BTV Ama Zưt (Bôk nău ngơi Ba Na) nkoch nău “ƀư kon nuĭh kon se 7 năm deh” dŭt răm. Nĕ lah rơh bôk năp Nhạc sỹ Linh Nga Niê Kdăm (rnôk nĕ lah Groi giám đốc ngih pah kan) hăn mâp băl djăt radio ta ƀon Kơ jêng, xă AYun, nkuăl Mang Yang, n’gor Gia Lai.

Nar nĕ, ƀon dôl ƀư brah. Tĭng nău way ơm bah nuĭh Ba Na, ăp rnôk ƀư brah ri dŭt wêr, mô dơi wơt năch. Yơn dŭt lap, nar nĕ knŭng ƀư rhơn kônh wa bah ƀon ngai tât khâl, jêng Ama Zưt dơi jă lăp jay nhih. Jêh “ôp ngơi n’hanh mbơh êng săk” ri kônh wa saơ dâl, nĕ lah Ama Zưt-nuĭh way ngơi tâm radio đah nău ngơi Ba Na.

Ăp nuĭh rgum ôp khân n’hanh rnê bôk nău ngơi Ba Na bah Đài TNVN uĕh ngăn, mô knŭng ndrĭ, kônh wea hôm dơi gĭt BTV Ama Zưt lah kon bah wa A ƀon đah ri. Gĭt ndrĭ jêng nuĭh tơm jay an lah: nô lah kon sau tâm jay nĕ”. ! Ngơi jêh nĕ pơng ntĭm ji mpeh đah mon nklăp 7 năm deh ngơi tay: “Ri lah mbơ̆ bah mon nĕ’. Ama Zưt uănh kon se rhing rhâng. Nuĭh tơm jay ngơi tay: “Pơng tâm ban săk đah mbơ̆ mon nĕ”. Tât aƀaơ ri Ama Zưt nkah gĭt tay nău way ơm bah nuĭh Ba Na: Tâm ban săk lah oh nô, tâm ban ngoăy ma bar. Nô ndăn kŭnh bôk nhŭp ti “bơ̆ oh”. N’hanh bah nĕ, ăp nuĭh rah rơih nhŭp ty nkoch bri n’gôr răm. Ndăn mông nar di nĕ, Nhạc sỹ Linh Nga Niê Kdăm n’hanh Ama Zưt ƀư nar kuăl brah khlay wơt năch bah ƀon jêng nău tâm mâp băl djăt radio lôch uĕh. Nkah gĭt tay nău răm nĕ, BTV Ama Zưt nkoch:

Đah nău mâp băl djăt radio mô lah hăn nchih nău rhŏ an bôk nău ngơi ăp nău ngơi rnoi mpôl đêt Tây Nguyên, nău răm ngăn nĕ lah gâp dơi ƀư lĕ nău kan bah du BTV, nuĭh rblang nău ngơi, ntuh ngơi. N’hanh tă bah ăp rơh mâp mô lah hăn pah kan nchih nău kơt nĕ gâp lĕ nti dŭt âk bah băl djăt radio, mpeh trong rblang m’hâm ƀư an di nău ngơi bah rnoi nơm, răk m’hâm an di nău ngơi rnoi nơm. N’hanh bah ăp rơh mâp kơt nĕ kơl gâp mbơh nkoch nău kơl bah Đảng, Pháp luật bah Ngih dak tât đah nuĭh ƀon lan dơh wât, dơh djăt n’hanh dơh ƀư tĭng.

Du rơh êng, Ama Zưt “hăn khâl” Giám đốc Uông Ngọc Dậu hăn pah kan ta ƀon Tươh KơTu, xă Glar, nkuăl Đăk Đoa, n’gor Gia Lai, gay mĭn joi đah wa Nơn (nuĭh Ba Na) mât 7 kon se kon đơi. Dôl ôp ri du hê bu klô lăp ôp: Tâm ban lah geh nô Ama Zưt di đŏng? Nău ôp ƀư n’ăp Giám đốc Uông Ngọc Dậu n’hanh Ama Zưt dŭt n’hâm ndrăt? Saơ kơt nĕ, wa Nơn nkoch nĕ lah oh bu klô ngo măt ƀa ƀơ djăt nău ngơi Ba Na bah Đài TNVN n’hanh gĭt âk nđơn yor Ama Zưt nkoch tâm radio. Mô hôm kâp, oh bu klô ngo măt kơt bâr Ama Zưt nkoch du gâl tâm nđơn mhe pơk pơh bah năp. Nău nkoch ƀư ăp nuĭh tâm mpôl pah kan luh dak măt; nkre yô̆ an nău rêh ngo măt bah oh nkre răm yor geh băl djăt radio lăp tâm nuih n’hâm kơt nĕ.

