Nkhêp geh nchrăp wơt Tết Nguyên đán Bính Ngọ 2026, tĭng nău way ơm bah rnoi nuĭh, nar ntri (28/1), ta Nkual ƀon têh Hồ Chí Minh, Kruanh dak Lương Cường hŏ tât khâl, mbah rhơn Tết ăp kruanh dak ơm Nguyễn Minh Triết, kruanh dak ơm Trương Tấn Sang; khâl rnăk wâl n’hanh mpoh nhang nkah gĭt du đêt kruanh rđău kan ơm Đảng, Ngih dak. Khâl, mbah rhơn Tết Kruanh dak ơm Nguyễn Minh Triết n’hanh Kruanh dak ơm Trương Tấn Sang ta jay êng, Kruanh dak Lương Cường ôp khâl n’hâm suan, nău rêh rnăk wâl bar kruanh.

Kruanh dak mpơl nău uănh khlay, nkah gĭt jru đah ăp nău n’groh an, nău rgop têh kuâng bah Kruanh dak ơm Nguyễn Minh Triết n’hanh Kruanh dak ơm Trương Tấn Sang an n’gâng kan cách mạng bah Đảng, bah rnoi nuĭh; nkre ŭch rŏng dơn geh tay ăp nău rgop lĕ nuih n’hâm, nău tă ơm gĭt kan khlay bah ăp kruanh dak ơm an rơh rdâk njêng n’hanh hun hao neh dak tâm rơh hun hao mhe. Tâm mông nar răm mƀak, dêh bên, Kruanh dak ôp khâl nău rêh, kơt nti, pah kan bah rnăk wâl drô Tổng Bí thư Lê Duẩn, drô Tổng Bí thư Nguyễn Văn Linh, drô Kruanh Hội đồng Ngih dak Võ Chí Công, drô Kruanh dak Lê Đức Anh; mbah rhơn rnăk wâl ăp drô kruanh n’hâm suan way ngăch dăng, rhơn răm, geh nău dơi, ntik n’hao tay nău way ơm bah rnăk wâl n’hanh ăp nău dơi hŏ geh, mô rlu nsrôih kơt nti, pah kan jăp, n’groh an dŭt âk an neh dak, ƀon lan.