Tĭng ƀư nău rđău đă bah Tập Đoàn Điện lực Việt Nam n’hanh Tổng Công ty Điện lực miền Trung, ôi 29/5, Công ty Điện lực Kon Tum ƀư Lễ luh hăn kan rdâk ƀư trong rse 500KV mbah 3 bah Quảng Trạch (Quảng Bình) tât Phố Nối (Hưng Yên). Aơ  lah ndơ ƀư khlay rgum tơm gưl neh dak đah nău đă bah Thủ tướng Chính phủ dŭt mbrơi nar 30/6/2024 ân ƀư lôch jêh trong nchrăp gay pă tơm điện an miền Bắc. 

Rmôt hăn chŏl lor bah Công ty Điện lực Kon Tum lah 15 nuĭh. Rmôt dơi jao nău dơn kan ntrŭp rdâk n’gâng ta ntŭk 374, mpeh xã Nghi Văn, nkuâl Nghi Lộc, n’gor Nghệ An. Wa Nguyễn Văn Hạnh, Giám đốc Công ty Điện lực Kon Tum an gĭt, đơn vị hŏ mbơh gĭt, nchră tĭng ƀư trong kan ndơ̆ luh gay sơch kon nuĭh n’hanh trong rdâk ƀư di nău ŭch geh ngăn ngăn. Đơn vị hŏ nchrăp ăp tŏng lĕ mpeh ndeh rklư, ndơ ntrŭp dŏng gay đăp mpăn ƀư ndăng măng nar.