Nchrăp tâm pă, dŏng dak tŏ an ăp ntil tơm tăm, dôl dơi ăp gưl n’gâng kan n’hanh nuĭh ƀon lan ta nkuăl Ea Kar, n’gor Dak Lak ƀư tâm di. Dak tŏ rhŏ an tuch tăm lŏ mir hôm e đăp mpăn, ba yan wai ta ntŭk dơi “dêr”duh phan.

Ba lŏ, ba dôl uĕh nđĭr ta “ndrĭch lŏ 132” ta xă Cư Ea Lang, nkuăl Ea Kar, n’gor Dak Lak. Nung nar brih duh, ao mpêh dak rhal yơn bâr gơm bah Sa Moan Krông răm m’ak ta jâng ba lŏ uĕh jêng. Sa Moan Krông, jay ta ƀon Briu, xă Cư Huê, nkuăl Ea Kar an gĭt, yor mô tŏng neh tuch tăm, rnăk wâl dơi pă lŏ ta ndrĭch lŏ aơ bah năm 2016. Knŭng năm bôk năp săk geh đêt yor mô gĭt trong ƀư, âk năm bah kơi nĕ, rnăk wâl ƀư 2 yan, 10 tấn du năm. Yan wai năm aơ duh hê, lŏ ba rnăk wâl lŏ ta dŭt trong rbông, jêng Sa Moan Krông hăn dŭt ơm gay wơt dak sĭt:

 Ta Ƀon Ea Đơk anei, ƀon Briu geh hang rhiăng rnăk dơi ngih dak pă lŏ, rnăk gâp dơi pă 3 sào 7 lŏ dak. Trong hăn lŏ ngai, hăn chop lŏ n’hanh sŏk dak di nar geh dak.

Wa Nguyễn Ngọc Hòa, Kruanh UBND xă Cư Ea Lang an gĭt, rlău ma nĕ “ndrĭch lŏ 132” dơi ndâk ƀư tĭng nău ntrŭnh 131/2003 bah Thủ tướng Chính phủ, pă an kônh wa ƀon lan rnoi mpôl đêt mô tŏng neh tuch tăm, Yan wai aơ, ƀon lan tâm xă hôm srih tăm 500 ha ba ta ăp ntŭk lŏ. Ntơm bah bôk yan, n’gâng kan ƀon lan lĕ rgŏ jă kônh wa jŭr ntil di khay, n’hŭch srih tăm ba ta ăp jâng lŏ mô tŏng dak, jêng tât aƀaơ dơi dêr duh phang.

Duh phang dơi geh. Đah nău tâm pă dak bah Công ty thủy lợi, ƀon lan xă nchrăp mbơh an nuĭh ƀon lan, lơn lah nuĭh geh rnoh neh srih tăm ba lŏ nchrăp tâm rgop đah công ty thủy lợi tĭng nar pă dak bah tĭng nkual gay nchrăp ndơ̆ dak tâm lŏ. Dêr mpŭng lir n’hanh mô tât ăp nkual lŏ ta ngai.

Công ty Thủy lợi Dak Lak gŭ ta Ea Kar mât uănh 20 ndơ dak bât, geh 18 n’glău n’gâr, 1 dak bât hao n’hanh du trạm bơm. Rnoh neh tŏng ăp tu dak tŏ bah ntŭk kan công ty lah 3.220 ha ăp ntil tơm tăm. Tâm nĕ geh 1.800 ha tơm tăm jŏ năm n’hanh 1.150 ha ba lŏ. Wa Nguyễn Tiến Sĩ, Giám đốc Công ty Thủy lơi Dak Lak gŭ ta Ea Kar an gĭt: Aƀaơ 14 n’glău n’gâr dak yor Công ty mât uănh, rnoh dak hôm e đăp mpăn.

Ta dak bât Ea Rớt, lah dak bât têh ngăn ta nkuă Ea Kar, đah rnoh n’gâr dak rlău 18 rkeh mét khối. Lĕ rlău 1 khay aơ, 10 cán bộ nuĭh kan ta ntŭk aơ tâm pă nar kâp, tĭl-pơk tâm pă dak lôch măng nar. Wa Phạm Ngọc Linh, mât uănh tâm pă dak Bât Ea Rớt an gĭt, dak tâm n’glău aƀaơ knŭng hôm 45% rnoh dak. Cán bộ, nuĭh kan bah trạm an ƀa ƀơ uănh nđôi rjăp nău dơn dak bah ăp rƀông bah ăp rnăk, tŏng ăp dŏng dak ntêm nkrêm, săk rnglăy.

N’glău hôm e dơi tŏng ăp dak gay rhŏ tât dŭt yan wai aơ. Lĕ rngôch bah kruanh tât nuĭh kan bah ntŭk kan mbra tâm rgop đah n’gâng kan ƀon ta ntŭk nkoch trêng, tâm pă dŏng dak du trong ntêm nkrem ngăn.

Dôl ta yan wai duh phang hô bah Tây Nguyên, duh phang lĕ geh tĭng ntŭk ta du đêt ntŭk, khuch tât săk geh rnoh ndơ ăp ntil tơm tăm. Yơn nuĭh ƀư ba ta nkuăl Ea Kar, n’gor Dak Lak lĕ nchrăp lor tu dak tŏ. Yan ba yan wai ta ntŭk hôm e dơi “dêr duh phang.