meng trong Quốc lộ 14, ntŭk geh âk ndeh rklư rsong hăn  jêng rŭ hôch geh ma nău tâm tom ndeh âk. Nhih nti kan nsum đah ăp mpôl kan dơi kan way nkoch trêng gay kon se nti gĭt tĭng jăp ăp quy định rnôk râng hăn ntung trong:

“Bôk năp lah nhih nti hŏ an ăp kon se ký ton, tâl bar lah way tĭng groi nđôi nău tĭng ƀư di quy định; n’hanh way nkah ăp kon se tâm ăp rơh sinh hoạt ăp pơh đŏng. Ăp năm ri nhih nti kan nsum đah n’gâng kan công an ƀư bôk nău kan bah dih mông nti an ăp kon se joi gĭt mpeh luật hăn ntung trong gay đăp mpăn rnôk râng hăn trong.”

Tâm bah ri aơ nơh, mpôl cảnh sát ntung trong Dak Nông hŏ nkoch trêng mbro ntĭm nti pháp luật mpeh ntung trong đah kon se nti ăp nhih nti ta n’gor. Thượng tá Phạm Quốc Lập, Kruanh Jrô kan Cảnh sát giao thông - Công an n’gor Dak Nông, an gĭt, ndrel đah nău way hăn rsong uănh mbro, rmal lhăt ăp nuĭh tih, đơn vị ntrŏng pah kan nkoch trêng n’hao nău gĭt êng, tĭng jăp pháp luật nha hôm lah trong nkra dâk bôk năp gay đăp mpăn hăn ntung trong geh tât kon se nti đŏng:

“Mpôl cảnh sát ntung trong lor nchrăp kan nsum đah Ban đăp mpăn hăn ntung trong n’gor nkoch trêng âk ta ăp nhih nti, ta năp măt lah ta ăp nkual rgum âk nuĭh rsong hăn njok trong Hồ Chí Minh, ta trong Quốc lộ 28 n’hanh nklang ăp nkuâl, nkual ƀon têh bah n’gor Dak Nông. Tâl  bar lah lor  nchrăp kan nsum đah ăp nhih pah kan nkoch trêng tât me bơ̆ kon se nti mô jao ndeh an oh kon se rnôk mô hŏ tŏng năm ƀĭt ndeh. Ndrel đah nê ri an ƀư pah kan nkoch trêng  tât ăp nkual jru nkual ngai n’hanh đăp mpăn rdâk njêng dơi ăp trong ntĭt leo ta mpông nhih nti đăp mpăn hăn ntung trong ta lam n’gor./.