Tây Nguyên dôl tâm nklang khay wai, kro phang ntoch jong tâm bah ri aơ nơh hŏ  ƀư an bar pe  jât rbăn  ha bri ta n’gor Gia Lai geh ma nău ŭnh sa mô gĭt moh rnôk tât. Lor nchrăp tâm pah kan njrăng n’gang ŭnh sa bri, ăp n’gor hŏ rdâk njêng trong nchrăp, nkre, an ƀư  ăp kôp âk trong nkra gay rdâng lơh bah năp ăp nău tât geh ŭnh sa. Hoàng Qui, Phóng viên Radio nău ngơi Việt Nam way gŭ nkual Tây Nguyên nchih nkoch:

Rmôt mât njrăng ŭnh sa bri ƀon Keo, xã Ayun, nkuâl Chư Sê dơn mât njrăng rlău 100ha bri bah Ban mât njrăng bri tu dak nching sial Chư Sê. Ăp  ntôr  bri ta aơ geh âk pih kro, tơm brônh brănh dơh jêng geh ŭnh sa bri. Nô Bùi Văn Khánh, rmôt mât njrăng bri Keo, xã Ayun an gĭt:

 “Oh nô way hăn rsong uănh bri lơn lah tâm rnôk duh hô kơt aơ. Lah geh nău tât ŭnh sa ri mpôl hên mbơh an mpôl mât njrăng bri n’hanh nhih pah kan dơi kan gay hăn  tât rdâng lơh dĭl”.

Lăp tâm nklang khay wai, Ban mât njrăng bri tu dak nching sial Chư Sê hŏ dăp rgum tay ăp tŏng 7 rmôt mât njrăng bri ; way hăn rsong uănh, mât kân ta ăp ntŭk dơh geh ŭnh sa bri. Nkre ƀư su mpă lor wăr  neh hvi rlău 400ha bri tăm n’hanh bri krŏng geh ma nău ŭnh sa bri âk ta 3 xã: Bar Maih, Ayun n’hanh H’Bông. Wa Đinh Mạnh Phong, Kruanh Ban mât bri tu dak nching sial Chư Sê, n’gor Gia Lai an gĭt, nău su pih rêp kro mât njrăng lor kơl pah kan njrăng n’gang ŭnh sa bri dơi mât kân.

          “Tât khay wai ri ndơ kro dơh ƀoh ŭnh sa, jêng rnôk su lor geh nău mât njrăng ri mbra hŭch bah đêt ndơ kro dơh ŭnh sa, mô geh ŭnh sa têh; ntơm  bah nê he mât dơi bri đăp mpăn lơn.”

Ban mât uănh bri tu dak nching sial Chư A Thai geh rnoh bri dăch kêng bar nkuâl Ia Pa n’hanh Phú Thiện, n’gor Gia Lai, đah bơi 19 rbăn ha bri. Wa Phạm Đắc Vịnh, Groi kruanh Ban mât njrăng bri tu dak nching sial Chư A Thai an gĭt: aƀaơ, aơ lah nkual geh mbơh njrăng lor geh ma nău ŭnh sa bri gưl V, (gưl dŭt klach rvê).

“Đơn vị hŏ tâm pă ƀư jêng 5 rmôt kan nsum nkre đah 125 rnăk dơn mât njrăng bri bah đơn vị an ƀư pah kan mât njrăng bri n’hanh njrăng n’gang ŭnh sa bri. Đah bri lha paih ma đơn vị dôl mât ri lor rnôk lăp tâm khay wai đơn vị hŏ kuaih su lor gay hŭch bah ir geh pih kro dơh ƀoh ŭnh sa gay njrăng n’gang bah geh  ŭnh sa bri”.

Gay njrăng n’gang ŭnh sa bri geh nău tam,  ntơm bah năm 2023 tât aƀaơ, UBND nkuâl Ia Grai ndrel ăp đơn vị tơm bri kan nsum đah n’gâng kan ta ntŭk ƀư 15 tơ̆  nkoch trêng Luật mât njrăng n’hanh hun hao bri ta 5 xã geh bri đah rlău 1000 tơ̆ nuĭh râng; ký ton đăp mpăn mât njrăng ŭnh long đah hang rhiăng rnăk gŭ rêh dăch kêng bri, phăt 2 rbăn lha siƀŭt an nuĭh ƀon lan ăp xã geh bri gay pah kan njrăng n’gang ŭnh sa bri geh nău tam âk.  Wa Đỗ Văn Đông, Groi kruanh UBND nkuâl Ia Grai, n’gor Gia Lai an gĭt:

“UBND nkuâl hŏ ƀư hăn ôp uănh ngăn geh ta du đêt ban mât njrăng bri n’hanh du đêt nuĭh tơm bri gay n’hao nuih n’hâm dơn kan tâm  nău njrăng n’gang ŭnh sa bri, lơn lah pah kan njrăng n’gang, mô an geh ƀoh ŭnh sa bri”./.