VOV4.M’nông: Ôi lơ 23/9, ta nkuăl ƀon têh Đà Nẵng, nkuăl uỷ Đà Nẵng tâm rgop nsum đah Viện Lịch sử Quân sự, N’gâng kan rđau tahen Quân khu 5 ƀư tâm nchră khoa học đah nkô̆ “70 năm nar dơi Đồn Nhất-Hải Vân Quan-Nau ueh ơm, nau blau mpeh nau ndâk nau dơi tâm lơh bah ƀon lan”. Tâm nau vay ơm neh dak, nau dơi Đồn Nhất-Hải Vân Quan lơi ân âk nau dơi ueh ndrel nau blau khlay ân rmôt tahen Liên khu 5 tâm lôch nau tâm lơh mprơh Pháp ndrel Mỹ in pit neh dak.

Nau dơi aơ njêng nau ueh ân nau tâm lơh mprơh rlăng bah tahen ndrel ƀon lan Khu 5, pơk nau lơh mhe tâm ntŭk bri yôk ngai, ntŭk gŭ krap bah phung rlăng âk, dăng, nau lơh dơi Đồn Nhất hŏ ƀư rjăp nau tâm rgop ueh lăng đah nau kan tahen ndrel nau kan chính trị, đah nau tâm lơh bah tahen tơm tâm rgop nsum ma n’hâm dăng bah ƀon lan ndrel hun hao du kích nkuăl. Rơh tâm nchră lah rnôk uănh tay ăp nau tă blau tâm 2 rơh tâm lơh jŏ jong bah rnoi mpôl, pă tay ăp nau ueh khoa học, ƀư kloh nau kan bah nau tâm lơh bah ƀon lan tâm nau mât neh dak./.

Nŭih rblang: H’Thi