Ƀư tĭng nău ntĭm đă bâh Thủ tướng Chính phủ, nar 7-4, ta n’gor Tiền Giang, groi Thủ tướng Chính phủ Trần Hồng Hà ndrel đah wa Lê Minh Hoan, kruanh n’gâng kan tuch tăm mât rong n’hanh hun hao ƀon lan n’hanh wa Đặng Quốc Khánh- kruanh n’gâng kan Tài nguyên n’hanh môi trường leo rơh rƀŭn nchră trực tuyến đah ăp nkual Đồng Bằng Sông Cửu Long geh: Tiền Giang, Bến Tre, Sóc Trăng, Cà Mau, Kiên Giang, Bạc Liêu, Long An mpeh nău kan aơ. Yan wai năm aơ yor rnoh dak me Mê Kông hŭch 7% đah ăp năm ba năp jêng nkual Đồng Bằng Sông Cửu Long geh nău tât khuch âk bâh dak tiăp boh, jru lơn đah âk năm, mih tât jŏ lơn; ngăn lah geh 3 rơh duh phang lăp dak tiăt boh dŭt âk bâh bôk khay 5.

Ntoh ngơi ta rơh pah kan đah mpôl pah kan bâh Chính phủ, nuĭh leo kan ăp n’gor đă ăp n’gâng kan, ntŭk kan Trung ương n’hanh Chính phủ kơl rdâk njêng ƀư lôch ăp nău kan ƀư dak bât tŏ djrah gay ma ƀư mpôn, dak bât ngâr dak dŏng, ăp nău kan kơl an dak kloh rgum ta nkual duyên hải, ndâk nsơm nău rluh neh...Ntoh ngơi nglôch lôch rơh pah kan, Groi Thủ tướng Trần Hồng Hà nkah đă ăp nkual đồng bằng sông cửu long an geh rhoăt luh ăp nău tă gĭt pah kan tâm nău kan njrăng rdâng dak tiăt boh lăp, uănh năl tay rnoh dak mur, geh trong kan leo kan rêh nsum njrăng dak tiăt boh lăp ta ăp ntŭk, ƀư ueh ăp trong dak bât.