Bu klô kon hŏk Nguyễn Đức Danh (12 A1, Ngih sam ƀŭt THPT Lương Thế Vinh, nkuăl Kbang, n’gor Gia Lai) lah ngoăy tâm 8 nuĭh ƀon lan mom, ntoh lư bah n’gor Gia Lai năm 2023. Ta nsưng nghih sam ƀŭt, oh lĕ geh 4 đề tài khoa học kỹ thuật geh giải têh da dê. Tâm nĕ, đề tài kơt dŏng AI tâm nău ntop kơl  groi nđôi n’hanh mât uănh ngih sam ƀŭt geh giải nhất rơh tâm rlong tin học mom n’gor Gia Lai rơh tal 17-2023, giải nhì rơh tâm rlong tin học mom nkual miền Trung-Tây Nguyên n’hanh giải khuyến khích lam dak. Nguyễn Đức Danh lah nuĭh ntoh lư ntrong leo nti n’hanh ƀư tĭng nău mĭn nău rêh Hồ Chí Minh bah n’gor Gia Lai.

Đah nău ƀư lah du hê ủy viên ban chấp hành đoàn ngih sam ƀŭt, oh nsrôih râng mro ăp ntrong leo nău kan. Lah du hê kon hŏk ri oh mĭn nău nti n’hanh săk rnglăy nti nsơm lah khlay ngăn. Dơi geh âk nău geh uĕh tâm nti nsơm nkre lah kon gơih blău Wa Hồ na nê̆ nău uĕh ngăn n’hanh geh nkô̆ ngăn gay rgŏ năp jêng nuĭh ƀon lan rgop ndâk njêng neh dak.

Dŭt âk nău ŭch nsơr, yuh Nguyễn Hoài Phương-Bí thư Đoàn TNCS Hồ Chí Minh nkuăl Chư Păh, n’gor Gia Lai lĕ ndrel druh ndăm ta ntŭk dŭt n’hâm ndâk njêng thôn ƀon mhe n’hanh đăp mpăn nău rêh jêng. Tâm nĕ, ntoh lư lah trong druh ndăm geh ŭnh ang n’hanh camera rnă njrăng ta ƀon Phung, xă Ia Mơ Nông. Ndrel đah nĕ lah 5 mlâm jay tâm rŏng n’hanh âk ntrong kan joi nău rêh kơl ăp oh kon se kon đơi nuĭh rnoi mpôl đêt. Yuh Nguyễn Hoài Phương an gĭt:

Lah du hê bu ur kruanh đoàn, gâp nsrôih mro nău nti tĭng wa bah ăp nău jêt ngăn, dơh ngăn. Tâm năm bah năp, gâp n’hanh đoàn viên druh ndăm ƀon lan râng lôch jêh rlău 550 gưl kan, ndơ ƀư druh ndăm, đah dĭng lĕ khlay rlău 8,5 rmen prăk. Mpôl hên an lah ntŭk ntô dơh gay druh ndăm dơi tiăr nti, nsơr soan n’hanh têh jêng.

Bah năm 2021 tât aƀaơ, ta n’gor Gia Lai geh 235 nuĭh mom dơi rnê rhơn lah druh ndăm ƀư tĭng nău wa. Nô Đỗ Đức Thanh-Groi Bí thư Đoàn TNCS Hồ Chí Minh n’gor Gia Lai an gĭt, tâm ăp rơh tâm rlong kơt: druh ndăm kơl kan, druh ndăm mĭn ƀư mhe, druh ndăm xung kichs mât njrăng neh dak, druh ndăm rdâk njêng nău kan... dŭt âk druh ndăm lĕ ƀư âk lĕ n’hâm soan nsơr an, nuih n’hanh hăn lor mât uĕh soan mom nti, pah kan, hun hao wăng sa rêh jêng.

 Nău pơk hvi ăp nuĭh ntoh lư, ntrong kan, trong ƀư uĕh ngưay tâm âk nău kan ƀa ƀơ. Mpôl hên ƀư tĭng nti n’hanh ƀư tĭng nău mĭn, nău rêh, pah kan Hồ Chí Minh. Tă bah nĕ mbra nta an mông nar nti nsơm ndrel jêng ăp nuĭh mom hăn lor geh uĕh an nău rêh jêng.

Bah ƀư tĭng trong kan nkoch trêng, ntrôl dăng nti n’hanh ƀư tĭng nău mĭn, nău rêh, pah kan Hồ Chí Minh an rơh druh ndăm ta n’gor năm bah năp, Ban Thường vụ n’gor đoàn Gia Lai mĭn du đêt trong mkra gay n’hao uĕh nâp nti n’hanh ƀư tĭng Wa tâm năm tât. Ăp năm ndâk njêng trong nchrăp ƀư tĭng chuyên đề bah n’gor, ƀư rơh rgum rƀŭn chính trị đah bôk nău “Nkah gĭt tât wa-Nuih n’hâm he kloh ang lơn” tâm rơh nkah gĭt nar deh Wa. Mbơh ƀư bôk nău kan “Mpoh ang nău ŭch druh ndăm Việt Nam”, ƀư rnê rhơn druh ndăm gĭt blău ƀư tĭng nău wa ăp gưl, rnê rhơn druh ndăm ntoh lư ta ăp ntil nău. Ntrôl dăng ƀư tĭng rgŏ jă “Du nar du nău uĕh, du pơh du nău nkoch uĕh” ta ăp trang he nơm, fanpage bah ăp gưl bộ Đoàn, Hội. Rgum mbơh ƀư trong nchrăp bah Ban Thường vụ N’gor đoàn mpeh nău pơk hvi nuĭh uĕh ang, nău nkoch uĕh nti n’hanh ƀư tĭng nău mĭn, nău rêh, pah kan Hồ Chí Minh bah aƀaơ tât năm 2027./.