Yuh Lơ Mu K’Yến (Kruanh rmôt bôk nău ngơi K’Ho) nkoch nău răm lap, ntô̆ n’hao bôk năp râng Tâm nđŭr nău ntuh ngơi lam dak rơh tal 15, đah nău ngơi “Druh ndăm K’ho mĭn ndâk njêng nău kan ndâk njêng thôn ƀon mhe”. Bah nĕ, yuh kơt dơi ntop tay n’hâm soan, gơih hăn sĭt ƀon lan âk lơn. Ăp rơh sĭt đah ƀon lan K’Ho jru ngai bah n’gor Lâm Đồng gay joi nău mprơ mô lah pah kan nchih nău, djăt nău ngơi kônh wa gĭt saơ Lơ Mu K’Yên. Nhup jâng nhŭp ty rhơn, kônh wa nkoch ăp nău dơi djăt tâm radio đah nău ngơi K’Ho, ntop tay nău ngơi bah rnoi nơm, yuh lŏ lơ rngot tay, ryơk n’hanh uănh khlay nău kan bah nơm. BTV Lơ Mu K’Yên nkoch:

Gâp dŭt răm rhơn ăp rơh hăn sĭt ƀon lan, n’hanh saơ dŭt lap rnôk dơi mâp ăp nuĭh gĭt blău lah nuĭh K’Ho nơm, ăp nuĭh wât jru đah nău rêh wăng sa bah kônh wa ƀon lan K’Ho. Lơn lah ta ăp kônh wa aơ khân pơng dŭt wât mpeh văn hóa kăl e bah nuĭh K’Ho. Knơm nĕ ma gâp dơi wât têh khlay rhŏ an kônh wa djăt Radio đah ăp bôk nău ntuh nar lơ uĕh lơn. Săk gâp nơm dŭt răm bah nĕ mbra nsrôih dŭt n’hâm tâm di nău ŭch djăt Radio bah kônh wa K’Ho ta nkual Tây Nguyên mô lah ta dak bah dih dơi djăt nău mhe đah nău ngơi K’Ho tă bah Internet kơt radio đŏng. Gâp dŭt lah uĕh n’hanh răm rhơn”.

Bah ăp rơh hăn kơt nĕ, ăp biên tập viên, nuĭh ngơi bah Jrô kan rnoi mpôl đêt-Ngih pah kan ta nkual Tây Nguyên dơi geh âk ndơ nkhôm gưl ngih dak n’hanh gưl n’gor. Na nê̆, năm 2022, geh Giải Bạc đah nkô̆ trăch “Bah nău way ơm tât pháp luật”. Nĕ lah nău nkoch nuĭh kon Jarai “Rlet rlău nău rtăp”, nsrôih jŭt jăng nău way ơm rluk mâl mprơh bơ̆ luh bah dih jay rnôk mê̆ roh”; nkoch nău rêh gĭt wât ryơk đah me bơ̆ nơm. Năm 2018, Jrô kan Nău ngơi rnoi mpôl đêt geh giải Bạc ta Tâm nđŭr ntuh ngơi lam dak đah nkô̆ nău “Nău uĕh ơm Tây Nguyên”. N’hanh tât năm 2020, Jrô kan nău ngơi rnoi mpôl đêt geh tay giải Bạc ta Tâm nđŭr ntuh ngơi lam dak rơh tal 15, đah nău nchih “Druh ndăm K’ho mĭn ƀư mhe rdâk njêng nău kan ndâk njêng thôn ƀon mhe”./.