Ta nkuăl Lạc Dương, tâm khay 11 aơ mbra geh 3 bôk nău kan rƀŏng tĭng Festival Nkao Đà Lạt rơh tal 9 năm 2022. Na nê̆, nar 19/11, mbra ntơm ƀư Yan hội Cỏ hồng Lang Biang. Ta aơ nkra ƀư 5 tiểu cảnh bah ăp ntŭk pâl nđaih, nkre ƀư ăp nău pâl way ơm, nău ƀư Team Buiding geh tât gŭ âm văn hóa ntŭk gŭ nuĭh rnoi K’Ho. Nar 26/11, ta xă Đạ Nhim mbra ƀư Tâm nđŭr ndơ ngêt sa n’hanh ndrănh yăng Lang Biang rơh bôk năp, đah tât râng bah 6 rmôt. Rơh aơ đŏng, ta aơ mbra ƀư Lễ hội tâm rlong seh mô geh wơng rơh bôk năp, săch 32 seh tâm rlong bah 6 xă, nkuăl têh n’hanh ăp doanh nghiệp ta ntŭk. Wa Sử Thanh Hoài, Kruanh UBND nkuăl Lạc Dương, n’gor Lâm Đồng an gĭt: trong kan nchrăp an 3 bôk nău kan rƀŏng tĭng Festival Nkao Đà Lạt rơh tal 9 năm 2022 lĕ ntơm jêh.

“Ƀư tĭng nău ntrŭnh bah UBND n’gor mpeh nău ăp ntŭk tâm n’gor an râng ăp bôk nău kan rƀŏng tĭng Festival nkao Đà Lạt, nkuăl Lạc Dương geh du đêt nău ƀư gay rƀŏng tĭng. Nĕ lah yan hội cỏ hồng nchrăp ntơm ƀư tâm nar 19/11, hăn ndrel đah nĕ lah nkuăl Lạc Dương ƀư tâm nđŭr ndơ ngêt sa chĭng gông, tâm rgop đah ăp doanh nghiệp ƀư tâm rlong seh mô geh wơng ta xă Đa Nhim”.

          Ntŭk narr rƀŭn mbơh.

Aƀaơ, ăp ntŭk ƀư pâl nđaih kơt jay sông sa, khách sạn, nkual uănh nsong pâl nđaih... Ta Lâm Đồng lĕ nchrăp ăp ndơ khlay gay đăp mpăn rhŏ uĕh nău ŭch bah năch. Wa Đinh Thiên Long, nuĭh tơm du jay sông sa ta nkual ƀon têh Đà Lạt an gĭt, gay rƀŏng tĭng Festival nkao Đà Lạt rơh aơ, rlău ma n’hao uĕh ndoh ndơ, jay sông sa bah wa lĕ nchrăp uĕh du đêt ndơ ngêt sa kah dơi nkret gâm bah ăp ntil biăp, bum, play geh nău uĕh êng bah Đà Lạt.

“Ta năp Festival ri nău bôk năp mpôl hên lôch jêh bôk năp bah du jay ngêt sa đah uĕh rhŏ an, mpeh răk rao đăp mpăn ndơ sông sa gay wơt dŭt âk năch pâl nđaih. Đà Lạt geh tu tơm ndơ âk n’hanh uĕh, yor nê gâp ŭch năch mbra dơi rlet rlău mpeh văn hóa ndơ sông sa bah nuĭh ƀon lan nkual ƀon têh nkao”.

Wa Tôn Thiện San, Kruanh UBND nkual ƀon têh Đà Lạt, Kruanh mpôl ndâk ƀư Festival nkao Đà Lạt rơh tal 9 an gĭt, ăp ăp ƀon nkao, ntŭk ntô nkao ta Đà Lạt tŏng ăp nkao uĕh rih, rhŏ uĕh nău ŭch nuĭh năch uănh.

