VOV4.M’nông- Ôi nar 22/9, ta ntŭk kan kruanh dak, kruanh dak Nguyễn Xuân Phúc tâm mâp dêh rmên ăp nuĭh oh kon se ntoh lư, ndơn kan an oh kon se bâh 54 mpôl rnoi ta lam mpeh mper neh dak tât râng rơh tâm mâp tâm nđur oh kon se ntoh lư ăp mpôl rnoi lam dak tal 4 geh ƀư ta nar aơ 23/9.

Ta rơh tâm mâp, kruanh dak Nguyễn Xuân Phúc lah na nê̆ geh gĭt vât nău mĭn bâh Kruanh Hồ Chí Minh mpeh tâm rnglăp mpôl rnoi, mpeh nău kan mât kơl an oh kon se jê̆, Đảng, ngih dak n’hanh ƀon lan he ƀa ƀơ geh nău khlăy mât uănh, uănh khlăy tât nău kan mât, mât chăm n’hanh ntĭm nti oh kon se, ngăn lah oh kon se rnoi đê̆, gôl yôk, nkual njônh ngai, n’har bri, gôl dak, geh mpơl mbơh âk nău ntrŭnh, nău kơl geh mbơh ƀư ngăch ndăn, săk rnglăy. Kruanh dak lah na nê̆, đah bơi tât 16 rkeh dak ŭch ăp oh kon se gơih nti mât chăm, tiăr nti săk soan gay ma geh tŏng nău gĭt nău blău njêng nău nâp nâl an hun hao tâm let năp tay.