Nkhêp di nar deh bah Tổng Bí thư Nguyễn Phú Trọng (14/4), tâm âk nar bah năp, âk kruanh ăp dak, ăp chính đảng lĕ njuăl sam ƀŭt, kuăl điện mbah rhơn Tổng Bí thư, tâm nĕ geh kruanh ăp dak, ăp Đảng bah Lào, Trung Quốc, Cuba, Nga, Belarus, Dominicana.

Kruanh ăp dak, ăp chính đảng mbah rhơn ăp nău geh têh koăng, ntoh lư tâm hun hao, ndâk njêng neh dak Việt Nam đah nău rđău bah Đảng Cộng sản Việt Nam, djôt bôk lah Tổng Bí thư Nguyễn Phú Trọng; mĭn lah mbra ndrel tay đah Tổng Bí thư ntrôl ăp nău tâm boh ăp ding mô rlu hun hao.

Tổng Bí thư, Kruanh dak Lao Thonglom Sisoulith lah rjăp Tổng Bí thư Nguyễn Phsu Trọng “uănh mĭn lơn n’hanh tâm rgop dŭt n’hâm nău tâm boh dăch dêh têh khlay, tâm rnglăp n’hanh kan ndrel lĕ rngôch đah 2 đảng, 2 ngih dak n’hanh nuĭh ƀon lan 2 dak Lào-Việt Nam, mât uĕh nău way ơm nĕ mro mrăng uĕh lăng, na nao nâp nâl”. Tổng Bí thư, Kruanh dak Trung Quốc Tập Cận Bình mĭn lah “uănh khlay nău tâm boh Trung-Việt, nchrăp ndrel đah Tổng Bí thư Nguyễn Phú Trọng mât tâm rgâl trong kan, nchrŏng trong ndâk njêng Nsum mpôl tâm pă rgŏ năp Trung Quốc-Việt Nam hăn jru lơn n’hanh ngăn ngên”.