VOV4.M'nông: UBND n'gor Gia Lai mhe ƀư tâm nchră ŭanh năl pah kan 9 khay, an ƀư nău kan 3 khay kêng dŭt năm. Kruanh UBND n'gor Gia Lai đă ăp nuĭh kan UBND n'gor, ăp n'gâng kan, ăp nkuâl ndrel tâm rnglăp, nsrôih lĕ n'hâm suan, rđău đă tâm kơl nsum tâm trong an ƀư ăp kôp ăp nău kan, trong nkra gay ƀư lôch jêh ăp rnoh tât kan, nău dơi hun hao wăng sa- rêh jêng kon nuĭh, đăp mpăn njrăng n'gang neh dak- rnă njrăng năm 2022.

Lah ta rnôk tâm nchră, wa Nguyễn Hữu Quế- Giám đốc Sở Kế hoạch n'hanh Đầu tư Gia Lai an gĭt: Gia Lai lah ngoăy tâm ăp n'gor geh rnoh ngăch n'gluh tơm prăk rdâk njêng tơm đêt. Tâm nê, Ban mât ŭanh trong nchrăp kan ntuh kơl rdâk njêng n'gor n'hanh ăp n'gâng kan, ntŭk kan dơn mât ƀư ăp trong nchrăp kan têh khlay,  geh tơm prăk têh- geh rnoh n'gluh tơm prăk đêt. Ntĭt kơt nchrăp ƀư trong mpeh luh nar (geh rnoh ntuh kơl 1.200 rmen prăk) aƀaơ mhe lôch ƀư si ƀŭt, nchrăp pơk ndranh dơm; ƀư tâm chruh n'glah trong Phù Đổng (nkual ƀon têh Pleiku) ân mĭn uănh tay si ƀŭt. Rlău ma nê, ăp nkuâl mbrơi jao neh đă ntrơn du khuch tât rnoh ngăch ƀư trong nchrăp kan đŏng. Wa Nguyễn Hữu Quế- Giám đốc Sở Kế hoạch n'hanh Đầu tư Gia Lai nkoch nău ntĭt đah nău nchrăp ƀư trong Nguyễn Chí Thanh (nkual ƀon têh Pleiku) n'hanh trong hăn rloh nkuâl Chư Sê- Chư Pưh- Chư Prông (gâl hăn rlău nkuâl Chư Pưh):

      “Trong Nguyễn Chí Thanh, Nkual ƀon têh Pleiku mô hŏ jao du mét neh đêt gay ƀan mât ŭanh trong nchrăp kan an ƀư. Ƀan mât ŭanh aƀaơ dôl ƀư ta ăp gâl trong mô geh kol. Mô lah nău nkuâl Chư Pưh, Gâp nơm lah nuĭh ƀư kruanh mpôl leo hăn jŭr ôp uănh, ntrŭt ntrôl nkuâl đă ntrơn du 1,3km ta Thị trấn Nhơn Hoà. Kruanh UBND nkuâl Chư Pưh mhe ký trok tâm an 50 rnăk, hôm 34 rnăk jao an QL14 lah mô hŏ  dơi ndơ̆ an ơm".

          Tĭng wa Nguyễn Hữu Quế, nkô̆ n'gluh tơm prăk mbrơi lah tă bah pah kan nchrăp ƀư mbrơi, wăk kol ăp si ƀŭt n'hanh đă trok tâm, ntrơn du. Yơn lah, đah nău âk trong nchrăp kan ntơm an ƀư tâm quý IV ri rnoh ngăch n'gluh tơm prăk ngăch. Tâm let năp  tay, ăp tơm nuĭh ntuh kơl ân ntrŭt ntrôl nuĭh ndranh ƀư ngăch tâm ban kơt nău an ƀư ăp quy định bah pháp luật mpeh ntuh kơl rdâk njêng tơm gay đăp mpăn rnoh ngăch n'gluh tơm prăk ndơ̆ luh đŏng.

