Dơn nău jă bâh Chính phủ Cộng hòa Cuba, Groi Thủ tướng Trần Lưu Quang ntơm tât khâl tâm rnglăp ngăn Cuba bâh lơ 14 tât 19/4. Kêng măng lơ 15/4, Groi Thủ tướng Trần Lưu Quang lĕ geh rơh tâm nchră đah groi Thủ tướng tal 1 nkre kan kruanh n’gâng kan Ngoại thương n’hanh ntuh kơl dak bah dih Cuba Ricardo Cabrisas. ndơn kan an chính phủ ƀon lan Việt Nam, Groi Thủ tướng mpơl nău ŭch lah ueh ngăn đah nău kơl kan tâm pêt tâm rŏng bâh nuĭh leo kan Fidel Castro, ăp rơh nuĭh leo kan n’hanh ƀon lan Cuba an Việt Nam tâm nău kan rklaih đăp mpăn mpôl rnoi, rdâk njêng n’hanh mât ngih dak.

Groi Thủ tướng lah na nê̆ Chính phủ Việt Nam nsrôih mbơh tơih ƀư ăp nău kan kơl an Cuba n’hao nău pah kan tuch tăm ta nău kan đồng chí, oh nô, săk rnglăy, na nê̆. Nkre lah na nê̆ nău khlăy bâh doanh nghiệp n’hanh nuĭh ƀon lan 2 dak tâm nău mbơh tơih, n’hao an săk rnglăy ăp nău nchrăp kan tâm kơl bar ding, đă Chính phủ Cuba mât kơl, nta nău dơh nơih gay ma doanh nghiệp Việt Nam ntuh kơl geh nău dơi ta Cuba. Bar hê Groi Thủ tướng tâm ban ŭch an tâm rgop tay na nê̆ ta nău mbơh tơih ăp nău tâm ton gâl têh lĕ dơi geh, n’hao an săk rnglăy tay lơn nău kan bâh Ủy ban 2 chính phủ gay ma ntrôl ăp nău nchrăp kan tâm kơl kan tơm khlăy, joi rơh nkhêp kơl an doanh nghiệp Việt Nam tăch rgâl, ntuh kơl ta Cuba, tâm rgop ta nău tâm boh kan 2 ding.