Tĭng ƀư nău ntrŭnh 05 bah Bộ Chính trị mpeh ntrôl dăng kơl nti n’hanh ƀư tĭng nău mĭn, nuih n’hâm uĕh  lăng, trong gŭ rêh Hồ Chí Minh, năm 2019, nkuâl Mù Cang Chải, n’gor Yên Bái hŏ rgŏ jă n’hanh an ƀư trong ntĭt leo “Nar kêng dŭt pơh ndrel ƀon lan”. Rlău 5 năm an ƀư, trong ntĭt leo hŏ nsĭt tay geh âk nău dơi nkah uĕh, krêp dêh đah Đảng n’hanh ƀon lan. Aƀaơ trong ntĭt leo hŏ dơi pơk hvi lam n’gor Yên Bái.

Bí thư Huyện ủy Mù Cang Chải – wa Nông Việt Yên an gĭt: Khay 6/2019, Huyện uỷ Mù Cang Chải rgŏ jă n’hanh an tĭng ƀư trong ntĭt leo “Nar kêng dŭt pơh ndrel ƀon lan” gay n’hao dăng tâm boh krêp dêh đah cán bộ, đảng viên n’hanh ƀon l an, ntrôl rŭch ăp nău  mpơl ƀah ngai ƀon lan n’hanh tĭng ƀư trong rƀŏng “Nchrăp, dâk lor  tâm dâl nău đah ƀon lan, ƀon lan, lĕ du nuih n’hâm rhŏ dŏng an ƀon lan”.

 Tĭng nê, ăp cán bộ, đảng viên rlău ma hăn pah kan tâm dâng tĭng nău way kan ri ăp khay ân dăp rgum êng mông nar, nău kan bah he nơm, rong an dŭt đêt 2 nar kêng dŭt pơh hăn tât dăch đah ƀon lan ta ăp thôn, ƀon dơi tâm pă kan, mât uănh mpeh nkô̆ nău nkoch trêng trong nchrăp, gung trong bah Đảng, trong kơl, pháp luật bah Ngih dak; ntop kơl ƀon lan hun hao wăng sa, jut jăng ji ngot, n’hŭch ach o; nkah njrăng lor bah năp ăp nău choh chôl lơh chrai Đảng, Ngih dak tât nuĭh ƀon lan; gay rƀah gĭt nô nău, nuih n’hâm ŭch rŏng bah ƀon lan, ndrel ƀon lan droh rklaih ăp jêr jŏt, nuih ăl tâm  nău rêh, nuih n’hâm, pah kan jan sa.

Đah nău ŭch tât năm 2030 Mù Cang Chải mô hôm lah nkuâl ach o, mpôl hên ntrŏng “Nar kêng dŭt pơh  ndrel ƀon lan” nkre lah nău dơn kan, nkre  lah trong nkra đăt ndal. Du ntil đŏng, nê lah ntŭk an Ban Thường vụ, Ban Chấp hành đảng bộ nkuâl tiăr nti n’hanh uănh năl cán bộ. Tâl pe, sŏk nău nê ƀư ntŭk nsing gay uănh năl nău dâk leo lor  bah cán bộ, mhâm ƀư gay njêng nău krêp dêh, êt lhăt lơn đŏng đah cán bộ, đảng viên đah ƀon lan.

Rlău 5 năm an tĭng ƀư trong ntĭt leo “Nar kêng dŭt pơh ndrel ƀon lan”, bơi 30.000 tơ̆  cán bộ, đảng viên, công chức, viên chức, nuĭh kan; rlău 90.000 tơ̆ nuĭh ƀon lan hŏ râng ƀư  ăp nău kan na nê̆ ta ăp  ƀon, tổ dân phố. Kêng dŭt lah ƀư têh uĕh rlău 300 km trong hăn tâm ƀon lan n’hanh pơk mhe rlău 62 km trong neh; ƀư rlău 25.500 rơh nkoch trêng trong nchrăp, gung trong bah Đảng, trong kơl, pháp luật bah Ngih dak; hun hao wăng sa – rêh jêng kon nuĭh, njrăng n’gang nuh srê; njrăng n’gang nuĭh tih djơh.

