Rlău n'gul khay aơ, Festival kao Đà Lạt tâl 9 năm 2022 hŏ ntơm đah du đêt bôk nău kan ƀư ta nkual ƀon têh Bảo Lộc, Đà Lạt n'hanh ăp nkuâl kiău ma, tâm nê lơn âk rgum ta Đà Lạt. Gay tŏng ăp ntŭk gŭ rlu, pâl rlưn bah năch, ăp ntŭk rhŏ dŏng tăch rgâl ta nkual hŏ ntuh kơl nkra têh uĕh tay, n'glăp dŏng âk ntil ndơ geh pâl nđaih mhe.

Ndrel đah n'hao săk geh rhŏ dŏng, pah kan mât uănh rnoh khlay ăp ntŭk tăch rgâl, đăp mpăn rnă njrăng hăn ntung trong dơi ăp nhih pah kan dơi kan ta ntŭk an ƀư. N'gor Lâm Đồng aƀaơ geh rlău 3.000 ntŭk manh gŭ măng, đah rlău 38.000 jrô bĭch, tŏng an nău ŭch geh ntŭk manh gŭ 75.000 tơ̆ năch/nar măng, tâm nê êng nkual ƀon têh Đà Lạt nkra ntŭk gŭ ndrel du tơ̆ an rlău 60.000 tơ̆ năch/nar, mô kơp ăp ntŭk gŭ rlu homestay, jay rlu thuk. Yor kơt nê̆ tâm rơh ƀư Festival kao Đà Lạt tâl 9 tâm ban kơt ăp rnôk tết dương lịch, tết nguyên đán bơi tât, Đà Lạt – Lâm Đồng mbra mô an geh nău lhăt bêng ir mpeh ntŭk gŭ kơt ăp năm bah năp nơh.

VOV Tây Nguyên/Nuĭh rblang: Điểu Thân