Ntơm bah ntŭk nchrăp kan têh khlay lam dak, lơn lah hun hao GDP năm 2025 geh 8,02% an saơ păng rup hun hao bah Việt Nam tâm ăp năm rlău aơ dôl ntoh mpơl đah ăp rup ndrang mpơl kloh. Ta jâng nsing đăp mpăn wăng sa têh, nău nsing nơm lam rêh jêng kon nuĭh dơi rdâk nâp n’hanh nđơr nsan hao dăng, neh dak dôl rgum ăp tŏng ndơ gay lăp tâm rơh hun hao mhe ngăch lơn, nâp jong lơn n’hanh ƀư tơm êng lơn.

Ta Thủ đô Hà Nội, tâm ăp nar khay bôk năp an ƀư Nghị quyết Đại hội XVIII Đảng bộ nkual ƀon têh năm kan 2025–2030, âk nău n’glêh an têh dơi ƀư jêng ngăn ngăn ma ăp trong nchrăp jŏ jong. Bar trong nchrăp rgum tơm, nê lah trong me uĕh măt uănh dak me sông Hồng n’hanh Nkual đô thị thể thao Olympic dơi mpŏng njêng jâng ntơm hun hao, pơk luh “Nău dơi têh sông Hồng” tâm let năp tay. Ủy viên Bộ Chính trị, Bí thư Thành ủy Hà Nội Nguyễn Duy Ngọc an gĭt:

“Aơ lah 2 trong nchrăp kan dŭt n’hâm khlay mha êng, rgop hun hao Thủ đô, nkual đồng bằng sông Hồng n’hanh lam dak, rƀŏng tât njêng geh nău dơi sông Hồng, rhŏ an rnoh tât hun hao GRDP ntơm bah 11 % let lơ tâm năm n’hanh lĕ ma năm kan, njêng muh măt mhe bah Thủ đô Hà Nội, văn hiến, săk tơm, blău ƀư mhe, nsan hao jêng trong me đô thị blău mhe nđir uĕh, ăp tŏng geh nău lư, buăt nthoi lam ntŭr neh”

Mô dơn Hà Nội, lam dak, âk n’gor dôl du rut an ƀư ăp trong nchrăp ƀư ndơ dŏng rgum tơm, ntơm bah ntung trong, đô thị, nkual công nghiệp công nghệ mhe tât ndơ dŏng ntop kơl, njêng suan ntrôl rêng lam an hun hao.

Tâm rnôk lam ntŭr neh rgoh n’gơ dăng, wăng sa têh bah Việt Nam dơi mât đăp mpăn tay. Lvang năm 2021–2025, hun hao GDP rĭng geh 6,3%, êng năm 2025 geh tât 8,02%; rnoh têh wăng sa hao 514 rmen USD, dâk tâl 32 lam ntŭr neh; GDP rĭng bôk nuĭh rlău 5.000 USD. Hao khlay ndơ dơi mât kân, ăp tâm rlak têh bah jâng wăng sa dơi đăp mpăn. Groi Giáo sư, Tiến sĩ Nguyễn Thường Lạng, Nhih nti Đại học Kinh tế quốc dân, an lah ăp nău dơi dja geh nkô̆ hôr dŭt khlay:

“Aơ lah jâng ntơm dŭt nâp an rơh hun hao mhe, tâm nê ân rgum tâm rgâl nđĭr uĕh, rgâl mbrô; nănh koh n’hŭch đêt siƀŭt, n’hao nău dơi an doanh nghiệp gay njêng luh nău hun hao mpeh wăng sa.”

Năm 2025, lam dak geh bơi 300 rbăn doanh nghiệp njêng mhe n’hanh plơ̆ kan tay; lĕ rngôch tơm prăk đăng ký ntop tay tâm jâng wăng sa geh bơi 6,4 rkeh rmen prăk. Nkual FDI rgop khlay tay, đah lĕ rngôch tơm prăk tĭng ƀư lvang năm 2021–2025 geh tât rlău 158 rmen USD, an saơ wăch uĕh bah ntŭk ntuh kơl Việt Nam.

