Lễ hội Sầu riêng Dak Lak năm 2026 hŏ ƀư ntơm bah nar 15/8 - 2/9 đah 18 nău kan tơm n’hanh rlău 40 nău kan n’grŏ tĭng nkre. Tâm rnôk dja, n’gor Dak Lak wơt nklăp 750.000 tơ̆ năch pâl nđaih, tâm nê rlău 275.000 tơ̆ năch manh gŭ nde, lĕ rngôch nsĭt geh pâl nđaih bơi 1.300 rmen prăk.

Wa Trần Quốc Toàn, Groi Giám đốc Sở Công Thương n’gor Dak Lak an lah, lễ hội hŏ ntik n’hao dơi buăt nthoi – tâm boh ndơ tăch rnôk geh 9 siƀŭt hŏ dơi ký ton geh tât kho nđik, logistics, nkret njêng jru n’hanh hun hao rêng ndơ tăch, lĕ rngôch rnoh khlay bơi 9.000 rmen prăk. Yơn lah, n’gor ân uănh năl tât ring tam ngăn bah siƀŭt ký ton tâm boh.

“Ăp siƀŭt nchih nkah dơi ký ton ta Lễ hội hŏ pơk luh trong tâm boh, yơn lơn âk mhe n’glĕ ta nău tâm ton bôk năp dơm. Lôch jêh an ƀư ngăn ngăn, rnoh âk tâm ton, ndơ bu dăn rvăt n’hanh rnoh khlay tăch rgâl ntoh luh lôch jêh buăt nthoi ân dơi tĭng groi nđôi tay, rgum lĕ n’hanh uănh năl. Tâm ban kơt nê đŏng, nău kan ntrŭt ntrôl ngăch ta ăp ntŭk keh mbrô lah dơn rgum tâm ăp nar bah Lễ hội tơm nê dơm mbra jêr jêng trong tăch rgâl mbro, đăp mpăn. Jêng, tĭng Sở Công Thương, lôch Lễ hội ân rgâl dăng bah ‘ntrŭt ntrôl ngăch tĭng nar ƀư’ jêng ‘ntrŭt ntrôl ngăch nkre đah ntŭk tăch rgâl n’hanh lôch geh tăch rgâl’”.

N’glôch jêh tâm nchră, wa Đào Mỹ, Groi kruanh UBND n’gor Dak Lak, Kruanh Mpôl tơm ƀư lễ hội đă ra uănh tay ăp tŏng ăp mpăng đêt, n’hao nău way blău kan n’hanh nău dơn kan nsum tâm ăp rêng ƀư. Nău nchrăp đề án lễ hội năm 2028 ân dơi ƀư ơm lơn, tâm pă kloh nău dơn kan n’hanh lor nchrăp tơm ndơ, lơn lah tâm nkơnh n’hơ, tăch ndơ geh ƀư.

“Nsrôih tâm ôp, nkoch mbơh, buăt nthoi ăp ndơ geh ƀư, du ding nkoch mbơh nkơnh n’hơ ta ntŭk ndranh tăch rgâl điện tử, yơn lah ân mât mbro trong nkơnh n’hơ n’hanh tăch rvăt ndơ geh ƀư tĭng trong ơm đŏng. Gâp dăn đă Mpôl tơm ƀư, nhih pah kan djăt na nê̆ nău rgop, tâm rkhăch n’hanh nsŏng kơl ăp sở n’hanh ăp xã lôch jêh siƀŭt mbơh lôch nê nsŏng kơl an Ủy ban n’gor n’hanh ăp nău dăn đă an nău kan lễ hội năm 2028”