Ta duh r’ôl bah yan wai, wa Lê  Hùng, ta tổ 4, thôn Tiến Cường, xă Quảng Tiến, nkuăl Cư M’gar, n’gor Dak Lak dơh pơk mbôi dak bah trạm pơk dak tŏ n’gân n’gul mir gay tŏ rơh tal 3 an mir cà phê. Trong dak hao âk tĭng dĭng nglăp ơm, tŏ tât tĭng tơm cà phê, sầu riêng n’hanh tiêu. Wa Hùng an gĭt, âk năm tuch tăm, aơ lah năm bôk năm wa nơih n’gul yan wai. Âk năm bah năp, rnôk aơ, rnăk wâl wa ŏk r’ah dô̆t rhiăng mét dĭng dak hăn dak diăng, jêh nĕ kâp dak gay tơ̆ an tơm tăm. Yơn năm aơ, dak sĭt tât mir wa Hùng dŭt rhơn:

Bah năp mpôl hên dŏng tu dak diăng ri rnôk geh rnôk mô, mô tŏng dak dŭt ŏk r’ah. Yơn nar aơ trong dak sĭt đăp mpăn. Knơm tu dak pă sĭt an nuĭh ƀon lan mpôl hên, saơ tơm cà phê, tiêu, sầu riêng tŏ geh tŭ dak aơ ri uĕh nđir. Nuĭh ƀon lan mpôl hên dŭt rhơn.

Rhiăng rnăk ƀon lan ta thôn Tiến Cường, xă Quảng Tiến dôl rhơn yor dak nău nchrăp ƀư sĭt tât mir, ngăn lah năm aơ, yan wai duh hô, nău ŭch dak tŏ dŭt ji nuih. Wa Phan Phụ ta tổ 1, thôn Tiến Cường, an gĭt, nău jêr ngăn lah tŏ lĕ dơi mkra, kônh wa lĕ dơi kơp tât nău ntuh kơl tâm pleh tơm tăm gay nsĭt tay săk rnglăy âk lơn.

Aƀaơ ngih dak ntuh kơl tu dak aơ ƀon lan ăp nuĭh rhơn da dê. Dŭt dơh an nuĭh ƀon lan, yor aƀaơ dŏng dak ta jay dơm, djăt pơk khóa lah tŏ, dŭt dơh an kônh wa. Ma lơn lah tơm sầu riêng tâm năm ƀư play ri ŭch dak na nao, 3 nar an tŏ 1 tơ̆.

Uănh trong dak hoch tât mir bah nuĭh ƀon lan, wa Vũ Đức Côn, Groi Giám đốc N’gâng kan tuch tăm mât rong n’hanh hun hao n’gor Dak Lak, ntoh măt nuĭh ntuh kơl nău nchrăp ƀư pă dak tơ̆ thôn Tiến Cường rhơn răm ndrel kônh wa. Yơn, bah kơi năm răm, hôm e nĕ lah âk nău rvê nău nchrăp ƀư aơ. Wa Côn an gĭt, rnôk mbơh ƀư nău kan geh âk “nău lư”. Kloh ngăn lah năm 2020, rnôk rlong pơk, trong dĭng me knŭng jong nklăp 5km yơn geh chah tât 13 tŏ. Mhe aơ, tâm n’gul khay 2/2024, trong dĭng me chah du tơ̆ tay n’hanh ăp ding geh tât ngăch mkra. Aƀaơ, ndơ ƀư dôl tâm rnôk rlong pơk dŏng tay gay dơi nkra an tât rnôk dŏng đăp mpăn mư dơi jao an ndơ̆ dŏng na nê̆. Tĭng wa Côn, mô hŏ dơi đăp mpăn ndơ ƀư geh mâp tay đŏng lah mô:

Mpôl hên lĕ nkra, êp ntơm dơi mkra nău khuch bah ndơ ƀư, yơn lah, dơi geh tĭng ntŭk, n’hanh tâm rnôk dŏng pơng dơi geh luh. Mhe aơ du ntŭk, kuăl lah co jong nklăp 1,2 mét ƀư mô hŏ di đah ndâk nkra. Trong nklăp 6.000m dĭng me n’hanh âk km trong dĭng mbah tâm rnôk dŏng, yor dĭng ka su, hăt âk, trong nkual tuch tăm bah nuĭh ƀon lan, dơi geh âk nău khuch ndal ri jêr dơi njrăng.

Nău nchrăp ƀư pă dak tŏ thôn Tiến Cường, xă Quảng Tiến, nkuăl Cư M’gar dơi UBND n’gor Dak Dak uănh an geh dĭng lĕ rnoh ntuh kơl bơi 73 rmen prăk, ndâk ƀư dŭt năm 2019, trong nchrăp jêh tâm khay 10/2020 yơn geh mbrơi. Nău nchră dơi uănh lah geh nău ndăn n’hanh tam âk đah nkual ƀa ƀơ duh phang kơt xă Quảng Tiến, yơn tâm rnôk mbơh ƀư geh âk nău mô đăp mpăn. Âk rnôk, nuĭh ntuh kơl ndâk ƀư n’hanh nuĭh tơm ntuh kơl nău nchrăp ƀư mô geh nău ngơi nsum, đê̆ đŏng 2 ding tâm nduih tih. Rnôk hô ngăn rnôk dĭng na nao chah, nuĭh ndranh an lah tih ndâk nkra, nuĭh tơm ntuh kơl an lah tih ndâk ƀư.

Năm 2022, Thanh tra N’gâng kan tuch tăm mât rong n’hanh hun hao ƀon lan lĕ geh n’glôn jêh mpeh du đêt nău hôm e, mô hŏ dơi ƀư ntơm bah lvang ƀư, uănh năl, uănh an trok tâm, ndranh, tât ndâk ƀư nglăp trong dak, sŏk dŏng, trok prăk nău nchrăp ƀư. Đah nău ntĭm rđău dŭt n’hâm bah N’gâng kan tuch tăm mât rong n’hanh hun hao ƀon lan n’gor Dak Lak, tât dŭt năm 2023, ndơ ƀư ntơm nkra, ndâk ƀư trong dĭng me, ngăch dŏng gay pă dak yan wai năm aơ. Aƀaơ, geh bơi 400 rnăk ƀon lan đah nklăp 350 ha tơm tăm jŏ năm dơi geh bah tu dak bah nău nchrăp ƀư.

Yơn tâm nău răm rhơn, hôm e geh nĕ lah nău rvê chah dĭng. Lah rnôk geh nău mâp nuĭh ƀon lan geh roh dak n’gul gưl, hôm nuĭh tơm ntuh kơl n’hanh nuĭh ndranh rvê hoach prăk, nar nkra, nkra nău khuch ndơ ƀư. Nău aơ đă ăp ngih pah kan way kan bah N’gâng kan ƀon lan n’hanh UBND n’gor Dak Lak an uănh nđôi, groi uănh, ƀư kloh nău đăp mpăn, săk rnglăy bah nău nchrăp lor rnôk jao, ndơ̆ an dŏng jŏ jong.