Ta Nhih nti Tiểu học Nha Trang, 13 nhih nti dơi ƀư jêng du nhih nti, lah 1 nhih nti tơm, 12 phân hiệu n’hanh 5 ntŭk rgum nti, đah rlău 10.500 kon se nti. Rêng ƀư mbrach jong bah ăp ntŭk ntĭm nti ta neh kơh n’hanh tât ăp ntŭk ntĭm nti ta ăp gôl dak tâm kuel dak lêng Nha Trang.

Đah trong ntĭt leo dja, nhih nti hŏ ra uănh tay rmôt kan ta lam nhih nti, rgâl nai ntĭm bah ntŭk ăp tŏng tât ntŭk pah pât, lơn lah ăp môn way êng. Wa Châu Đình Mai Phương, Hiệu trưởng nhih nti Tiểu học Nha Trang, an gĭt, nău dăp rgum, rgâl tâm di bôk năp rgop săk blău ntĭm nti n’hanh gŭ nti ta nhih nti.

“Ntĭt kơt môn Tiếng Anh, ntơm nơh ta ăp phân hiệu geh ăp ntŭk kon se nti ân ndơ̆ prăk gay nti. Yơn lôch dăp rgum tay, nai ntĭm rmeh ta ntŭk dja mbra rgâl hăn tât ntŭk hôm pah pât nai ntĭm, gay kon se nti dơi nti ma mô kâp ndơ̆ tay prăk. Đah môn Tin học tâm ban kơt nê đŏng. Lôch dăp rgum tay, nai ntĭm Tin học dơi tâm ban, tâm pă sĭt tât ăp ntŭk ntĭm nti.”

Nău mât nhih nti têh hvi, đah ăp ntŭk ntĭm nti n’gâng kan ntĭm nti n’gor Khánh Hoà ân rgâl trong mât bôk kan đŏng. Hiệu trưởng rgum tâm ăp nkô̆ nău nsum mpeh way blău kan, rmôt kan n’hanh săk blău ntĭm nti; ăp nău kan mpeh phân hiệu, ntŭk rgum nti dơi jao an nuĭh mât uănh nkra ta ntŭk dĭl. Nhih nti hŭch ăp rơh hop mô lăng khlay, n’hao âk rơh hop pơk sŏng dăng n’hanh dŏng rgum prăp nău lư dŏng nsum.

Ta gưl xã, phường, n’gâng kan ta ntŭk kan nsum đăp mpăn tŏng ăp ndơ rhŏ dŏng ntĭm n’hanh nti, lơn lah drăp ndơ, nhih nti jrô nti n’hanh nkra ăp nkô̆ nău ntoh luh tâm dâng. Wa Vũ Ngọc Đương, Giám đốc Sở Giáo dục n’hanh Đào tạo n’gor Khánh Hòa an gĭt, n’gâng kan ntĭm nti ra uănh tay rmôt nai ntĭm nti, tâm pă nai ntĭm ta ăp ntŭk rmeh, mô tŏng êng tĭng ntŭk, nkre ƀư lôch jêh nău way tâm pă kan, tâm pă gưl.

"Nău mât bôk kan nsing tâm công nghệ thông tin, nsing tâm rnoh nchih, lăp tâm nău way, quy định mpeh tâm pă nuĭh kan, tâm pă gưl. Rnôk n’glăp nsum, nău geh dŏng bah ăp ntŭk nhih nti, ăp phân hiệu lah tâm ban ta ndrel du xã. Aơ lah trong ƀư dŭt uĕh. Me bơ̆ kon se nti tâm ban ŭch dŭt âk. Rgâl bah hôm kơt ntơm nơh ân sơch nhih nti, sơch ăp nhih nti uĕh, ri aƀaơ ta xã, săk blău ntĭm nti n’hanh drăp ndơ dŏng ntĭm nti dơi geh tâm ban lơn".