Hăn kan dak bah dih lah ngoăy tâm ăp trong nkra geh nău tam gay nta joi nău kan,  n’hao nău geh, đăp mpăn nău rêh n’hanh hŭch ach o jŏ jong. Saơ bah nău dja, ăp năm mhe aơ, n’gor Dak Lak hŏ an ƀư  âk trong nkra ntrôl dăng pah kan hăn kan dak bah dih.  

Rnăk wa Lê Thị Phi Yến, ta tổ dân phố 7, thị trấn Krông Kmar, nkuâl Krông Bông bar pe năm bah năp nơh nha hôm mpeh rnăk ach o đŏng. Năm 2019, rnôk kon ndăm Lê Đăng Khoa hăn kan ta dak Nhật Bản, nău rêh bah rnăk wâl wa hŏ rgâl. wa Yến an gĭt, ăp khay, lôch n’hâm lĕ prăk dŏng sa, nô Khoa njuăl an rnăk wâl 20 rkeh prăk.  Nơm geh kơt nê, lôch du năm, ntơm bah prăk kon njuăl sĭt, wa Yến hŏ trok dơi rnon manh lor bah năp nê nơh; nkre geh tơm prăk ƀư ndrung n’gar mât rong sŭr, djăr n’hanh ntu ka hun hao wăng sa:

“Kon hăn lôch 3 năm gŭ bah nê nău rêh đăp mpăn, geh prăk njuăl sĭt gay ƀư nhih jay đŏng, mô dơn nê kon he tât dơi đah nău rêh mhe gĭt blău hôm păng ƀư dơi nău nê uĕh an nău rêh he saơ dŭt rhơn răm ngăn. Uănh nsum ta aơ geh âk nuĭh ngăn đŏng mô dơn êng rnăk hên, nsĭt du đêt tơm prăk têh âk đŏng, uănh nsum đăp mpăn.”

Jay âk kon jêng bol he kan ŏ r’ah wăr năm yơn nău  rêh bah rnăk wâl wa Y Hai Niê, ta buôn Hluk, xã Ea Tiêu, nkuâl Cư Kuin nha hôm jêr jŏt ngăn đŏng. Gĭt dơi nău lư hăn kan dak bah dih, rnăk păng hŏ manh prăk gay an kon bu ur lah H’Hằng B’Krông hăn pah kan ta Nhật Bản. Đah nău kan ƀư  jut rao jay gŭ, khách sạn, H’Hằng dơi trok 4 rkeh prăk/nar. Lôch 1 năm pah kan H’Hằng hŏ njuăl prăk sĭt gay me bơ̆ trok lĕ rnoh prăk manh. Aƀaơ lĕ 2 hê ur sai yuh H’Hằng hăn kan ta Nhật Bản da dê, ăp khay njuăl prăk kơl me bơ̆. Wa Y Hai Niê lah:

“Kon hên hăn kan dak bah dih gay kơl du gâl nău rêh bah he bah ir jêr jŏt. Aƀaơ hŏ bah ir jêr jŏt, nău rêh hŏ  mbơm oi, mpŏng an kon ƀư jăp jêh aơ tay hun hao tĭng kơn”.

Tĭng rnoh mbơh bah Sở Lao động Thương binh n’hanh Xã hội n’gor Dak Lak, lvang năm 2019 tât khay 10/2023, lam n’gor hŏ geh 5.763 nuĭh hăn kan dak bah dih. Ăp ntŭk hăn kan lơn âk ta Nhật Bản, Đài Loan, Hàn Quốc…, đah ăp nău kan lơn âk lah: Cơ khí, rdâk njêng, ntrŭp điện tử, tuch tăm mât rong… Rĭng geh bah nuĭh hăn kan dak bah dih nklăp 20 rkeh prăk/nuĭh/khay. Tĭng wa Đặng Thị Huyền Trang, Groi kruanh Jrô kan Lao động Thương binh n’hanh Xã hội nkuâl Cư Kuin, ăp  năm aơ, pah kan njŭn leo nuĭh hăn kan dak bah dih tĭng nău tâm ton dơi ăp gưl, ăp n’gâng kan uănh khlay ntop kơl, yơn I ngăn rnoh âk nuĭh hăn kan dak bah dih tĭng nău tâm ton nha hôm đêt rđĭl đah tơm nuĭh kan bah n’gor. Nău hăr blău ti kan, ngơi dak bah dih, nău ngăch kan công nghiệp hôm đêt. Yor kơt nê̆, gay tơm nuĭh kan hăn pah kan săk blău ri rêng nkoch trêng, sơch n’hanh rƀŏng ntĭm nti nău kan tâm ban kơt sơch ntŭk hăn kan lah nău dŭt khlay đŏng:

