Ta rơh mâp, Đại sứ Việt Nam ta Bỉ, Kruanh mpôl đă hăn kan Việt Nam ta Liên minh châu Âu Nguyễn Hương Trà an gĭt, aƀaơ geh nklăp 1,5 rkeh nuĭh Việt Nam gŭ rêh ta châu Âu.

Ƀon lan nar lơn ma rơ̆ jêng, lăp rgum uĕh, tâm rnglăp, mât săk tơm văn hóa n’hanh geh âk nău rgop an ƀon tơm, neh dak. Lah ta aơ, Tổng Bí thư, Kruanh dak Tô Lâm nchih nkah, rnê âk ăp nău rgop bah ƀon lan Việt Nam ta châu Âu, lơn lah nău khlay kan bah ăp mpôl tâm rdâk nâp tâm rnglăp n’hanh ntrŭt ntrôl tâm boh dêh bên đah Việt Nam đah ăp dak. Lah rjăp neh dak dôl lăp tâm rơh hun hao mhe, Tổng Bí thư, Kruanh dak dăn đă ƀon lan gŭ dak bah dih ntik n’hao bôk rngok gĭt blău, nău tă ơm gĭt kan, tơm ndơ; buăt nthoi doanh nghiệp, nuĭh rnâng kan, nuĭh gĭt blău n’hanh ntrŭt ntrôl ndơ̆ rgâl khoa học, công nghệ sĭt dak nơm. Ăp nhih pah kan ntơh măt Việt Nam ta dak bah dih ân ƀư jăp pah kan nkrum kơl ƀon lan, ntop kơl nsum mpôl, nta trong dơh gay ƀon lan rgop ngăn ngăn tâm n’gâng kan rdâk njêng n’hanh hun hao neh dak.