VOV4.M’nông – Kêng măng 25/9, Groi Thủ tướng Chính phủ Lê Văn Thành lĕ ƀư tơm rơh rƀŭn trực tuyến ƀư rdâng đah phŭt Noru. Tĭng wa Trần Hồng Thái, Tổng cục trưởng Tổng cục Khí tượng Thủy văn, phŭt Noru dôl hăn Biển Đông n’hanh mbra jêng phŭt mrô 4 tâm năm aơ. Aơ lah rơh phŭt dăng năm tâm 20 năm plơ̆ ma aơ khuch tât nkual Trung Trung bộ.

Groi Thủ tướng Lê Văn Thanh ntĭm rđău rdâng đah phŭt Noru.

Ntoh ngơi ta rơh rƀŭn, Groi Thủ tướng Chính phủ Lê Văn Thành đă ăp n’gâng kan, ăp ntŭk an njrăng ƀư trơn nuĭh ƀon lan, kuăl jă duk mpan sĭt ntŭk đăp mpăn đah nuih n’hâm mô an thơ tha, roh nău njrăng. N’gâng kan mât njrăng bri dak, N’gâng kan ntung trong tâm rgop đah ăp ntŭk uănh nđôi nkre ndơ̆ duk mpan hôm e ta dak lêng sĭt dêr phŭt, nkre đăp mpăn an nuĭh ƀon lan, dêr an geh nău duk sĭt ntŭk dêr hôm e geh khuch.

Ta mpeh ba lơ nkual Tây Nguyên, n’gor Kon Tum geh nchroh lah mbra geh nău tât dŭt dăng bâh rơh phŭt sial Nô-ru. Gay ma tâm rdâng đah nău tât bâh phŭt sial, UBND n’gor Kon Tum lĕ geh công điện đă n’gâng kan ăp ntŭk, n’gâng kan têh n’hanh ăp ntŭk leo kan mât uănh dak bât tŏ djrah, dak bât pă điện rgum tâm rdâng. Tĭng nĕ, kruanh UBND n’gor Kon Tum Lê Ngọc Tuấn đă UBND ăp nkuăl, nkuăl ƀon têh n’hanh ăp ntŭk kan, n’gâng kan têh mbơh tơih nău kan tâm rdâng đah phŭt sial tĭng trong kan “4 ta ntŭk” tâm di đah nău tât ngăch bâh phŭt sial, nău tât na nê̆ ta ntŭk n’hanh mbơh nău, mbơh njrăng ngăch tât ƀon lan gay ma njrăng der. Ăp nkuăl, nkuăl ƀon têh mbơh tơih ăp nuĭh tât pah kan uănh nđôi, ngăch năl, uănh ta ăp nkual ƀon lan gŭ dăch pĭt dak me, dak diăng, dak bât, nkual rđŭng, nkual mbra geh dak bŭk âk, pĭch rluh neh gay ma leo ƀư ntrơn nuĭh ƀon lan rnôk geh nău tât ndal.

VOV (Nuĭh rblang: Y Sưng Phê Ja)