Kêng măng 21/10, Groi Thủ tướng Lê Tiến Châu ndrel rmôt hăn kan bah Chính phủ pah kan đah Rnâng kan n’gor uỷ Quảng Trị mpeh ăp ntrong kan gay ntrŭt dăng nau hun hao văng sa bar rnoh mrô. Tĭng nau mbơh, nau hun hao văng sa 9 khay năm 2026 bah n’gor Quảng Trị geh rlau 8,4%, nau dŏk soay geh bơi tât 9.200 rmen. Ntoh nau tâm nar rƀŭn Groi Thủ tướng Chính phủ Lê Tiến Châu nchŏng luh 3 nau jêr têh, geh nau hun hao ê geh kơt nau ŭch, nau nsôih hun hao hôm nsing tâm du đê̆ nau kan ŭnh nar têh ndrel nau ngăch bah nau leo dŏng tơm prăk ntuh kơl hôm mbrơi.

Groi Thủ tướng đă n’gor ân geh rgum ƀư 8 nau kan tơm, tâm nê uănh năl nau geh dŏng prăk ntuh kơl nsum lah nau kan chính trị; doh rklaih ăp nau nkol bah ăp nau kan hôm nkol; ƀư ueh dăng nau geh ŭnh nar, ndrâm dak lêng, mpông trong đah dak ba dih ndrel trong kan văng sa Đông-Tây; ơm ƀư jêh ăp bôk nau kan văng sa tăch rgâl bah trong n’har Lao Bảo-Densavan ndrel hun hao đặc khu Cồn Cỏ. Nkre lah, n’gor ân geh n’hao nau nâp nau kan ntĭm nti jêh rnôk dăp rgum trong kan ngih săm ƀŭt./.