N’gor Gia Lai dôl an ƀư rơh hăn ôp uănh, rmal lhăt ăp nuĭh tih tăch ndơ rlăm, ndơ mô nâp uĕh n’hanh tih nău dơi dŏng bôk rngok nău gĭt blău,. Rơh rdôl lơh hŏ rgop đăp mpăn ntŭk tăch rgâl, mât njrăng nău dơi nuĭh dŏng ndơ n’hanh n’hao săk tam mât bôk kan ngih dak.

Ta siêu thị Co.opMart Pleiku, n’gor Gia Lai, mông nar rvăt năp ƀư khuh n’gôr. Ăp ndrơng ndơ dơi dăp rgum mprĭp uĕh, srăch se đah tŏng ăp ntil ndơ geh ƀư, ntơm bah ndơ dŏng tâm rnăk wâl tât ăp ndơ dŏng khlay êng ƀa ƀă. Tĭng ntil ndơ tăch dơi uănh năl na nê̆ lor rnôk pla tăch, đăp mpăn gĭt kloh tơm luh. Wa Châu Hoàng Thy, Groi Giám đốc siêu thị Co.opMart Pleiku, nkoch:  

“Ta siêu thị ndơ tăch dŭt âk ntil n’hanh mpưm mpŏ, ăp ndơ geh ƀư bah ăp nuĭh tơm pă an nsing nơm geh kơp dơn ISO 9000, ăp ndơ geh ƀư nsing nơm săk kah. Mpôl hên way dâk mpeh nuĭh dŏng sa, mpeh mât kah uĕh ndơ tăch bôk năp an tât rêng sơch ndơ pla tăch, mât chăm ndơ ta ndrơng way đăp mpăn nđĭr uĕh, mô an ndơ geh pop pep, nhop huănh, khuch djơh, ký ton đah nuĭh tơm tăch kơp dơn bah ngih pah kan Ngih dak gưl bah lơ pă an”.

Mô dơn ta ăp siêu thị têh, nău đăp mpăn dơn ndơ tăch dơi ăp nuĭh tăch chrai ndơ ta ntŭk uănh khlay đŏng. Yuh Trần Kim Huế, nuĭh tơm tăch ndơ Sơn Huế ta thị trấn Chư Ty, nkuâl Đức Cơ, mpơl nău ŭch rŏng mpôl kan dơi kan ân ôp uănh na nê̆ lơn ăp trong tăch ndơ online n’hanh ndơ bah n’har bri gay mât njrăng nuĭh tăch ndơ tâm di.

“Gâp tăch ăp ndơ công ty jao, geh siƀŭt ton đăp mpăn kloh uĕh ndơ sa, siƀŭt kơp dơn srăch uĕh ndơ tăch ri gâp mơ n’glăp. Ndơ mô gĭt kloh tu  tơm luh ri gâp mô n’glăp đŏng yor nuĭh ƀon lan aƀaơ bu hăn rvăt ndơ dŭt blău sơch ngăn đŏng, lah hăn rvăt ma mô geh ntŭk nsing, mô geh ntô lĭr ri khân păng mô ŭch rvăt đŏng."

Tâm rnôk pơk rơh hăn ôp uănh âk ntơm bah nar 15/5 tât 15/6, mpôl kan dơi kan n’gor Gia Lai hŏ ban saơ nklăp 90 tơ̆ nău tih, rmal lĕ rngôch rlău 1,7 rmen prăk. Dŭt njrăng uănh khlay, Công an n’gor hŏ ban saơ n’hanh lah phong 2 tơ̆ tăch rgâl, ƀư njêng cà phê ndơm rlăm. Du tơ̆ geh tât ƀư phân poh n’hanh ndơ dŏng kan tuch tăm dôl ôp uănh tay gay rmal lhăt đŏng. Wa Lê Hồng Hà, Chi cục trưởng Chi cục mât uănh ntŭk tăch rgâl n’gor Gia Lai, an gĭt:  

“Tâm nkô̆ rđău đă bah Thủ tướng Chính phủ mpeh nău pơk rơh lơh rmal rnôk dja ăp nkô̆ rgum tơm geh tât ndơ tăch nuĭh ƀon lan dŏng nê lah ndơ sa lah nsum n’hanh ndơ ngêt sĭt dăng suan, dak si rlăm tăch rgâl lah êng. Ban rđău đă n’hanh rmôt pah kan mha êng bah n’gor Gia Lai rgum tâm ăp mpeh pah kan nê. Bah meng nê n’gor rđău đă rgum tâm ăp trong kan ôp joi kơt pring xăng, phân poh, ndơ dŏng kan tuch tăm gay đăp mpăn njrăng n’gang n’hanh mât njrăng nău dơi tâm di an nuĭh ƀon lan n’hanh doanh nghiệp tăch rgâl ta ntŭk đŏng.”

Mô dơn n’glĕ ta trong kan tăch rgâl, n’gâng kan dak si n’gor Gia Lai lăp kan dăng tâm nău ôp uănh, rmal nuĭh tih đŏng. Sở Y tế n’gor hŏ njêng 2 rmôt ôp uănh êng mpeh nău kan tăch rgâl dak si, dak si nkrơ̆ n’hanh đăp mpăn kloh uĕh ndơ sa. Lôch hăn ôp uănh ta ăp ntŭk tâm dâng kơt ta nkual ƀon têh Pleiku, nkuâl Đức Cơ, Ia Pa n’hanh thị xã Ayun Pa, hŏ ban saơ 5 ntŭk tih. Ăp nău tih lơn âk mô mbơh ndơ tăch, mât prăp mô di kơt nău nchih bah lơ ntô, n’hanh mô geh ndơ pla nchih nkual mât prăp. Wa Ksor Hiền, Groi Giám đốc Sở Y tế n’gor Gia Lai, lah rjăp:  

“Tâm let năp tay Sở mbra mât tay nău kan gay  đăp mpăn mât kơt ơm săk tam bah dak si, dak si nkrơ̆ n’hanh ndơ ngêt ta nkual. Đah nău nsrôih mô geh nkual mpăng, nkra rmal di rnoh jru n’hanh rnoh têh âk ndơ tih, tâm mpôl hăn ôp uănh njêng way geh thanh tra, nuĭh mât uănh ntŭk tăch rgâl, công an tâm mpôl hăn ri ăp nău dơi tam hăn ôp uănh rmal lơh dơi mbơh gưl bah lơ gay n’glêh an rmal năn ngăch đŏng.”

Ăp nău nsrôih ăp kôp bah ăp gưl, ăp n’gâng kan ta Gia Lai hŏ rgop n’hao nău gĭt êng bah nuĭh ƀon lan, doanh nghiệp tâm nău tĭng di pháp luật, nkre njêng ntŭk tăch rgâl kloh rvah, đăp mpăn n’hanh mô mpôn mo.