Nkhêp nkah ndray nar bu ur lam ntŭr neh 8/3, ôi 6/3, Groi Kruanh dak Võ Thị Ánh Xuân geh rơh mâp măt ăp bu ur Đại sứ, Ntơh măt,  Kruanh nuĭh ntơh măt ăp mpôl kan dak bah dih ta Việt Nam n’hanh khâl ăp ntŭk têl ơm yău ta ƀon Đồng Kỵ, Từ Sơn, Bắc Ninh.

Lah ta rơh mâp măt, Groi kruanh dak Võ Thị Ánh Xuân lah rjăp,  uănh tay du njăr trong  jong rdâk njêng n’hanh mât njrăng neh dak bah rnoi nuĭh Việt Nam, way geh nău n’groh an, nău rgop têh kuâng bah ăp rơh kơn bu ur ndrel tâm rnglăp, nsum suan rdâk njêng n’hanh mât njrăng têh jêng neh dak. Tâm ăp năm aơ, Ngih dak Việt Nam mô  rlu ƀư lôch jêh n’hanh tĭng ƀư geh nău tam ăp trong kơl gay mât đăp mpăn nău dơi bu ur, ntrŭt ntrôl tâm ban bu ur klô n’hanh nău rgâl mhe bah bu ur. Aƀaơ, ta Việt Nam, bu ur âk rlău 50% rnoh nuĭh lam dak n’hanh  dôl mât tay nău kan khlay tâm rơh rdâk njêng n’hanh rgâl mhe neh dak. Ta nar ƀư đŏng,  Groi kruanh dak mpơl nău lah uĕh n’hanh nău mpŏng,  ăp bu ur Đại sứ, Ntơh măt, Kruanh ntơh măt ăp mpôl  kan dak bah dih  mbra ndrel  hăn tay, tâm boh,  ntop kơl Việt Nam tĭng ƀư geh nău dơi rơh rgâl  mhe n’hanh lăp rgum  dak bah dih, tâm  nê  geh ăp rnoh tât geh mpeh tâm ban bu ur bu klô  n’hanh ntăm an nău dơi an bu ur./.