Lơ 17/3/2023, Thủ tướng Chính phủ uănh an nău ntrŭnh mrô 257 mpeh nkra rgâl lĕ rngôch dăp rgum nsum nkual ƀon têh Đà Lạt, n’gor Lâm Đồng n’hanh nkual kiău ma tât năm 2045. Aơ lah trong nchrŏng dăp rgum jŏ jong mpeh ndâk ƀư mông nar, ê nkra ntŭk ntô, mkra ăp nău jêr aƀaơ ma Đà Lạt dôl mâp, rƀŏng tât ndâk njêng n’hanh ƀư đăp mpăn, jŏ jong, joi ăp nău geh, têh âk ntĭt mpơl êng bah Đà Lạt. Tâm nĕ, ndrel đah ăp nău khlay mpeh măt văn hóa, pâl nđaih, drăp ndơ ngih wâl, ntŭk ntô, nkual ƀon têh tâm bri-bri tâm nkual bnon têh lah nkô̆ nău rêh tay an dơi mât ndrăy, hun hao Đà Lạt jêng nkual ƀon têh uĕh nđĭr mpeh tâm trung ương.

Đà Lạt bah jŏ lĕ jêng nkual ƀon têh pâl nđaih, rlu rlău ntoh lư, dơi âk nuĭh gĭt tât ăp săk moh êng kơt “Nkual ƀon têh tŭk lêm”, nkual ƀon têh rbăn tơm n’ho”, Nkual ƀon têh rbăn nkao”, “Nkual ƀon têh Paris jêt”... Ndrĭ yơn, yor jêr jŏt hun hao ngăch bah nkual ƀon têh tâm đêt rach năm plơ̆ ma aơ lĕ ƀư âk nău khuch, mô geh nâp nâl an Đà Lạt. Tâm nĕ, âk nău hôm e aƀaơ dơh saơ nĕ lah nău kol ndeh tĭng ntŭk, dak băm rnôk bri mih, tŭk lêm đêt tay, ndơ ƀư drăp ndơ geh rŭn in, uĕh nđĭr nkual ƀon têh jêt tay...

Tĭng kiến trúc sư Ngô Viết Nam Sơn, nuĭh an âk năm mĭn njêng mpeh nkual ƀon têh Đà Lạt, âk nău khuch mô uĕh aơ an uănh tât rnôk mĭn njêng nkra rgâl dăp rgum nsum nkual ƀon têh Đà Lạt n’hanh nkual kiău ma tât năm 2045. Ngăn lah an pơk hvi ntŭk ntô hun hao gay mât ndrăy n’hanh nkra uĕh nkual ƀon têh hôm e aƀaơ, hun hao Đà lạt tĭng trong nkual ƀon têh uĕh nđĭr. Kiến trúc sư Ngô Việt Nam Sơn mĭn lah.

Tâm nkual ƀon têh aƀaơ bê tông bơi lĕ hôm, ntŭk ntô uĕh nmđĭr hôm e đêt jêng trong kan aƀaơ lĕ rngôch ăp ntŭk ntô uĕh nđĭr hôm e đêt an mât njrăng pơng đah ăp ntil nău. Tal 2, an hun hao nklang nkual mhe, aơ lah du ntŭl rlong dŭt têh an Đà Lạt, an Lâm Đồng. Bah jŏ lah mât ndrăy drăp ndơ yơn ndơ lơh he mô dơi ƀư, yor he mô geh nkual ƀon têh mhe êng. Gâp mpŏng mbơh ntĭm dăp rgum rơh aơ mbra ƀư kloh nău aơ.

Tâm ban nău mĭn, kiến trúc sư Trương Văn Quảng, Rmôt kan dăp rgum hun hao nkual ƀon têh Việt Nam an lah, bah năp nău nkual ƀon têh rgâl dôl geh têh kơt aƀaơ, nău săch ntrong kan hun hao nkual ƀon têh Đà Lạt đăp mpăn tâm ban hun hao ntŭk ntô, bri dak, ngih wâl lah dŭt khlay n’hanh khlay ngăn. An uănh tay nkual tuch tăm, rêh tay hun hao tâm n’ho ta ntŭk n’hanh ƀư têh tay ngih wâl nkual ƀon têh tâm bri, bri tâm nkual ƀon têh.

Mât njrăng n’hanh mât tay ngih wâl nkual ƀon têh tâm bri, bri tâm nkual ƀon têh ri nău aơ an lah dŭt khlay, jêr mô di lah mô dơi ƀư. Tĭng nkô̆ nău nĕ he mbra dơi geh an ntô̆ n’hao ăp nău khlay tơm, ntoh lư tâm ngih wâl nkual ƀon têh Đà Lạt n’hanh nkual kiău ma an jêng du nkual ƀon têh drăp ndơ yău, pâl nđaih têh lam ntŭr neh.