Băng: “Đà Lạt mĭn lah mô knŭng geh Festival nkao mư geh nkao, ma Đà Lạt lah nkual ƀon têh nkao jêng nkao geh wăr năm, nuĭh tăm nkao, jay jay tăm nkao. Ăp ƀon nkao năm aơ geh ndơ rhŏ an năch, ntĭt nsa ƀon nkao Vạn Thành dơi uănh tâm măng. Du đêt bôk nău kan Festival nkao mbra jŏ tât Tết, geh nău nchrăp rgâl nkao ƀa ƀơ n’hanh nkao uĕh mro. Kơt nĕ, rlău ma bôk nău kan “Thiên đường Tây Nguyên’ jŏ jong, ăp ntŭk ntô nkao mbra jŏ rlău Tết”.

          Kơt Ăp rơh Festival nkao bah năp, Festival nkao Đà Lạt rơh tal 9 rƀŏng tât rgâl nău rêh jêng, yor nê dŭt âk ăp bôk nău kan dơi ăp doanh nghiệp, rmôt kan, nsum mpôl, êng nuĭh dăn ƀư. Tĭng wa Đặng Trí Dũng, Groi kruanh UBND n’gor Lâm Đồng, Groi kruanh ban ntĭm rđău bôk naư kan Festival nkao Đà Lạt, tât rnôk aơ ăp bôk nău kan dơi ƀư uĕh n’hanh di ngăch, đăp mpăn du rơh Festival nkao uĕh n’hanh n’glơi an âk rup ndah uĕh tâm nuĭh năch. Tă bah nĕ, rgop ntrôl dăng pâl nđaih n’hanh n’hao uĕh nău rêh văn hóa n’hanh nuih n’hâm bah nuĭh ƀon lan ta ntŭk.

       Du ntŭk mpla nsơ ta kơh n'glău Xuân Hương lĕ dơi ƀư jêh.

   “Tât rnôk aơ tâm di tĭng ăp nău ŭch kơt trong nchrăp n’gluh an, n’ăp mông nar, nkô̆ nău n’hanh trong kan nchrăp jêh. Ban ntĭm rđău, Mpôl rdâk ƀư n’hanh 4 tiểu ban mbơh ƀư nău kan dŭt uĕh. Festival nkao năm aơ nău mĭn nsum lah rĭng tâm di, geh âk nkô̆ nău jêh Festival ri ƀư dŏng tay, rhŏ an; yơn geh âk nkô̆ nău, ntĭt nsa kơt bôk nău kan ƀư nghệ thuật ri nkân tay tâm nuĭh năch ăp nău uĕh mpeh Đà Lạt, mpeh Lâm Đồng, mpeh kon nuĭh, mpeh ăp ndơ tâm nĕ geh nău mpeh nkao”.

Đah bôk nău “Đà Lạt-nkual ƀon têh 4 yan nkao”, Festival nkao Đà Lạt rơh tal 9 năm 2022 ƀư bah khay 11 tât lĕ khay 12 đah ntŭk ntô jŏ jong lam hvi ăp nkuăl, nkual ƀon têh tâm n’gor. Ndrel đah 9 bôk nău kan geh: ntŭk ntô nkao, bôk nău ƀư nghệ thuật “Bảo Lộc-Hương trà, sắc tơ”, bôk nău kan nghệ thuật uĕh mbơh Festival nkao Đà Lạt rơh tal 9 năm 2022, nsơr treng kho ao “Tơ lụa-con đường di sản” n’hanh Ntŭk ntô mpla nsơ “Thiên đường Tây Nguyên”, nsơr, mpla nsơ nkao n’hanh tơm geh nkao lam ntŭr neh, rƀŭn nchră ntơm ƀư bôk nău kan bah Chính phủ ƀư tĭng Nghị quyết mrô 23 bah Bộ chính trị mpeh trong rƀŏng hun hao wăng sa rêh jêng, đăp mpăn mât njrăng bri dak, rnă njrăng nkual Tây Nguyên năm 2030, uănh tât năm 2045 n’hanh ntrŭt ngăch ntuh kơl nkual Tây Nguyên.