Nkhêp nkah ndray 92 năm Nar way ơm Mặt trận Tổ quốc Việt Nam (18/11/1930-18/11/2022), kêng măng 11/11 ta jay văn hóa xã Khổng Lào, Kruanh dak Nguyễn Xuân Phúc râng, rhơn nsum nar rgum Tâm rnglăp lam rnoi nuĭh tâm rgop nkual ƀon lan gŭ0 pe xã Khổng Lào, Mường So, Hoang Thèn, nkuâl Phong Thổ, n'gor Lai Châu.

Ăp xã Khổng Lào, Hoang Thèn, Mường So geh 30 nkual ƀon lan gŭ, đah 3.404 rnăk, geh 05 rnoi nuĭh Yuăn, Thái, Dao, Mông, Dáy ndrel gŭ rêh. Ƀon lan ta ntŭk way mpư n'hao  nuih n'hâm tâm rnglăp, krêp mpêt; tĭng jăp  trong nchrăp, gung trong bah Đảng trong kơl, pháp luật bah Ngih dak, nău tâm ton tâm nkol ta nkual ƀon lan gŭ; rhơn nđơr tâm rlong pah kan jan sa, jut jăng ach o; tât aƀaơ hŏ geh 2/3 xã di rnoh rdâk njêng ƀon lan mhe. Kônh wa pe xã uănh khlay mât ndray n'hanh mpư n'hao ăp rnoh khlay lễ hội way ơm, nsrôih râng ăp trong ntĭt leo mât njrăng êng nkual ƀon  lan gŭ... Nkoch bri đah kônh wa, Kruanh dak Nguyễn Xuân Phúc lah rjăp, tâm rnglăp lah ngoăy tâm ăp nău way ơm khlay bah rnoi nuĭh Việt Nam; ăp nuĭh ƀon lan ân saơ êng nău dơn kan bah he đah thôn ƀon, neh dak; uănh khlay, ŭch tĭng n'hanh tâm kơl nsum gay ăp nuĭh, ăp rnăk nar lơn ma geh nău rêh uĕh lăng lơn. Kônh wa tâm rnglăp, krêp dêh, rdâk njêng rnăk wâl, nsum mpôl mô dơn gay hun hao wăng sa, ƀư geh ndrŏng ma hôm mât ndray ăp rnoh khlay way ơm văn hoá, nău way uĕh lăng bah rnăk wâl, rnoi deh keh na; ntrŭt nsôr kon său jăp gơih, nti blău....

VOV/Nuĭh rblang: Điểu Thân