Mhe aơ nơh, Sở Kế hoạch n'hanh Đầu tư hŏ nsŏng kơl an UBND n'gor Gia Lai n'gluh âk si ƀŭt rđău đă an ăp tơm nuĭh ntuh kơl ntrôl dăng pah kan n'gluh tơm prăk n'hanh njêng 4 mpôl pah kan rgum hăn ôp ŭanh, ntrŭt ntrôl, droh rklaih jêr jŏt, kŏ kol gay ntrôl ngăch n'gluh tơm prăk ntuh kơl năm 2022. Tât aƀaơ, rnoh ngăch n'gluh tơm prăk rdâk njêng tơm bah n'gor geh 31%, bơi dah rĭng geh nsum bah lam dak.

       Mpeh sŏk prăk ngân sách, aƀaơ geh rngôch geh sŏk prăk ngân sách bah n'gor lah 4.100 rmen prăk, hŭch 30,7% rđĭl đah ndrel khay dja năm e nơh. Wa Nguyễn Anh Dũng- Giám đốc Sở Tài Chính Gia Lai an gĭt, nkô̆ lah n'gor dôl mâp jêr jŏt tâm trong sŏk prăk dŏng neh đah âk trong nchrăp kan. Wa Dũng dăn đă ăp trong nkra kơi ntop n'hao sŏk prăk ngân sách tâm ăp khay kêng dŭt năm:

     “Mpôl hên dăn đă UBND n'gor rgum rđău đă ăp n'gâng kan rgum ôp uănh tay lam ăp lĕ rngôch trong nchrăp ntuh kơl geh dŏng neh, gay ƀư lôch jêh ăp si ƀŭt gay nkre wăch rgum ntuh kơl, nkre mât dŏng săk geh, nkre đăp mpăn săk geh tơm sŏk. Nkô̆ tâl bar, mpôl hên kan nsum đah Cục Thuế ôp uănh tay ăp tơm sŏk geh tâm 3 khay kêng dŭt năm gay đăp mpăn rnoh geh sŏk ngân sách năm 2022”.

        Bah meng nkô̆ nău ntuh kơl n'hanh sŏk prăk ngân sách, tâm nchră bah UBND n'gor Gia Lai nkoch âk nkô̆ nău geh tât nkra ƀư êng êng đŏng kơt: rgâl dơh uĕh ntŭk ntuh kơl, nuh srê ta tơm tăm n'hanh sŭr ndrôk, bôk nău kan dâk hao tay wăng sa, tăch n'gluh ndơ tuch tăm....Lah ta rnôk rđău đă tâm nchră, wa Trương Hải Long- Kruanh UBND n'gor Gia Lai đă kruanh rđău kan ăp n'gâng kan, ăp nkuâl tâm n'gor, tâm rnglăp,  tâm rgop kan nsum an ƀư dĭl ăp trong nkra, gay ƀư lôch jêh ăp rnoh tât kan, rnoh tât kan wăng sa- rêh jêng kon nuĭh năm 2022 bah n'gor:

      “Rgum an ƀư ăp nkô̆ hôm mbrơi rđĭl đah trong nchrăp hŏ ndơ̆ luh ăp trong nkra droh rklaih ăp jêr jŏt, nchiăng khan tâm trong kan: sŏk geh prăk ngân sách, n'gluh tơm  prăk rdâk njêng tơm, ăp trong nchrăp kan, bôk nău kan dâk hao tay wăng sa-  rêh jêng kon nuĭh; trong kan dak si, trong nchrăp dŏng neh ta ăp nkuâl; ƀư njêng tăch rgâl, nuh srê ta si tăm ndơ mât; nô nău tih pháp luật. Kruanh ăp nhih pah kan, ăp n'gâng kan, đơn vị, Kruanh UBND ăp nkuâl, thị xã ndăn an ƀư ăp nău kan ma ăp oh nô Groi kruanh UBND n'gor hŏ lah".

Kruanh UBND n'gor Gia Lai đă ăp nuĭh kan tâm UBND n'gor, ăp n'gâng kan, ăp nkuâl ndrel tâm rnglăp, rđău đă lĕ n'hâm suan, nsrôih kan nsum, tâm kơl nsum tâm nău an ƀư ăp kôp ăp nău kan, trong nkra gay lôch jêh ăp nău kan, rnoh tât kan hun hao wăng sa- rêh jêng kon nuĭh, đăp mpăn njrăng n'gang neh dak- rnă njrăng năm 2022.

VOV.Tây Nguyên

Nuĭh rblang: Điểu Thân