Wa Bạch Văn Mạnh, Giám đốc N’gâng kan Nội vụ n’gor Dak Lak, uănh năl UBND n’gor lĕ dơi dơn sam ƀŭt dăn sam ƀŭt dăn rlu ranh ơm bah wa Nguyễn Văn Nghiêm, Groi Giám đốc N’gâng kan Công Thương n’gor. Tĭng nĕ, lơ 2/1, wa Nghiêm lĕ njuăl sam ƀŭt tât Ban Thường vụ N’gor ủy Dak Lak, UBND n’gor Dak Lak n’hanh N’gâng kan Công Thương, nkoch nău ŭch dăn dơi rlu ranh ơm.

Tâm sam ƀŭt, wa Nghiêm nkoch lĕ 40 năm pah kan, wa lĕ râng âk nău kan n’hanh lôch uĕh nău kan dơi jao. Nsing nơm nău ntrŭnh, nău kơl mhe bah Đảng n’hanh Ngih dak, gay nta dơh tâm năp dăp rmôt n’gâng kan ƀĭt joet, wa ŭch an dăn rlu ranh ơm. Giám đốc N’gâng kan Nội vụ n’gor Dak Lak an lah nău wa Nguyễn Văn Nghiêm dăn rlu ranh ơm lah nău ntrŭnh di khlay, geh nău nchrăp lor, nuih n’hâm lĕ đah nău kan, nkre kơl ăp ngih pah kan, ban ngành gưl bah lơ dơh tâm nău ƀư tĭng ăp ntĭm rđău bah Trung ương mpeh dăp n’gâng kan ƀĭt joet.