Mhe aơ, mpôl pah kan bah ăp nuĭh kan Chính phủ tă bah Ủy viên Ban Chấp hành Trung ương Đảng, Bộ trưởng Bộ Ngoại giao Bùi Thanh Sơn ƀư kruanh mpôl hŏ  geh rơh pah kan đah n’gor Gia Lai. Nkô̆ pah kan geh tât nô nău ƀư njêng tăch rgâl, ntuh kơl,  rdâk njêng n’hanh tăch n’gluh n’glăp ta n’gor; ntrŭt ntrôl tăch n’gluh  n’hanh nkoch n’hơ rup gui bah n’gor.

Tĭng nău mbơh bah kruanh rđău kan UBND n’gor Gia Lai, năm 2023, n’gor geh 14/21 rnoh tât hun hao wăng sa- rêh jêng kon nuĭh,  nău tĭng ƀư ăp trong kơl đăp mpăn  rêh jêng kon nuĭh đah nuĭh geh n’hâm suan, rnăk dơi kơl  đăp mpăn, rnă njrăng n’har bri dơi mât đăp mpăn, lam rêh jêng kon nuĭh dơi đăp mpăn. Yơn lah, n’gor hôm 7 rnoh  nău kan mô hŏ dơi tât trong nchrăp, rnoh ngăch hun hao wăng sa mô hŏ tât kơt nău mpŏng, pah kan wăch rgum ntuh kơl mâp âk jêr jŏt, du đêt kŏ kol  tâm pah kan dăp rgum, trok tâm, đă ntrơn du, tuh bôr neh, nău an ƀư ăp bôk nău kan gưl neh dak hôm mbrơi…. 

Gay đăp mpăn ƀư tât lôch jêh ăp nău kan wăng sa- rêh jêng kon nuĭh tâm năm 2024, Gia Lai dăn đă Chính phủ n’hanh ăp n’gâng kan ntop kơl nkra ăp kŏ kol mpeh âk trong kan kơt: rgâl di tay rnoh dŏng neh tât năm 2025 tâm di đah nău ngăn geh ta n’gor; rdâk njêng rnoh tât wăng sa- kỹ thuật, rhŏ dŏng nău kan tâm nău dŏng prăk ngân sách ngih dak tâm trong kan dak si, droh rklaih kŏ kol tâm trong an ƀư rnoh tât kan gưl neh dak; an ƀư trong cao tốc Pleiku- Quy Nhơn tĭng trong ntuh kơl ngih dak... Tâm trong kan ŭnh nar sĭt jêng tay, wa Phạm Văn Binh- Giám đốc Sở Công thương Gia Lai nkoch nău ngăn geh:

“Gia Lai geh nău dơi ƀư njêng 3000 MWp, yơn nău dơi n’gluh nklăp 30 MWp dơm, jêng ƀư luh 10, dơn geh tăch 1 ta trong rse điện neh dak dơm. Năm 2020 n’hanh 2021, n’gor an ƀư du rơh 17 trong nchrăp kan ŭnh nar sĭt jêng tay đah lĕ rngôch rnoh dăng 1.200 MWP. Yơn lah, mhe aơ dăp rgum điện 8 dơn geh 604 MWP an lvang năm 2021-2030. Jêng, rđĭl đah săk geh bah n’gor ri đêt, ân geh nău uănh khlay lơn bah trung ương".

Ta rơh pah kan, ntơh măt Bộ Giao thông-Vận tải, Bộ Tài chính, Bộ Công thương, Bộ Kế hoạch n’hanh Đầu tư, Bộ Ngoại giao, Ủy ban Dân tộc… hŏ ơh rblang, ƀư kloh du đêt nkô̆ nău dăn đă bah n’gor mpeh nău dơi mât ŭanh; nkre, nkah djăt, rgum nchih đah ăp nkô̆ rlău nău dơi nkra gay rgum, mbơh Chính phủ ơm mĭn uănh, nkra an n’gor.

Lah ta rnôk n’glôch jêh, Bộ trưởng Bùi Thanh Sơn lah kloh: năm 2024, Chính phủ n’gluh trong nchrăp “Tâm rnglăp nău way, han săk ngăch ngăr, rgâl mhe,  năn ngăch  geh nău tam”. Ntơm ngăn geh bah n’gor, dăn đă n’gor dŏng, ƀư jêng ngăn ngăn jêng trong nchrăp kan an ƀư na nê̆. Tĭng nê,  n’gor ân rgum an ƀư  lĕ n’hâm suan Nghị quyết 23 Bộ Chính trị; an ƀư dăp rgum  n’gor Gia Lai 2021-2030; gŭ mĭn  dăn đă trong kơl mha êng  an nkual Tây Nguyên; an ƀư năn ngăch ăp bôk nău tât kan gưl neh dak; rgum rgâl dơh glêh siƀŭt, ntop kơl doanh nghiệp ƀư njêng tăch rgâl. Bộ trưởng Bùi Thanh Sơn lah rjăp:

“Gâp dăn đă 3 nkô̆ nău ân ƀư lah: an ƀư lĕ n’hâm suan ăp siƀŭt rđău đă bah Trung ương Đảng Quốc hội Chính phủ tĭng ƀư ăp kôp geh nău tam trong nchrăp hun hao wăng sa rêh jêng jŏ jong trong nchrăp 5 năm. Tâm nê êng uănh khlay đah pe đăt ndal  têh jong n’hanh 6 nău dơn kan rgum tơm tâm 12 rmôt trong nkra tơm khlay bah chính phủ ndơ̆ luh; đăp mpăn rnă njrăng chính trị đăp mpăn lam rêh jêng kon nuĭh ta n’gor, rdâk njêng tơm wăng sa nsrôih êng nkre đah lăp rgum dak bah dih jru hvi, ngăn ngăn, geh nău tam. N’hanh tâl pe lah êt lhăt nău jăp tĭng trong way kan n’hao nău tam tĭng ƀư ăp siƀŭt pháp luật, nghị quyết bah Quốc hội.”

Bộ trưởng dăn đă, năm 2024, Gia Lai ân grêt dăch ăp bôk nău kan, trong nchrăp bah Chính phủ đah trong rƀŏng kan “Tĭng jăp nău way dơn kan, lor nchrăp năn ngăch, ngăch ndal blău njêng mhe n’hanh  geh nău tam jŏ jong”; nkre, ntrŏng aơ lah năm “ndăn ngăch”  tĭng ƀư trong nchrăp hun hao wăng sa- rêh jêng kon nuĭh 5 năm gay rgum rđău đă.

Bah meng nchŏng luh ăp nău dơn kan rgum tơm ma n’gor Gia Lai ân rgum tĭng ƀư, Bộ trưởng Bùi Thanh Sơn dăn đă ăp bộ, n’gâng kan, nhih pah kan Trung ương geh tât uănh khlay tay, grêt dăch ăp nău dăn đă bah n’gor gay rgum droh rklaih; nkre, geh ăp trong rƀŏng ntĭm nti na nê̆ gay n’gor an tĭng ƀư  geh nău tam 3 bôk nău kan gưl neh dak, hun hao jŏ jong an ƀư nâp dăng ŭnh nar sĭt jêng tay, công nghiệp nkret njêng, tuch tăm công nghệ mhe, ntrŭt ntrôl tăch rgâl n’har bri, pâl nđaih… tâm ban kơt ntop kơl gŭ mĭn du đêt trong đă tĭng ƀư, trong kơl mha êng gay hun hao nkual Tây Nguyên, tâm nê geh n’gor Gia Lai./.