VOV4.M'nông: Lôch 3 khay an ƀư, trong kan druh ndăm hăn kơl êng khay rlu nti 2022 ta n'gor Gia Lai hŏ mpôch dŭt đah âk nău kan geh nkô̆ khlay, n'glăp săk an nsum mpôl ƀon  lan bah ăp đoàn viên druh ndăm. Trong kan druh ndăm hăn kơl êng khay rlu nti n'gor Gia Lai dơi an ƀư ntơm bah bôk khay 6 năm aơ, đah ăp nău kan 3 khay rlu nti lah: "Mbơh nti- kơl suan khay thi", bah "Rơh rlu bi", "Kao phượng gŭr" "Hăn kan nđĭr", "Khay rlu nti nđĭr".

Ăp nău kan, gâl kan na nê̆ rgum ƀư ta ăp xã n'har bri; ăp xã, ƀon lan nsrôih tât rnoh rdâk njêng ƀon lan mhe tâm năm 2022 n'hanh ntŭk gŭ, ntŭk pah kan, kơt nti bah đoàn viên, druh ndăm, kon se nti, sinh viên. Tĭng ƀư trong kan, druh ndăm Gia Lai hŏ tĭng ƀư ăp gâl kan geh nkô̆ khlay kơt nkra n'hanh ƀư mhe 27km trong hăn tâm ƀon lan; mbơh nti n'hâm suan, mât chăm, phăt dơm dak si an 1400 tơ̆ nuĭh ach o; tăm mhe  bơin 170 rbăn tơm si; rdâk  njêng 6 mblâm jay tâm rŏng; ƀư kơi năp nti nău gĭt blău ntơm njêng nău kan, ndơ̆ rgâl khoa học kỹ thuật an hang rbăn tơ̆ druh ndăm tâm ƀon lan….

      Nuĭh rblang: Điểu Thân