Lăp tâm lvang năm 2026–2030, rnoh ŭch tât hun hao GDP rĭng ntơm bah 10%/năm let lơ dơi ntrŏng kloh. Ăp trong nchrăp ndơ dŏng khlay jŏ jong kơt trong loih cao tốc Bắc – Nam, ndơ dŏng mbrô, ŭnh nar, logistics; ndrel rƀŏng trong hun hao nđĭr uĕh, wăng sa mbrô, công nghiệp “Make in Vietnam”, ndrel đah nê lah nău kan bah n’gâng kan công nghiệp văn hóa, pâl nđaih... mbra pơk luh soih uĕh hun hao mhe an neh dak. Rnâng kan wăng sa Tiến sỹ Lê Duy Bình an lah:

“Nuih n’hâm ƀư tơm êng, nsrôih ndôr êng bôk năp ân dơi mpơl ta nău đăp mpăn wăng sa têh, ta nău dơi ƀư tơm trong kan prăk kaih, năm dŏng prăk kaih nhanh nău têh khlay ntŭk gŭ bah jâng wăng sa Việt Nam tâm lăp rgum dak bah dih.”

Ndrel đah hun hao, ăp đăt ndal têh jong mpeh trong tĭng, ndơ dŏng n’hanh tơm nuĭh kan dơi an ƀư ăp kôp. Rơh hop Quốc hội khóa XV dơi uănh lah rơh hop geh nău khlay lịch sử, đah âk luật, nghị quyết droh rklaih kô̆ yơn kol khan trong tĭng, mbluh soih tơm ndơ, rgâl dăng nău mĭn mât bôk jêng nta trong dơh hun hao, dŭt bah nău der, tâm nje nău dơn kan. Đah jâng nsing nâp dăng hŏ dơi njêng, Giáo sư, Tiến sỹ Phan Xuân Sơn, Viện trưởng Viện Gŭ mĭn Danh nhân, nsing nơm:

“Gâp way nsing nơm tâm hun hao bah rnoi nuĭh he n’hanh nsing nơm tâm nău rđău đă bah Đảng n’hanh bah rnoi nuĭh he geh nău han săk, du nuih n’hâm kan uĕh mbra dơi lah sŏng nâp, blău mhe, rlău jêr jŏt tâm ăp rơh. Rnôk dja lăp tâm rơh hun hao mhe, he ntik n’hao nuih n’hâm uĕh nê n’hanh Đảng lah kon rnoi bah nuĭh he. Aƀaơ đại hội 14 bah Đảng lah trong nchrăp rdâk njêng du Đảng lah rlău ma ăp ndơ ơm ri geh rsang rnglay, nuih n’hâm uĕh ri mbra n’hao rnoi nuĭh Việt Nam hăn tât rsang rnglay bah rnoi nuĭh he tâm ban kơt ăp rnoi nuĭh rsang rnglay lam ntŭr neh đŏng”

Đah nău nsing nơm du nuih n’hâm tâm nău rđău kan bah Đảng, đah nău nđơr hao bah lam rnoi nuĭh, yor an du neh dak Việt Nam hun hao ăp tŏng, rhơn răm, tâm ban đah ăp dak têh ndrŏng lam ntŭr neh, đảng viên n’hanh ƀon lan lam dak nsing nơm an lah, đah nău dơi hŏ geh, đah nuih n’hâm ƀư tơm êng, nsrôih ndôr êng, nsing nơm, ndrel nău mĭn rôih dăng mô rgâl n’hanh dâk kan lĕ n’hâm suan, neh dak he mbra ndăn dŏng geh nău tam lĕ trong dơh uĕh, rlău ăp ntul rlong, ƀư jêng ngăn ngăn rnoh tât hun hao ngăch n’hanh nâp dăng.