“Tâm let  năp tay, Jrô kan Lao động Thương binh Xã hội n’hao dăng pah kan nkoch trêng, đăm gĭt jru hvi ăp trong nchrăp, trong kơl bah Đảng n’hanh Ngih dak  tâm ban kơt bah n’gor mpeh ăp nău kan dak bah dih đŏng kơl nuĭh kan n’hao nău gĭt êng gay rƀah gĭt nău lư ntŭk pah kan, ntrôl dăng tay ăp trong ntĭt leo tâm njêng gưl xã, ăp doanh nghiệp n’hanh nuĭh kan; leo ƀư ăp rơh rblang nău ngơi nău kan, uănh khlay sơch tơm nuĭh kan săk blău âk tâm ban kơt nsŏng kơl Ủy ban nkuâl mpeh an manh tơm prăk hăn kan dak bah dih.”

Nghị quyết Đại hội Đảng bộ n’gor Dak Lak tâl XVII n’gluh rnoh tât lvang năm 2021-2025, Dak Lak nsrôih nta joi nău  kan an 150.000 nuĭh; njŭn leo 7.000-7.500 nuĭh hăn pah kan geh năm ton ta dak bah dih. Tât aƀaơ, rnoh nuĭh hăn pah kan dak bah dih tĭng  nău tâm ton lah 3.480 nuĭh, hao dah 50% trong nchrăp ndơ̆ luh. Mpeh ăp trong nkra gay tĭng ƀư rnoh tât kan dja,  wa Nguyễn Quang Thuân, Groi Giám đốc Sở Lao động Thương binh n’hanh Xã hội n’gor Dak Lak an gĭt:

“Aƀaơ Sở hŏ tâm nchră lôch jêh gay nsŏng kơl an Tỉnh Ủy, Ủy ban n’gluh an dŏng Đề án mpeh hăn kan dak bah dih mpeh njŭn leo nuĭh Việt Nam hăn pah kan geh lĕ năm ton ta dak bah dih tĭng nău tâm ton, n’hanh mbra pơk hvi ntŭk hăn kan, lơn lah ntŭk hăn kan ta Châu Âu gay geh âk trong sơch an ăp nuĭh râng hăn kan. Bah meng nê mpôl hên an lah ân geh nău lăp kan bah lĕ ma lam trong  kan chính trị, tâm nê geh nău tât râng dăng bah gưl ủy, n’gâng kan ta ntŭk n’hanh rgum tâm 2 nkuâl ach o n’hanh ăp nuĭh ach o ta lam n’gor gay njŭn leo khân păng hăn pah kan dak bah dih gay ntop n’hao nău nsĭt geh wăng sa, du gâl rgum nău tă ơm gĭt kan gay nchrăp mpôl kan an nău công nghiệp mhe, têh uĕh mhe tât aơ tay rnôk n’gor wăch rgum âk doanh nghiệp ntuh kơl tâm Dak Lak.”

Hăn kan dak bah dih lah du trong nkra  nta joi nău kan geh nău tam, ăp năm nsĭt tay tơm prăk  dak bah dih an n’gor, rgop ntĭm nti nău kan, jut jăng ji ngot hŭch ach o, rgâl geh nău rêh an du đêt nuĭh kan. Nău rêh bah âk nuĭh kan hŏ rgâl nơm geh ntơm jâng geh moh hăn kan dak bah dih./.