Ntơm rnôk nuĭh ƀon lan lăp Ntŭk kan rhŏ an hành chính nsum phường Hội Phú, n’gor Gia Lai, rô bốt AI lĕ ôp khâl lor, năl nău ŭch n’hanh ntĭm ƀư ăp samƀŭt hành chính. Aơ lah nău ngơi rô bôt ntĭm 2 băl mom tât ƀư samƀŭt dăn tâm gŭ ur sai.

“Gay ƀư samƀŭt dăn gŭ ur sai, băl an nchrăp samƀŭt mbơh dăn tâm gŭ ur sai tĭng samƀŭt sŏk ta nsưng kan, căn cước công dân hôm e khlay năm dŏng gay uănh năl săk, samƀŭt năl ta ntŭk gŭ bah ur, sai, đă bu klô tŏng 20 năm, bu ur tŏng bah 18 năm”.

Đah nău dơi uănh joi n’hanh ơh ăp nău ôp geh tât samƀŭt dăn tâm gŭ ur sai, samƀŭt dŏng neh, ndâk ƀư ngih wâl, ntŭk gŭ...., rô bốt AI kơl nuĭh ƀon lan gĭt kloh ăp ntil samƀŭt rhăch nău, trong ƀư tĭng kơt ntŭk nsưng kan wơt dơn samƀŭt rhăch nău du trong ngăch, dơh. Wa Nguyễn Mạnh Thi tât ƀư samƀŭt rgâl nău ŭch dŏng neh an gĭt, ƀư ngăn nău mhe aơ ƀư an wa dŭt ndrăt.

Ntĭm gâp dŭt uĕh, tât ntŭk ôp khâl he, ntĭt nsa kơt nău ŭch tât ntŭk kan ƀư samƀŭt rô bốt mbra ndơ̆ he tât ntŭk kan nĕ. Nuĭh ranh ri geh rnôk mô gĭt lât mrô ri he ŭch tât ntŭk jêh ƀư mô lah mpeh neh ntu ndâk ƀư ri he lah n’hanh rô bốt ntĭm he tât ntŭk nĕ.

Tĭng wa Trần Công Danh, cán bộ Ntŭk kan rhŏ an hành chính nsum phường Hội Phú, rô bốt AI gĭt blău mhe dơi UBND phường ntuh kơl n’hanh ndơ̆ an dŏng bah khay 8/2025. Gay dŏng săk rnglăy, rô bốt dơi nglăp tŏng ăp samƀŭt samtra geh tât ăp samƀŭt hành chính, ăp ntil samƀŭt rhăch nău, trong ƀư tĭng n’hanh dơi ƀa ƀơ “tiăr nti” gay n’hao dơi pah kan đah nuĭh ƀon lan.

Kon rô bốt AI aơ dơi nglăp samƀŭt samtra geh tât ăp samƀŭt hành chính kơl an nuĭh ƀon lan dơh tâm nău uănh joi. Nău bôk năp lah mpôl hên ndơ̆ ăp samƀŭt samtra hành chính, ăp samƀŭt ŭch khlay n’hanh trong ƀư ăp samƀŭt, trong sŏk mrô, ntĭm nuĭh ƀon lan tât ăp ntŭk kan gay ƀư ăp samƀŭt he an ndơ̆ ăp nu nău mbơh samƀŭt samtrra geh tât gay rô bốt năl n’hanh wât, kơt ƀa ƀơ tiăr nti gay rô bốt blău ăp nău ƀư.

Tĭng rnoh kơp, rĭng du nar rô bốt AI ta phường Hội Phú ntop kơl, mbơh ntĭm an rlău 100 nuĭh ƀon lan tât mkra samƀŭt hành chính.

Knơm nău ntop kơl bah rô bốt AI, rnoh mkra samƀŭt rhăch nău n’hanh mplơ̆ jêh ƀư di nar ta Ntŭk kan rhŏ nău hành chính nsum phường Hội Phú âk khay na nao geh rlău 95%. Wa Hoàng Minh Nghĩa, Groi Kruanh UBND phường Hội Phú, mĭn lah nău dŏng công nghệ AI lĕ nsĭt săk rnglăy na nê̆ tâm rgâl nkra hành chính ta ntŭk, pơk luh trong gĭt tât mhe, dăch dêh lơn rhŏ an nuĭh ƀon lan, doanh nghiệp.

 Măy lĕ ntĭm ri rnoh di âk, samƀŭt samtrra lĕ dơi rgâl du trong di na nê̆ ri nuĭh ƀon lan dŭt ŭch. Ăp nuĭh way kan mbra geh âk mông nar uănh tât tâm nău kan ndơn yor rblang. Lah an rblang ri mbra geh âk mông nar pah kan, aƀaơ măy rô bốt ntop kơl ri nuĭh way kan uănh âk tâm nău kan ri rnoh nău kan mkra âk lơn, mkra ngăch n’hanh dơh đêt nkân./.