Kêng măng nđaơ (9/7), Groi Thủ tướng Chính phủ Trần Hồng Hà, Kruanh Phân ban Việt Nam n’hanh Groi Thủ tướng Nga Dmitry Chernyshenko, Kruanh Phân ban Nga lĕ tâm ban ŭch rơh rƀŭn trực tuyến gay tâm rgâl mpeh ăp trong ntrôl kan ndrel ngăn ngên, săk rnglăy ta ăp ntil nău mpeh tâm trôm Ủy ban 2 chính phủ Việt Nam-Nga mpeh kan ndrel wăng sa-tăch rgâl n’hanh khoa học-kỹ thuật.

Ta rơh rƀŭn, 2 Groi Thủ tướng lĕ ndrel uănh tay nu nău kan ndrel n’hanh uănh lah ăp săk rnglăy dơi geh tâm sam ƀŭt rơh rƀŭn tal 24 Ủy ban 2 Chính phủ Việt Nam-Nga mpeh kan ndrel wăng sa-tăch rgâl n’hanh khoa học-kỹ thuật (khay 4/2023); tâm ban ŭch đah nău nsrôih dăn đă ăp trong mkra gay n’hao săk rnglăy kan ndrel ăp ding, tĭng nău ŭch geh ndrel bah ăp dak n’hanh nău tâm boh kan ndrel têh hvi lĕ rngôch Việt Nam-Nga. 2 Groi thủ tướng mĭn lah mbra ntĭm rđău n’gâng kan, nău kan 2 dak tâm rgop rjăp tay gay nchrăp uĕh an rơh rƀŭn tal 25 Ủy ban 2 Chính phủ Việt Nam-Nga êp ƀư tâm năm 2024.