Tâm rnôk Việt Nam rƀŏng tât nău ŭch mô hôm geh nsuuk djơh tâm năm 2050, điện hạt nhân dơi ăp nuĭh ntoh măt uănh năl kơt du tơm điện công suất têh, dŏng đăp mpăn n'hanh geh rnoh nsuk djơh đêt. Tơm điện aơ mbra rgop đăp mpăn công suất n'gâng tơm an trong điện, nkre ntop kơl ăp tơm ŭnh nar sĭt jêng geh nău rgâl kơt điện sial n'hanh điện măt nar.

Ngoăy tâm ăp nkô̆ nău dơi uănh khlay ta rƀŭn nchră lah săch công nghệ n'hanh đăp mpăn. Ăp nuĭh rnâng kan tâm nchră mpeh ăp rơh lò phản ứng mhe, lò phản ứng mô-đun jê̆ n'hanh nău tă ơm gĭt lam ntŭr neh, tă bah nĕ ntop tay ntŭk nsing khoa học an nău săch công nghệ tâm di đah nău geh Việt Nam. Tiến sĩ Trần Chí Thành, Viện trưởng Viện Năng lượng nguyên tử Việt Nam, an gĭt:  "Tĭng nău mĭn bah gâp n'hanh ăp nuĭh ƀư gŭ mĭn tâm trong kan gŭ mĭn đăp mpăn, gâp saơ nău nchrăp ƀư bah Nga, na nê̆ Rosatom, lĕ dơi dak he săch dŭt lah uĕh, lĕ mbơh ƀư ta âk dak. Geh dŭt âk trong đăp mpăn, mpôl hên an gŭ mĭn na nê̆, dŭt đăp mpăn, dŭt uĕh. Aơ lah nău nchrăp ƀư dŭt uĕh, nkre geh đăp mpăn ndal, nkre đăp mpăn nchrăp lor, đăp mpăn dơi bar pe jât năm pơk dŏng".

Mô knŭng lah nău nkoch mpeh du tơm điện mhe, hun hao điện hạt nhân hôm ndơ̆ luh nău đă rdâk njêng nău dơi ngih dak. Nĕ lah ntĭm nti rmôt nuĭh way kan, kỹ sư n'hanh nuĭh kan kỹ thuật uĕh blău; n'hao nău dơi gŭ mĭn, mât uănh, ndâk ƀư, nkra njêng, ndâk ƀư, mât dŏng n'hanh mât uănh; nkre ntrôl jao an nău gĭt blău, tĭng kơn jêng n'hanh hun hao công nghiệp ntop kơl tâm dak.

Đah Khánh Hòa, ntŭk mbơh ƀư ăp nău nchrăp ƀư Ngih măy điện hạt nhân Ninh Thuận 1 n'hanh Ninh Thuận 2, ăp nău ŭch aơ nkre đah rnôk nchrăp bah ta ntŭk. Ndrel đah pah kan ntrơn du, ntop tay nuĭh kan n'hanh nchrăp ntung trong, du nău dơi uănh khlay lah đăp mpăn nău dơi n'hanh nău rêh jŏ jong bah nuĭh ƀon lan tâm nkual nchrăp ƀư. Wa Trịnh Minh Hoàng, Groi Kruanh UBND n'gor Khánh Hòa, lah rjăp:

"Ăp ndơ ƀư ntung trong rhŏ dŏng an nău nchrăp ƀư ân dơi gŭ mĭn tĭng trong âk ntil nău kan, nkre đăp mpăn nău ŭch geh bah ngih măy nkre njêng nău dơi hun hao an mpeh bah dâng n'gor n'hanh rhŏ dŏng jŏ jong an nuĭh ƀon lan. Ntrơn du ntŭk gŭ mhe nkre đah nta joi nău rêh, nău kan, ntĭm nti, ntĭm nti nău kan, dak si rhŏ dŏng nău rêh jêng tâm ban. Nău dơi bah ntrơn du ntŭk gŭ mhe mô dơn dơi kơp tĭng rnoh ngăch jao an neh ma hôm tĭng rnoh uĕh nău rêh n'hanh nău dơi hun hao bah nuĭh ƀon lan jêh tât ntŭk gŭ mhe".

Bâh nău nkoch điện hạt nhân mbra saơ, nău ŭch hun hao tâm rơh mhe mô dơn gŭ ta nău geh tay điện. Nĕ hôm nha lah nău kơl ƀư tơm khoa học công nghệ, rdâk njêng nuĭh kan, hun hao công nghiệp tâm dak, n'hao ndơ dŏng n'hanh njêng ăp nău nsrôih hun hao mhe an ăp ntŭk.

N'glôch jêh tâm nchră, wa Ngô Đông Hải, Groi Kruanh Ban Tuyên giáo Trung ương, uănh lah rlău 19 nău tâm nchră n'hanh ăp nău rgop tâm nchră, ăp đại biểu lĕ rgum ƀư kloh nău khlay bah điện hạt nhân, nău đă mpeh công nghệ, nuĭh kan, ndơ dŏng n'hanh trong kan mbơh gĭt nău lư, nkoch trêng. Hun hao điện hạt nhân yor kơt nê̆ dơi ndơ̆ tâm du nău mĭn nsum, bah đăp mpăn tơm điện, đăp mpăn lam trong kan tât rdâk njêng nău dơi ngih dak, hun hao ta ntŭk n'hanh njêng nău tâm ban ŭch lam rêh jêng kon nuĭh. Wa Ngô Đông Hải lah rjăp: "Ăp tập đoàn wăng sa ân tâm rgop rjăp tay, râng ƀư lôch jêh ntŭk nsing khoa học, ntŭk nsing pháp lý, nchrăp tơm nuĭh kan uĕh blău, ntŭk ntô ndơ dŏng gay nchrăp râng tâm trong nchrăp ƀư di trong rƀŏng, đăp mpăn lhăt jăp. Lơn lah, râng dŭt n'hâm tâm nkoch trêng, ăp nău mbơh khoa học công nghệ ân dơh wât đah nuĭh ƀon lan".

Điện hạt nhân, tâm trong tât kan aơ, mô knŭng lah nău nkoch bah n'gâng kan ŭnh nar. Nê lah du gâl tâm rnôk Việt Nam lor nchrăp rdâk njêng jâng nsing an du rơh hun hao mhe - ntŭk khoa học công nghệ, tơm nuĭh kan uĕh blău âk n'hanh nău dơi ƀư tơm ăp công nghệ têh jêng suan ntrôl khlay gay neh dak hun hao uĕh nđĭr, đăp mpăn rnă njrăng ŭnh nar n'hanh hao jêng têh dăng tâm rach năm mhe.