Ăp nău kan dja hŏ rgop ƀư jêng an  muh măt thôn ƀon ta Mù Cang Chải nar lơn ma săk ntơr; rĭng geh tĭng bôk nuĭh năm 2023 geh 34 rkeh prăk/nuĭh, hao 70% rđĭl  đah bôk năm kan. Rĭng ntơm bah bôk năm kan tât aƀaơ, ăp năm nkuâl hŭch rlău 9% rnoh rnăk ach o, n’hŭch rnoh ach o lam nkuâl jŭr hôm 38,45%. Wa GiàngThị Khua, nuĭh ƀon lan ta xã Hồ Bốn, nkuâl Mù Cang Chải rhơn nđơr an gĭt:

Ăp nuĭh dŭt rhơn nđơr yor âk băl rkhăl dak ri rlău du hê nuĭh ƀư; lơn lah lĕ ma trong hăn lăp  tâm jay he dơi ăp  cán bộ tât ndrel kan ƀư, kơl nsum đŏng. Đah kônh wa ƀon lan n’hanh ăp nuĭh cán bộ dơi dăch dêh nsum lơn. 

Jŭr na nê̆ ndrel ƀon lan tâm dâng ăp nar kêng dŭt pơh, Bí thư Tỉnh ủy Yên Bái – wa Đỗ Đức Duy nkoch: ăp khay bôk năm 2019, lôch rnôk Ban Thường vụ Huyện ủy Mù Cang Chải mbơh mpeh  ăp nău mĭn bôk năp tâm nău tĭng ƀư trong ntĭt leo “Nar kêng dŭt pơh ndrel ƀon lan”; saơ  aơ lah trong ntĭt leo rgŏ jă  n’gâng kan geh nău tam, geh nău dơi âk, tâm di đah ngăn ngăn, Ban Thường vụ Tỉnh ủy Yên Bái hŏ tâm ban ŭch sơch nkuâl Mù Cang Chải ƀư đơn vị dâk  hăn lor, lôch nê rhuăt luh nău tă ơm gĭt pơk hvi trong ntĭt leo lam Đảng bộ n’gor.

Lôch bơi 05 năm tĭng ƀư ăp trong nchrăp bah Ban Thường vụ Tỉnh ủy, bôk nău kan “Nar kêng dŭt pơh ndrel ƀon lan” hŏ rgum geh nău tât râng bah âk mpưm cán bộ, đảng viên n’hanh ƀon lan nsing ta nuih n’hâm dâk êng, mô lah ngơi dơm ma mbung, nchuăt tĭng nău ngăch dơm. Rmôt cán bộ, đảng viên mô kă rnam, mô klach jêr jŏt, ŏ r’ah hŏ ndrel nsum ti tĭng ƀư  ăp nău  kan kơt: mât kloh uĕh ntŭk gŭ rêh, rgum ndŏk, ƀư jay văn hóa, ƀư ntung trong hăn thôn ƀon, ntop kơl ƀon lan hun hao wăng sa.

Mpôl hên n’glôch jêh, uănh năl, pơk hvi ăp trong ntĭt leo blău uĕh mhe, ăp trong ƀư uĕh n’hanh  geh nău tam nkre đah kơt nti n’hanh ƀư tĭng nău mĭn, nuih n’hâm  uĕh lŏng, trong gŭ rêh Hồ Chính Minh. Aơ lah nău kan way ƀư mbro, lah ngoăy tâm ăp trong rđău kan bah đảng bộ n’gor, nkre lah ngoăy tâm ăp trong nkra gay tĭng ƀư nău  dơn kan dâk leo lor, ƀư lor bah cán bộ, đảng viên tâm nău grêt dăch tâm dâng, nkre đah dêh bên ƀon lan.

 Nsĭt geh nău tam "Nar kêng dŭt pơh ndrel ƀon lan" hŏ n’hanh dôl rgop uĕh gay Mù Cang Chải ơm lôch jêh ăp rnoh tât ma Nghị quyết Đại hội Đảng bộ n’gor n’hanh Nghị quyết đại hội Đảng bộ nkuâl, nău dơn kan 2020 - 2025 hŏ n’gluh mbơh, n’hao ơm jêng nkuâl pâl nđaih, ntŭk tât “Săk tơm, đăp mpăn, dêh bên” bah n’gor n’hanh lam dak; tât năm 2025 luh bah săk ăp nkuâl ach o n’hanh nâp jâng chuat kalơ trong hăn rgâl mhe, lăp rgum, hun hao./.