Tĭng kiến trúc sơ Trần Ngọc Chính, Kruanh Rmôt kan dăp rgum hun hao nkual ƀon têh Việt Nam, gay mât ntĭt mpơl uĕh êng bah Đà Lạt tĭng năm khay, rƀŏng tât rnoh ndơ hao jêng uĕh nđĭr n’hanh rdâng đah rgâl trôk nar, dŭt ŭch geh du trong rƀŏng jŏ jong, nkre ăp trong ƀư nău kơl êng n’hanh tâm ban.

 Aƀaơ ŭch mât Đà Lạt ri an m’hâm ƀư? Lah ndâk ƀư tĭng trong ƀư roh ntŭk ntô, bri dak mô lah mât âk ri hôm e geh lah Đà Lạt tay đŏng? Ngoăy tâm âk nkual ƀon têh prêh ta lam ntŭr neh, prêh 1.500m nkôp đah rnoh dak lêng yơn mih hôm e băm ri nău nĕ he an ƀư kloh, tĭng nkô̆ nău nĕ hăn jru tâm nău dăp rgum nsum. Đà Lạt uĕh yor Đà Lạt tâm bri-bri tâm tâm Đà Lạt, ŭch dơi mât Đà Lạt ri he an geh dăp rgum.

Nău kan nkra rgâl lĕ rngôch dăp rgum nsum nkual ƀon têh Đà Lạt n’hanh nkual kiău ma lĕ dơi Thủ tướng Chính phủ uănh an ta Nău ntrŭnh 257, lơ 17/3/2023. Tĭng nĕ, têh hvi, n’har neh n’hanh têh hvi mĭn njêng geh lĕ rngôch n’har neh hành chính Nkaul ƀon têh Đà Lạt n’hanh ăp nkuăl Lạc Dương, Đơn Dương, Đức Trọng n’hanh du đêt nkuăl Lâm Hà, pơk hvi tĭng mpeh bah prêh 850m let lơ nkôp đah rnoh măt dak lêng; rnoh neh n’har bri dăp rgum hao tât 336 rbăn ha, âk rlău 10 tơ̆ rnoh neh Đà Lạt aƀaơ.

Wa Phạm S, Groi Kruanh UBND n’gor Lâm Đồng an gĭt, aơ lah trong nchrŏng dăp rgum jŏ jong mpeh ƀư ntŭk ntô, ngih wâl tâm nkual ƀon têh, tâm nĕ geh nău kan mkra ăp nău hôm e bah rnôk ƀư dăp rgum dơi uănh an. Aƀaơ Lâm Đồng dôl djăt ăp nău rgop, kơl n’gor tŏng nu nău n’hanh nkô̆ nău dăn đă trong ƀư, nău kơl êng an Đà Lạt.

Đà Lạt geh 3 nău dŭt têh tâm ban lam ntŭr neh, bôk năp lah prêh, tal 2 lah têh hvi rnoh neh, tal 3 lah rnoh nuĭh ƀon lan đêt, nklăp 68 nuĭh/km2. 3 nău aơ nău an pơk hvi hun hao rmeh neh dŭt têh tât đah nkual ƀon têh Đà Lạt tâm rnôk ndâk ƀư nkual ƀon têh, rgâl trôk nar n’gluh an tâm năm tât. N’gor Lâm Đồng djăt nău rgop bah ăp nuĭh way kan, ăp nuĭh khoa học geh nău ŭch đah Đà Lạt, hăn ndrel đah Đà Lạt-Lâm Đồng gay ndâk njêng Đà Lạt tâm rgŏ năp jêng nkual ƀon têh đẳng cấp, lah nklang nkual ƀon têh rlu rlău ngih dak n’hanh lam ntŭr neh tâm di rgâl trôk nar mih sial, nkual ƀon têh uĕh nđĭr.

Âk năm bah năp, Đà Lạt lĕ hun hao di trong nchrŏng an dăp rgum nsum lĕ dơi Thủ tướng Chính phủ uănh an ta Nău ntrŭnh 704, lơ 12/5/2014 n’hanh lĕ dơi geh âk nău ntoh lư lĕ rngôch ăp ntil. Yơn lah, nău hun hao nkual ƀon têh n’gluh an âk nău an mkra kơt: rmoh nuĭh ƀon lan n’hanh rnoh năch nar lơ hao tâm rnôk nkual ƀon têh mô hŏ dơi mĭn njêng pơk hvi ntŭk ntô nkual ƀon têh; mô tŏng nău tâm rgop đah ăp nkual ƀon têh ta nklang n’hanh ăp nkual ƀon têh kiău ma; ăp nău geh, nău dơh mô hŏ joi ƀư... Mpŏng jêh rơh nkra rgâl dăp rgum aơ mbra kơl jêng âk njoăt hăn mhe, kơl Đà Lạt hun hao tâm di n’hanh mât ndrăy geh ăp nău uĕh êng bah nkual ƀon têh pâl nđaih rlu rlău gưl prêh, nkual ƀon têh uĕh nđĭr ta cao nguyên Lâm Viên./.