Oh Hoàng Thị Anh Thơ, kon se nti jrâu 12C1, Ngih săm THPT Phạm Văn Đồng, xã Ia Sao, nkuăl Ia Grai, n’gor Gia Lai mbơh, thi tốt nghiệp êp tât geh nau khlay ngăn tât nau rêh. Ndri ma, oh nsôih ntĭm nti tă bah ơm gay geh nau dơi ueh ngăn:

“Gâp đăng kí tay ăp nau kan ntĭm nti êng tâm ngih gay ma ƀư, luyện đề. Tal bar lah ngêt sa ân tŏng ăp ndrel bĭch ân tâm di mông gay ma ân nuih n’hâm ueh, lŏ ntĭm nti. Mpeh nau kan đăng ký râng thi đại học ri gâp geh ngih săm ƀŭt mbơh ueh ngăn, kơp uănh tay hồ sơ âk tŏ. Ri ma mpeh hồ sơ đăng ký thi, gâp hŏ geh nau jêh hôm”.

 Nkoch tât nau nchrăp ân rơh thi mrô 11 bah n’gor Gia Lai, nai nti Nguyễn Trọng Tuấn, Groi Hiệu trưởng Ngih săm ƀŭt THPT Phạm Văn Đồng, xã Ia Sao, nkuăl Ia Grai, mbơh:

 ‘Tât rnôk aơ, 186 kon se nti hŏ đăng ký dơi thi tốt nghiệp bah phần mềm. Mpeh ntŭk ntu dŏng, ngih săm ƀŭt nchrăp 12 jrâu nti, ăp jrâu ân đề thi, jrâu ân bài thi, jrâu pah kan bah hội đồng, ntrong mpoh ang điện, jrâu mpuh n’hât ŭnh sa kŏ geh mêt uănh, nkra nâp”.

Hôm tâm ngih săm ƀŭt Hà Huy Tập, nkuăl Kông Chro, nai nti Phạm Hữu Hùng, Hiệu trưởng Ngih săm ƀŭt mbơh, năm aơ ntŭk ntu geh 57/246 kon se lah rnoi mpôl đê̆. Ndrel ma nau kan mât đăp mpăn ôn tập ndrel nchrăp ăp nau dơi ntŭk ntu, ngih săm ƀŭt nchrăp ntŭk gŭ sa, gŭ kơl an kon se gŭ ngai:

 ‘Ngih săm ƀŭt mbơh nau njoăl UBND nkuăl dăn geh nau kơl an 400 rbăn ân du hê kon se tâm 3 nar geh rơh thi. Mpeh đah ngih săm ƀŭt, rđau đoàn druh ndăm tâm rgop ma đoàn nkuăl kơl an 57 kon se rnoi mpôl đê̆ ntŭk gŭ ngêt sa tâm khu tập thể bah ngih săm ƀŭt. Ăp năm ndrel năm aơ kơt nê đŏng, ngih săm ƀŭt geh 1 2 jrâu gŭ khu tập thể ân ăp kon se geh nau jêr ân geh ŭch gŭ. Ăp oh gŭ ri geh rmôt hăn kơl an tâm rnôk hăn thi leo njŭn khân păng”.

 Nchrăp, rơh thi tốt nghiệp THPT neh dak năm 2024 tâm n’gor Gia Lai geh rlau 15.200 kon se. Tâm nê, geh rlau 14.400 kon se jrâu 12 ndrel 800 kon se tự do. N’gor pă 41 ntŭk thi ndrel du đê̆ ntŭk nchrăp lor tâm 17 nkual, nkuăl têh, nkuăl ƀon têh. N’gâng kan ntĭm nti n’gor Gia Lai tâm rgop nsum đah ăp ntŭk n’gâng kan, ngih dak si, điện lực...nchrăp đăp mpăn bah rơh thi. Nau kan ntĭm mbơh mpeh quy chế ndrel nghiệp vụ ƀư thi, phần mềm mât rnôk thi, nau ƀư đăng ký thi ân rlau 15.200 kon se hŏ ƀư ueh. Wa Nguyễn Văn Long, Groi Giám đốc N’gâng kan ntĭm nti n’gor Gia Lai mbơh:

‘Ntơm bah rnôk aơ tât nar thi, n’gâng kan kơp mbơh nau ân kon se, ƀư mbơh nau kan rnôk uănh nti, lŏ ƀư nau nchrăp tĭng rjăp nau ntrŭnh rnôk thi ân cán bộ, nau ntĭm ƀư nau kan thi ndrel kon se râng thi. Ăp nau kan aơ mra geh ƀư mro, ƀa ƀơ, ntơm rnôk aơ tât nar thi. N’gâng kan ntĭm nti tâm rgop nsum ma UBND ăp nkuăl nchră n’hêl tă bah ntŭk nti, ntơm bah nau dơi mpeh ntŭk ntu, nchrăp ƀư ăp nau dơi ân kon se râng thi ân geh nau kơl an ân tâm di”.

 Đah nau nchrăp ueh, Gia Lai dôl rƀŏng tât rơh thi tốt nghiệp THPT neh dak 2024 đăp mpăn ndrel rjăp./.