Tâm 2 tŏ tât khâl, pah kan tâm n’gor Kon Tum tâm năm 2011 ndrel năm 2017, Tổng Bí thư Nguyễn Phú Trọng kŏ dŏng mông nar gay ma hăn khâl, joi uănh n’hêl nau geh ngăn ngên bah nau rêh, djăt nau mĭn, nau ŭch bah kônh wa rnoi mpôl đê̆. Nau rêh nau kan ngăn mleh mlôn, ăp nau ôp khâl, ntĭnh ntăn ƀư ueh nuih n’hâm bah Tổng Bí thư mro geh ƀon lan Kon Tum nkah ngăn. Wa A Bát, tâm thôn Kon Rờ Bàng 2, xã Vinh Quang, nkuăl ƀon têh Kon Tum, nkoch:‘Năm 2017 ƀon lan hên geh mâp Wa Nguyễn Phú Trọng ta aơ, bu ranh ân ma Wa du blah ao tanh bah nŭih ƀon lan tâm ntŭk hên. Wa Tổng Bí thư mbah, ôp khâl kônh wa, Wa nhŭp ty ăp nŭih ăp nŭih, ntĭnh ntăn kônh wa nsôih pah kan jan sa, mô djăt tĭng nau bu nsŭk. Tăng nau ntĭm nti bah Wa Nguyễn Phú Trọng ri ƀon lan Kon Rờ Bàng tâm rnglăp, tâm kơl ueh ngăn, ƀa hin ri ƀon lan nơm hun hao rgâl âk đŏng. Rnôk tăng Wa lĕ roh ri hên rngot ngăn, ăp nŭih kŏ rngot, ăp nŭih kŏ ŭch nhĭm”./.

Lah nuĭh geh nău knơm tâm ntŭk rêh jêng nuĭh Rđe âk tơ̆ tât râng ăp nău pah kan văn hóa way ơm ta thủ đô Hà Nội, nghệ nhân ưu tú Ama H’Loan, ta ƀon Ako Dhông, phường Tân Lợi, nkuăl ƀon têh Buôn Ma Thuột, n’gor Đăk Lăk nkoch, Tổng Bí thư Nguyễn Phú Trọng lah nuĭh leo kan mô geh nău tâm ƀah, way dăch bên đah ƀon lan, djăt nău ŭch nău rŏng bâh ƀon lan. Bâh geh ăp nău ntrŭnh di bâh trung ương đah nău ntĭm đă bâh Tổng Bí thư,k nkual gôl yôk, n’har bri, nkual rnoi đê̆ lĕ geh rgâl, hun hao âk. Bu ranh Ama H’Loan nkoch. “Sŏk nău rngot klâng nĕ rlet rlău ăp nău jêr jŏt ƀư tĭng trong ntĭm đă bâh Đảng, bâh ngih dak, tâm nĕ geh nău ntĭm bâh Tổng Bí thư Nguyễn Phú Trọng. Êng gâp hôm nha rêh, gâp an geh nkah ƀon lan, nkah kon său, nsrôih rdâk njêng an Tây Nguyên sâm geh lơn, ntop rdâk njêng neh dak nơm têh ndrŏng lơn”.

 Tăng lah Tổng Bí thư Nguyễn Phú Trọng lĕ roh, kônh wa ăp rnoi mpôl tâm xã Quảng Tâm, nkuăl Tuy Đức, n’gor Dak Nông rngot klâng ngăn. Nkah nau Tổng Bí thư ntĭnh ntăn, bonh đă ƀon lan tâm rnôk hăn khâl Quảng Tâm ntơm 12 năm bah năp nê, kônh wa ăp ƀon lan ân mro tâm rnglăp, ndrel nuih n’hâm, rnơm tâm nau rđau kan bah Đảng, Ngih dak, nsum n’hâm ndâk njêng ƀon lan, ƀon tơm nar lơn têh ndrŏng.

Nô Điểu Ngót, rnoi Bunong, Bí thư Đoàn druh ndăm Cộng sản Hồ Chí Minh xã Quảng Tâm, nkuăl Tuy Đức, n’gor Dak Nông, nkoch: ‘Tăng nau lah Tổng Bí thư lĕ khĭt, rơh mom tâm xã dŭt n’hâm rngot klâng ngăn du hê nŭih rđau kan dŭt n’hâm geh nau blau, nau janh, nsôih ăp nau kan yor ƀon lan, nŭih mro ân ma ƀon lan ăp nau ŭch rŏng ueh ngăn ngên ân rơh mom ndrel nkual jru, nkual ngai. Phung hên, ăp kơn druh ndăm mro nkah nau ntĭnh bah Tổng Bí thư, ân geh mro ƀư ueh nuih n’hâm tâm rnglăp, ndrel nuih n’hâm, rnơm tâm nau rđau kan bah Đảng, Ngih dak. Hên mra nsôih ntĭm nti, pah kan jan sa, hun hao tuch tăm. Ngluh n’hâm ndâk njêng ƀon lan, ƀon tơm, neh dak nar lơn sâm geh”./.