Tâm nau khuh răm tâm Ngih rƀŭn rgum ƀon Diêo, xã Bông Krang, nkuăl Lắk, n’gor Dak Lak bah năp n’ha cờ neh dak, cờ Đảng, rup Kruanh Hồ Chí Minh, H Mên Teh răk nau tâm rnôk lăp đảng viên mhe:

 ‘Mro mrăng ƀư ueh đah nkô̆ nau kan Cách mạng bah Đảng, ƀư tĭng rjăp nau nâp chính trị, điều lệ Đảng, ntrŭnh rđau bah Đảng, pháp luật bah Ngih dak. Ƀư uêh nau kan geh jao. Dăn ton. Dăn ton. Dăn ton"”

H Mên Teh, deh năm 1996, rnoi Bunong, jêh âk năm nsôih tă bah nŭih bu druh geh nau blau rnôk aơ hŏ jêng lăp đảng viên tal 9 bah Chi bộ Ƀon Diêo. H Mên Teh nkoch:

‘Gâp saơ rhơn ndrel ntô̆ hao săk nơm geh jêng du hê Đảng viên Đảng cộng sản Việt Nam. Gâp mra nsôih lơn tay, gâp mra geh ƀư âk nau ueh lơn tâm ăp nau kan bah ƀon lan nơm”.

  Hun hao đảng viên mhe nkuăl rnoi mpôl đê̆ mô di lah nau nơih, ngăn lah đah xã jêr ngăn bah nkuăl Lăk. Yơn đah nau nsôih “Ndâk, hun hao chi bôk nâp dăng” ăp ntŭk kan đảng hŏ ndâk nau nchrăp, ngluh nau ntrŭnh mpeh nkô̆ nau hun hao đảng viên ăp năm. Ndrel ma nê, ăp đảng viên tâm ăp chi bộ nsôih leo trong lor, njêng nau ntul rlong gay jêng nau nkhêp tâm nau hun hao văng sa, rêh jêng tâm nkuăl. Wa Y Wu Sruk, Groi Kruanh UBND xã Yang Tao, nkuăl Lắk, mbơh:

‘Trong nơih ta aơ lah nơm lah nŭih tâm ƀon lan, ma xã Yang Tao lah xã nkuăl e, jêr jŏt ngăn ngên, geh 95% lah rnoi mpôl đê̆. Ri gâp gĭt dơi nau vay ơm bah nkuăl ta aơ, ngăn lah tâm nau dŏng nau ngơi bah rnoi nơm gay ma nơih tâm nkoch mbơh ma kônh wa. Jêh nê blau nau vay ơm bah kônh wa, nơm gĭt nau jêr bah kônh wa. Tă bah nê ri nơm kơt tĭng, leo ăp ntrong kan bah Đảng, pháp luật bah Ngih dak tât ma kônh wa gay kônh wa dơi gĭt ndrel kơt tĭng tâm nau rêh”.

 Tĭng wa Đào Thị Thanh An, Groi Bí thư Rnâng kan nkuăl uỷ Lắk, n’gor Dak Lak, ntơm bah nau ngăn nkuăl geh nŭih rnoi mpôl đê̆, Rnâng kan nkuăl uỷ Lắk năl, nau nglăp đảng viên rnoi mpôl đê̆ geh nsum ma nau pă cán bộ tâm trong kan chính trị, geh nau khlay tâm nau kan ndâk Đảng, ndâk n’gâng kan tâm dâng. Tă bah nê rgop nau n’hao nau mât Ngih dak, ndâk trong kan chính trị nâp, n’hao nau tâm rnglăp ăp rnoi mpôl. Wa Đào Thị Thanh An, mbơh:

‘Mra dơi lah tâm rơh rlau aơ, nau kan bah ăp cán bộ đảng viên, ngăn lah đảng viên rnoi mpôl đê̆ hŏ ƀư ueh nau kan, nau dơi, ngăn lah nkoch trêng, bonh đă kônh wa tâm nau hun hao văng sa, văn hoá rêh jêng, đăp mpăn neh dak ndrel ndâk trong kan chính trị tâm dâng. Nkoch mbơh ân kônh wa mô djăt, mô tĭng phung mhik ndrel n'’ao nau tâm rnglăp tâm ăp rnoi"”

 Tât rnôk aơ, lam nkuăl Lăk geh bơi tât 1.400 đảng viên lah nŭih rnoi mpôl đê̆, geh 42% rnoh đảng viên lam nkual. Aơ lah rmôt kan tơm, nsôih rgop nau ndâk njêng ƀon lan nar lơn hun hao./.