Ta rơh tâm mâp đah kruanh n’gâng kan nchră nău đah dak bah dih Lào  Thongsavanh Phomvihane, bar ding lĕ tâm ban ŭch tâm rgop tay na nê̆, tâm kơl ndrel ta ăp rơh tam mâp âk ding, ngăn lah tâm ASEAN mpeh ăp nău kan tơm ta nkual, tâm nĕ geh nău ta Biển Đông. Ta rơh tâm mâp đah kruanh n’gâng kan nchră nău đah dak bah dih Thái Lan Maris Sangiampongsa groi Thủ tướng, kruanh n’gâng kan nchră nău đah dak bah dih Bùi Thanh Sơn ƀư lôch tâm ban ŭch n’hanh lah na nê̆ nău kơl an bâh ăp nău mĭn kan tâm rgop nău pâl nđaih tâm nkual ASEAN, ntrôl nău tâm rgop ta rơh nău kan ACMECS, nkre lah đă Thái Lan an geh nta nău dơh nơih tay an âk nuĭh Việt ta Thái Lan. Ta rơh tâm mâp đah kruanh n’gâng kan nchră nău đah dak bah dih n’hanh tâm kơl kan lam ntur neh Campuchia Prak Sokhom, bar ding lĕ tâm ban ŭch an geh tâm rgop tay na nê̆, tâm ban kơt ntrôl ăp n’gâng kan, ntŭk kan êng n’hao săk rnglăy ăp trong kan tâm kơl bar ding aƀaơ geh, ntrôl nău tâm kơl kan lĕ rngôch ta lĕ ăp trong kan, tâm nĕ uănh khlăy tât n’hao tâm mbơh nău kan n’hanh tâm mâp gâl têh, tâm rgop ndơ dŏng ntung trong, trong hăn, mpông n’har bri, ntrôl dăng tay lơn nău tâm kơl tăch rgâl, n’hao nău tâm nđur ƀon lan, pơk hvi tâm kơl kan pâl nđaih.