VOV4.M’nông-Nuĭh ntoh ngơi n’gâng kan nchră nău dak bah dih Lê Thị Thu Hằng ta rơh rƀŭn nchră kêng măng nar 22/9 mbơh, kruanh dak Nguyễn Xuân Phúc mbra ndơn an nuĭh leo kan Đảng, ngih dak Việt Nam tât râng rơh lam dak nkah gĭt khĭt Thủ tướng ơm Nhật Bản Abe Shinzo ta Tokio dak Nhật Bản bâh nar 25-28/9. Nău kruanh dak Nguyễn Xuân Phúc ndơn kan an nuĭh leo kan Đảng, ngih dak Việt Nam râng rơh nkah nar khĭt Thủ tướng ơm Nhật Bản Abe Shin mpơl nău rŏng, kơp dơn bâh nuĭh leo kan, ƀon lan Việt Nam đah ăp nău rŏng n’hanh nău tâm rgop kan bâh Thủ tướng Abe Shinzo ta nău ntrôl tâ kơl đah bar dak, lah na nê̆ nău uănh khlăy tâm boh kan têh hvi Việt Nam- Nhật Bản. Tâm rnôk pah kan, Thủ tướng ơm Nhật Bản Abe Shinzo lĕ 4 tơ̆ tât khâl Việt Nam, geh âk nău rŏng n’hanh tâm rgop khlăy tâm trong ntrôl tâm boh kan bar dak hun hao ueh, lĕ rngôch ta lĕ rngôch ăp trong kan.

Nuĭh rblang: Thị Đoắt