Bôk khay 3, ta xă Đông, nkuăl Kbang, n’gor Gia Lai geh du rơh su nja lŏ ƀư ŭnh sa 5ha tao êp sreh. Wa Nguyễn Đăng Chung-Kruanh UBND xă Đông-an gĭt jêh rnôk geh nu nău, n’gâng kan ƀon lan xă lĕ ntrŭt đă Ngih măy sĭk An Khê kơl rwăt lor rnoh tao geh ŭnh sa nuĭh ƀon lan, yor nê n’hŭch đêt khuch khat. Nkô̆ nău ŭnh sa dơi năl, jêh rnôk sreh mir tao bah rnăk wâl, wa Hồ Văn Vĩnh ta thôn 2, xă Đông, ƀư trong n’har nking n’gang ŭnh n’hanh koaih mir tao bah rnăk wâl. Yơn lah, tâm rnôk dŏng ŭnh koah su mir tao, wa Vĩnh mô lap jêng an chông ŭnh rêng mir tao dăch nĕ bah rnăk wa Đinh Tấn Đức n’hanh Nguyễn Ngọc Công, ƀư bơi 5ha tao bah 2 rnăk aơ geh ŭnh sa.

Ta năp nău nĕ, ăp nar aơ, ƀon lan dôl mô ru sreh tao. Wa Trần Văn Tuấn, ta xă Nghĩa An, nkuăl Kbang, n’gor Gia Lai an gĭt: Tao năm aơ săk jêng, tăch khlay, yơn kônh wa rvê klach geh ŭnh sa tao yor tâm yan duh nar hô:

Rnăk ƀon lan gâp ri aƀaơ nklăp 3.200 tấn tao tay. Tâm rnôk duh nar hô ri ăp nkual duh phang ri pă trong, tao rŭng n’ha sreh lor, hôm ăp nkual hôm e n’ĭt, jêr ŭnh sa tao ri an sreh bah kơi.

Nar 6/3 mhe rlău, nuĭh ƀon lan ƀon Kruối Chai, xă Yang Bắc, nkuăl Đak Pơ, n’gor Gia Lai, saơ mir tao tâm ƀon geh ŭnh sa jêng lĕ kuăl ăp nuĭh tât puh nset. Nkre, mbơh an n’gâng kan ƀon lan n’hanh rmôt dân quân bah xă mbơh ƀư tât kơl, mô an chông ŭnh rêng ăp rnoh neh tao kâng n’har. Yơn lah, yor trôk duh hô, ndoh ndơ puh ŭnh y ty, n’ha si jêng chông ŭnh lĕ hŭr sa 4,5 ha tao dôl nchrăp sreh. Aơ lah rnoh neh tao bah 3 rnăk ƀon lan ta thôn An Quý, xă Phú An, nkuăl Đăk Pơ. Tĭng năl lah bôk năp, âk geh nkô̆ nău ŭnh sa tao lah yor nuĭh ƀon lan su pih jêng tât ŭnh rêng. Bah năp nĕ, ta bôk khay 3, ta ƀon Kruối Chai lĕ geh du rơh ŭnh sa ƀư khuch khat 2,8 ha tao êp sreh bah nuĭh ƀon lan. UBND xă Yang Bắc lĕ pah kan đah ngih măy sĭk An Khê gay ngăch sreh rnoh neh tao ŭnh sa gay n’hŭch khuch khat an nuĭh ƀon lan.

Bơi du khay plơ̆ ma aơ, ta ăp ntŭk mpeh bah lơ Gia Lai na nao geh nău ŭnh sa tao. Lĕ geh bơi 20 ha tao geh ŭnh sa ta ăp nkuăl Kông Chro, Đăk Pơ, Kbang n’hanh nkual têh An Khê. Wa Trần Văn Đấu, Groi Kruanh jrô kan tuch tăm mât rong n’hanh hun hao ƀon lan nkuăl Kông Chro mbơh, yan tao aơ, nkuăl geh bơi 10.000 ha tao. Aƀaơ, rlău n’gul rnoh neh lĕ dơi sreh. Trôk nar duh ƀư âk rnoh neh tao dôl geh ŭnh sa dŭt âk.

Nkoch trêng kônh wa n’hao wât njrăng n’gang ŭnh sa tao, mô an djôt ndơ dơh ŭnh sa tâm nkual tao. Bah meng nĕ ƀư ăp trong mkra kơt ƀư trong n’har nking n’gang ŭnh, mô an rêng ŭnh sa tao bah mir aơ tât mir êng.

Nkual tăm tao mpeh bah lơ n’gor Gia Lai geh rnoh neh 30.000ha. Tât rnôk aơ, ƀon lan lĕ sreh nklăp 65% rnoh neh tao lam nkual n’hanh nchrăp mbra lôch ta dŭt khay 4 tât. Wa Nguyễn Hoàng Phước, Groi Giám đốc Ngih măy Sĭk An Khê an gĭt, ntŭk kan lĕ ƀư âk rơh rƀŭn đah ăp ntŭk, rnăk tăm tao, ndrel mbơh ƀư ăp trong njrăng n’gang ŭnh sa tao tâm lvang dŭt phang hô.

Rnôk geh rnoh neh tao ŭnh sa ri ngih măy ndrel n’gâng kan ƀon lan, kônh wa ƀon lan rgum sreh tao ngăch gay rdêng tao sĭt ngih măy tâm rnôk ơm ngăn. Mô ŭch geh yơn rnôk mâp ri mpôl hên rwăt tao ŭnh sa thuk lơn nkôp đah tao ngăn lah 100 rbăn prăk du tấn. Nta an kơl kônh wa, geh prăk bah nuĭh tăm tao ta rnoh neh tao ŭnh sa đăp mpăn bah 25 tât 30 rkeh prăk/ha đah săk geh rĭng 78 tấn/ha.

Năm e, ta n’gor Gia Lai lĕ geh bơi 100 rơh ŭnh sa tao đah rnoh neh rlău 300ha, khuch dŭt têh đah nău geh bah rlău 200 rnăk. Yor nê, N’gâng kan tuch tăm mât rong n’hanh hun hao ƀon lan dăn đă UBND n’gor Gia Lai ntĭm rđău Công an n’gor n’hao trong kan nkoch trêng njrăng n’gang ŭnh sa ta lam n’gor; uănh nđôi, năl nkô̆ nău ăp rơh ŭnh sa tao, rmal rjăp ăp nuĭh ndra phah.