Ta rơh lễ, kruanh dak Võ Văn Thưởng rnê âk Mặt trận tổ quốc Việt Nam, Tổng liên đoàn lao động Việt Nam n’hanh Hội chữ thập đỏ Việt Nam ăp năm ba năp lĕ tâm rgop đah ăp ntŭk, geh âk nău  mĭn kan tât ăp nkual njông, nkual ngai ta lam dak gay ma ƀư ăp nău kan mât chăm, kơl an ƀon lan. Ta bôk nău kan “tết tâm rŏng” geh ƀư ta xã Thanh Thủy, nkuăl Thanh Chương, geh âk ndrơng ndơ tết đah ăp ntil ndơ dŭt khlăy gay ma kơl dơm an ƀon lan.

Rlău 20 rmen prăk, 6 rbăn bếp mpêt nkrem ŭnh, du ntŭk n’gon sa an oh mầm non, du ngih chữ thập đỏ n’hanh âk klâm ndơ lĕ geh pă an ăp ntŭk , ăp rnăk dơi kơl, nuĭh kan jêr jŏt. Pă ăp nklâm ndơ n’hanh njoăl nău rhơn năm mhe tât ƀon lan , kruanh dak ŭch ƀon lan mbra geh n’hao tay nău way ơm ntoh lư bâh mpôl rnoi lah nău tâm rnglăp, nău rŏng, tâm kơl, ndrel rdâk njêng nău rêh ăp nar lơ ma sâm geh lơn, ngăn lah ta Nghệ An mbra ơm geh jêng du n’gor têh rnôk ma mô hôm geh rnăk ach o.